Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

3. Hy gheeft reden waerom hy hen Titum ghesonden heeft, 5. ende vermaentse door stercke redenen om aelmoessen te doen, 8. bewysende de groote vrucht die daer van koemt.

A.1

VVant ^a van de bedieninghe die den Heylighen gheschiet, soude ick te vergeefs tot v schrijuen.

a Actuum 11.c.29 Roman. 15.c.26 1.Corinth. 16.a.2 2.Corinth. 8.a.4

2

Want ick weet uwe bereydde goetwillicheyt, om de welcke ick van v roeme by de Macedonische, [namelic,] dat Achaia van ouer een Iaer bereyt is: ende dese vyericheyt van v, heefter vele verwect.

3

Maer ick hebbe de broeders ghesonden, om dat onse roem van v, niet ijdel worden en soude in desen deele, om dat ghy soudt beryet zijn, gelijck ick gheseyt hebbe.

4

Op dat so de Macedonische met my quamen, ende v onbereydt vonden, wy (wy en willen niet segghen ghy) niet beschaemt en worden in dese stantuasticheyt der beroeminghe.

5

Ick hebbe het dan voor nootsakelick gheacht, de broeders te vermanen, dat sy souden voor gaen tot v, ende uwen beloefden ^b seghen voorbereyden, op dat hy bereyt zy, also [dat het zy] als segheninghe, ende niet als afdrenghinghe.

b Dat is, weldaet

6

Maer dit [segghe ick:] ^c Wie sparichlick saeyt, die sal oock sparichlick maeyen: ende wie ^d mildelick saeyt, die sal oock mildelick maeyen.

c Prouer. 11.c.24 Galat. 6.a.7

d Griecx, in segeninghen,

7

Een yeghelick [gheue] gelijck hy in zijn herte voorneemt, ^e niet wt swaermoedicheyt, of wt bedwanghe. ^f Want God heeft den blijmoedighen gheuer lief.

e Deuter. 15.a.7 Roman. 12.a.8

f Exodi 25.a.2 ende 35.a.5 Syrach 35.a.8

8

Ende God kan maken dat alle ghenade oueruloedich zy ouer v, op dat ghy in alle dinghen alle tijt alle ghenoechsaemheyt hebbende, tot allen goeden wercke oueruloedich wesen moecht:

9

(Ghelijck gheschreuen is: ^g Hy heeft wtghestroyt, ende den armen ghegheuen: zijn ^h goetdadicheyt duert inder eewicheyt.

g Psalm. 112.a.9

h Griecx, gherechticheyt

B.10

Ende die den saeyer het zaet geeft, [die] gheue [v] oock broot ter spijse, ende vermenichfuldighe uwe zaet, ende vermeerdere de vruchten uwer goetdadicheyt:)

11

In allen rijck gheworden tot alle goetdadicheyt, de welcke door ons maeckt dat God ghedanct wort.

12

Want de bedieninghe deser offerhande, voldoet niet alleenlick het ghebreck der Heylighen:

[fol. 69v]

maer maect oock oueruloedelick dat God door velen ghedanckt worde.

13

(Die door de beproeuinge deses diensts, God prijsen ouer uwe eenuoudige onderdanicheyt in het Euangelium Christi, ende [ouer] de milde mededeelinghe aen hen, ende aen allen:)

14

Ende dat sy voor v bidden, begheerende v, om de oueruloedighe ghenade Gods ouer v.

15

Gode [zy] danck voor syne onwtsprekelicke gaue.