Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

1. Hy prijst synen dienst ende weerdicheyt door een heylighe beroeminghe, 22. ende synen arbeyt, moeyte ende wercken verhalende, bewijst dat hy de andere Apostelen te bouen gaet.

A.1

OCh of ghi my een weynich verdroecht in myne onwijsheyt: maer ^a ghy verdraecht my doch:

a Of, verdraecht my

2

Want ick ben vyerich ouer v met Godlicker vyericheyt: want ick hebbe v eenen manne toeuoecht, om een ^b oprechte maecht tot Christum te brenghen.

b Leuitici 21.b.13

3

Maer ick vreese dat niet eenichsins, ^c ghelijck de Slange Euam door haer listicheyt bedrooch, also oock uwe verstant bedoruen worde, afwijckende van de eenuoudicheyt die in Christo is.

c Genes. 3.a.4 Ioannis 8.e.44 Sapient. 2.c.24

4

^d Want ist dat yemant komende eenen anderen Iesum predickt, den welcken wy niet ghepredickt en hebben: of [ist dat] ghy eenen anderen Gheest ontfangt, den welcken ghy niet en hebt ontfanghen: of een ander Euangelium dat ghy niet aengenomen en hebt, so verdroecht ghy [hem behoorlick.]

d Galat. 1.a.8

5

Want ick achte dat ick in gheen dinck minder gheweest en hebbe, dan de alderopperste Apostelen.

6

Ende ist dat ick oock ^e slecht [ben] in woorden, [so ben ick] noochtans niet [slecht] in de kennisse: maer wy zijn gantschelick onder v in allen openbaer gheweest.

e Of, ongheleert

7

Hebbe ick ghesondicht, dat ick my seluen vernedert hebbe, om dat ghy soudt verhoocht worden, [ende] dat ick v het Euangelium Gods ^f voor niet ghepredickt hebbe?

f 1.Corint. 9.b.12

8

Ick hebbe andere Ghemeynten berooft, loon van hen nemende om v te prediken.

9

Ende als ick by v was, ende ghebreck hadde, ^{g h} was ick niemanden lastich, ⁱ want dat my gebrack, dat veruulden my de broeders, die van Macedonia quamen, ende ick hebbe my in allen, v onbeswaerlick ghehouden, ende sal [my oock also voortaen] houden.

g Actuum 20.d.33 1.Thess. 2.a.9 2.Thess. 3.a.8 2.Corinth. 12.b.13

h Oft, wert ick niet luy met yemants schaden.

i Philip. 4.b.15

B.10

De waerheyt Christi is in my, dat desen roem niet en sal van my gheweert worden in de palen Achaie.

11

Waeromme? om dat ick v niet lief en hebbe? God weet het.

12

Maer dat ick doe, dat sal ick oock doen, om de oorsake te benemen den ghenen die oorsake ^k soecken, om in het ghene daer sy van roemen, beuonden te worden ghelijck wy.

k Griecx, willen,

13

Want sulcke valsche Apostelen [zijn] bedrieghelicke arbeyders, hen veranderende in Apostelen Christi.

14

Ende het en is gheen wonder: want de Satan selue wort in eenen Engel des lichts verandert.

15

So en is dan ^l gheen wonder dat oock syne Dienaers verandert worden, als Dienaers der gherechticheyt, der welcker eynde sal wesen na hare wercken.

l Griecx, niet groots

16

Wederom segghe ick, niemant en achte my onwijs te zijn, of anders so neemt my oock aen als eenen onwijsen, op dat ick oock een weynich roeme.

17

Dat ick segge, en segghe ick niet na den Heere: maer als in onwijsheyt in dese stoute beroeminghe.

18

^m De wijle vele roemen na den vleessche, so sal ick oock roemen.

m Iob 29.a.2

19

Want ghy verdraecht gheerne de onwijse, de wijle ghy wijs zijt.

C.20

Want ghy verdraecht, ist dat v yemant dienstbaer maect, ist dat [v] yemant afteert, ist dat ye-

[fol. 70r]

mant [van v] neemt, ist dat [hem] yemant verheft, ist dat v yemant in het aensichte slaet.

21

Ick spreke na der oneeren: als of wy kranck gheweest hadden: ⁿ Maer waer in yemant wil stout zijn (ick spreke in onwijsheydt) daer in wil ick oock stout zijn.

n Actuum 22.a.3

22

Sijn sy Hebreen? ^o ick oock: Sijn sy Israeliten? ick oock: Sijn sy Abrahams zaet? ick oock:

o Philip. 3.a.4

23

Sijn sy Dienaers Christi? (ick spreke onwijsselick) ^p ick [ben] meer: ^q in arbeyt oueruloedelicker: in slaghen wtnemelicker: in gheuanckenissen oueruloedelicker: in de doot menichmael.

p 1.Corin. 15.b.10 2.Corint.12.b.11

q Actuum 9.b.16 ende 21.b.11 2.Corint. 6.a.4

24

Van de Ioden hebbe ick vijf mael ^r veertich [slaghen] eenen min ontfanghen.

r Deuter. 25.a.3

25

^s Drymael ben ick met roeden ghegheesselt gheweest, ^t eens ghesteenicht, ^u drymael hebbe ick schipbreuke gheleden, nacht ende dach hebbe ick in de diepte gheweest.

s Actuum 16.c.22

t Actuum 14.b.18

u Act. 27.a.2.e.41

26

Int reysen [hebbe ick] menichmael [gheweest,] in perijckelen van waterstroomen, in perijckelen van moorders, in perijckelen van [mijn] gheslachte, in perijckelen van de Heydenen: in perijckelen in der stadt, in perijckelen inder woestijne, in perijckelen inder Zee, in perijckelen onder de valsche broeders.

27

In arbeyt ende vermoetheyt, in waken menichmael, in hongher ende dorst, in vasten menichmael, in koude ende naecktheyt.

28

Beneuen het ghene dat van buyten [aencoemt, dringt my] dat my daghelicks ouerualt: [namelick] ^x de sorghe aller Ghemeynten.

x Actuum 20.b.18

29

^y Wie wort ghekranct, dat ick niet ghekranct en worde? wie worter gheerghert, dat ick niet en brande?

y 1.Corint. 8.b.13

D.30

Ist datmen roemen moet, so sal ick roemen in myne kranckheyt.

31

^z De God ende Vader onses Heeren Iesu Christi, de welcke te prijsen is inder eewicheyt, weet dat ick niet en lieghe.

z Roman. 1.a.9 ende 9.a.1 2.Corinth. 1.c.23 Galat. 1.c.20 Philip. 1.a.8 1.Thess. 2.a.5

32

^a De Stadthouder in Damasco des Konincx Aretas, bewaerde de stadt Damascum, ende wilde my vanghen:

a Actuum 9.c.24

33

Ende ick wert door een venster in eenen korf door den muer neder ghelaten, ende ontuloodt synen handen.