Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

1. Hy verhaelt syne ghesichten, 11. seyt de oorsake van sulcke beroeminghe, 14. betuyghende syne beweghinge tot hen, ende beloeft zijn koemste.

A.1

HEt roemen en is my voorwaer niet profijtelick: want ick en sal komen tot de ghesichten ende openbaringhen des Heeren.

2

^a Ick weet eenen man in Christo ouer veerthien Iaren, (of inden lichame, dat en weet ick niet: of buyten den lichame, dat en weet ick niet: God weet het) dese wert tot den derden Hemel opghenomen.

a Actu. 9.a.3.b.17 1.Corinth. 15.a.8

3

Ende ick weet sodanighen mensche, (of in den lichame, dat en weet ick niet, of buyten den lichame, dat en weet ick niet: God weet het,)

4

Dat hy opghenomen is gheweest in het Paradijs, ende gehoort heeft onwtsprekelicke woorden, die een mensche niet spreken en mach.

5

Van sulcken [ mensche ] sal ick roemen, van my seluen en sal ick niet roemen, ten zy in myne kranckheden.

6

Want ist dat ick roemen wil, so en sal ick niet onwijs zijn, want ick sal de waerheyt segghen: maer ick houde af, op dat niemant van my hooger en dencke, dan hy my siet, of wt my hoort.

7

Ende op dat ick door de wtnemende openbaringen my niet en soude verheffen bouen maten: so is my ghegheuen een ^b spruyte in het vleesch, de Enghel Satan, ^c dat hy my met vuysten slaen soude, om dat ick my niet en soude hooghe verheffen.

b Of, staeck, ofte, prickel

c Iob 2.a.6

8

Hierom hebbe ick den Heere drymael ghebeden, op dat hy soude van my wijcken.

9

Ende hy seyde my: Mijn ghenade is dy ghenoechsaem, want mijn macht wort in kranckheyt volbracht. So wil ick dan alderliefst in myne kranckheden roemen, op dat de macht Christi in my woone.

B.10

Daerom hebbe ick een behaghen in kranckheden, in versmaetheden, in nooden, in veruolghinghen, in benautheden om Christi wille: want als ick kranck ben, dan ben ick sterck.

11

Ick ben onwijs gheworden met roemen, ghy hebt my [daer toe] bedwonghen: want ick behoorde van v ghepresen te worden: ^d want ick en hebbe in gheen dinck minder geweest dan de aldermeeste Apostelen, hoe wel ick niet en ben.

d 1.Corint. 15.b.10

12

^e De teeckenen eens Apostels zijn onder v ghedaen in alle lijdsaemheyt, in teeckenen ende wonderheden, ende krachten.

e 1.Corinth. 9.a.2.

13

Want wat ist daer ghy minder in gheweest zijt, dan de andere Ghemeynten: ^f anders dan dat ick ^g v niet beswaert en hebbe? vergheeft my dit onghelijck.

f 1.Corint. 9.b.12 2.Corint. 11.a.9.

g Of, niet luy geworden ben met uwer schade.

14

Siet, ick ben ten derdemael bereydt tot v te komen, ende en sal v niet beswaren: ^h Want ick en soecke niet dat uwe is, maer v. Want de kinderen en moeten niet den ouderen schatten vergaderen, maer de ouders den kinderen.

h Actuum 20.d.33

15

Ick wil seer gheerne gheuen, ende ghegeuen worden voor uwe zielen: hoewel ick v seer lief hebbe, ende ghy my min lief hebt.

16

Maer het zy also, ick selue en hebbe v niet beswaert, maer dewijle ick listich was, hebbe ick v bedrieghelick ghenomen.

17

Hebbe ick v gierichlick yet afghenomen door yemant dien ick tot v ghesonden hebbe?

18

Ick hebbe Titum ghebeden, ende eenen broeder mede ghesonden: heeft v Titus yet ghierichlick af ghenomen? en hebben wy niet in eenen gheest gewandelt? ende in de selue voetstappen?

19

Denct ghy, dat wy ons wederom ontschuldighen? wy spreken voor God in Christo: ende dit alles, lieue, tot uwer stichtinghe.

C.20

Want ich vreese, dat ick, als ick komen sal, eenichsins v niet en sal vinden sodanich als ick wil: ende dat ick van v sodanich sal beuonden worden als ghy niet en wilt: ⁱ dat daer niet eenichsins [zy] twist, nijdt, toorn, kijuinghen, achterklappinghen, oorblasinghen, opgheblasentheden, oproeringhen.

i Galat. 5.b.15

21

Dat my mijn God niet wederom en vernedere by v, als ick kome: ende sal moeten rouwe hebben ouer vele die te voren ghesondicht hebben, ende gheen berou ghehadt en hebben, van de onreynicheyt ende hoererie, ende ^k onghemaniertheyt die sy ghedaen hebben.

k Of, dertelheyt, die sy bedreuen etc.