Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Hy vermaentse te bewaren de vrijheyt verkreghen door het bloet Christi, op dat sy hare consciencien niet en souden laten binden door de insettinghen der menschen, 13. hy bewijst oock de mate deser vrijheyt.

A.1

SO staet ^a dan in de vrijheyt daer mede ons Christus vrij ghemaeckt heeft: ende wort niet wederom met ^b den iocke der dienstbaerheyt beuanghen.

a Ioannis 8.d.32 Roman. 6.b.18 1.Petri 2.b.16

b Esaie 9.a.4

2

^c Siet, ick Paulus segghe v, ist dat ghy v laet besnijden, so en is v Christus niet nut.

c Actuum 15.a.1

3

Ende ick betuyghe wederom eenen yeghelicken mensche die hem laet besnijden, dat hy schuldich is gheheel de Wet te houden.

4

Ghy die door de Wet [wilt] gherechtueerdicht worden, Christus is van v ijdel gheworden, ghy zijt van der ghenade gheuallen.

5

Want wy verwachten in den Gheest wt den ghelooue de hope der rechtueerdicheyt.

6

^d Want in Christo Iesu en heeft noch besnijdinghe eenighe macht, noch voorhuyt: maer het ghelooue dat door de liefde krachtich is.

d Matth. 12.f.50 Ioannis 15.b.14 2.Corinth. 5.b.16 Gala. 6.b.15 Coloss. 3.b.11

[fol. 72r]

7

Ghy liept wel, ^e wie heeft v verhindert der waerheyt niet ghehoorsaem te syne?

e Galat. 3.a.1

8

Die ^f beweghinghe en is niet wt hem die v gheroepen heeft.

f Of, ouerredinghe

9

^g Een weynich suerdeesems versuert het gheheele deech.

g 1.Corinth. 5.a.5

B.10

Ick vertrouwe van v inden Heere, dat ghy niet anders en sult gesint wesen: maer die v beroert, sal zijn oordeel draghen, wie hy oock zy.

11

Maer ick, broeders, ist dat ick noch de Besnijdinghe predike, waeromme worde ick noch veruolcht? so is dan de erghernisse des cruyces te niete gheworden.

12

Och of sy afghesneden werden die v afuallich maken.

13

Want ghy zijt ter vrijheyt gheroepen, broeders: ^h alleenlick dat ghy de vrijheyt niet [en gebruyckt] tot een oorsake den vleessche: maer dient malcanderen door de liefde.

h 1.Corinth. 8.a.9

14

ⁱ Want de gheheele Wet wort in eenen woorde veruult, [namelick,] in desen: ^k Du salt dynen naesten lief hebben, ghelijck dy seluen.

i Roman. 13.a.8

k Leuitici 19.b.17 Matthei 22.d.38 Marci 12.d.31 Roman. 13.a.9 Iacobi 2.a.8

15

^l Ist dat ghy malcanderen bijt ende eet, so siet toe, dat ghy niet van malcanderen verteert en wort.

l 2.Corinth. 12.c.20

16

Maer ick segghe: ^m Wandelt na den Gheest, so en sult ghy de begheerten des vleeschs niet volbrenghen.

m Roma. 13.b.14 1.Petri 2.b.11

17

ⁿ Want het vleesch begheert teghen den Gheest, ende de Gheest tegen het vleesch: dese staen teghen malcanderen, ^o so dat ghy niet en doet het ghene dat ghy wilt.

n Roman. 7.c.23

o Roman. 7.b.15

18

Ist dat ghy door den Gheest gheleydt wort, so en zijt ghy onder de Wet niet.

19

^p De wercken des vleeschs zijn openbaer, de welcke zijn, ouerspel, hoererie, onreynicheydt, oneerlickheyt.

p 1.Corinth. 3.a.3 Iacobi 3.b.16

C.20

Afgoderie, ^q fenijngheuinghe, vyantschap, twist, nijdt, toorn, kijuinge, tweedracht, seckten,

q Of, toouerie

21

Haet, moort, dronckenschap, brasserie, ende dier ghelijcke: ^r [van] de welcke ick v voorsegghe, ghelijck ick oock voorseyt hebbe, dat de ghene die sulcx doen, het Koninckrijcke Gods niet besitten sullen.

r 1.Corinth. 6.b.10 Ephes. 5.a.5 Coloss. 3.a.6 Apocal. 22.b.15

22

^s Maer de vrucht des Gheests, is liefde, blijschap, vrede, lanckmoedicheyt, vriendelickheyt, goetheyt, ghelooue.

s Ephes. 5.a.9

23

Saechtmoedicheyt, ^t maticheyt. ^u Teghen de sodanighe en is gheen Wet.

t Of, ghetemperheyt:

u 1.Timoth. 1.a.9

24

^x Want die Christi zijn, die hebben het vleesch ghecruycicht met de beweghinghen ende begheerten.

x Roman. 13.b.14 1.Petri 2.b.11

25

Ist dat wy in den Gheest leuen, so laet ons inden Gheest voortgaen.

26

Laet ons niet ijdelick eere soecken, malcanderen niet terghen, malcanderen niet haten.