Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

1. Hy verwecktse tot mildicheyt ende om ghewillighe aelmoessen te doen, 6. prijsende haer goet behagen, 16. daer na recommandeert hy Titum ende de andere die met hem ghesonden waren.

A.1

VOort gheuen wy v te kennen broeders, van de ghenade Gods ghegeuen in de Ghemeynten van Macedonia:

2

[Namelick,] dat in grooter beproeuinghe der versoeckinghe hare blijschap oueruloedich gheweest is: ende [dat] hare diepe armoede oueruloedich gheweest is tot eenen rijckdom haerder goetdadicheyt.

3

Want sy na hare macht (dat betuyghe ick) Ia bouen hare macht milde [gheweest zijn.]

4

^a Ons met veel vermanens biddende, dat wy de ^b weldaet ende de ghemeynschap der bedieninghe, die den Heylighen [gheschiet,] aennemen souden.

a Actuum 11.c.29 Roman. 15.c.26 1.Corinth. 16.a.2 2.Corint. 9.a.1

b Griecx, ghenade

5

Ende [deden] niet ghelijck wy hoepten, maer sy gauen henseluen eerst den Heere, ende [daer na] ons door den wille Gods:

6

Om dat wy Titum vermanen souden, dat hy ghelijck hy te voren begonnen hadde, also oock soude by v oock dese ^c weldaet voleynden.

c Griecx, ghenade

7

So dan, ghelijck ghy in allen oueruloedich zijt int ghelooue, ende woort, ende kennisse, ende alle neersticheyt, ende liefde tot ons, [siet] dat ghy oock in dese ^d weldaet oueruloedich zijt.

d Griecx, ghenade

8

Dit en segghe ick niet ^e als ghebiedende: maer door der anderen neersticheyt oock uwer liefden goeden aert beproeuende.

e Griecx, na den ghebode:

9

Want ghy weet de ghenade onses Heeren Iesu Christi, dat hy die rijck was, om uwent wille arm gheworden is, om dat ghy door syne armoede soudt rijcke worden.

B.10

Ende ick gheue hier in raet, want dit is v oorbaerlick, die ghy te voren dat hebt begonnen, niet alleene te doene, maer oock te willen van ouer een Iaer.

11

So voleyndt nu oock het doen, op dat gelijck de goetwillicheyt bereydt [was] om te willen, also oock het volbrenghen [zy] ^* van het ghene dat ghy hebt.

* Griecx, wt het hebben

12

^f Want ist dat de bereydde goetwilicheyt voor gaet, ^g so ismen aenghenaem na datmen heeft, niet na datmen niet en heeft.

f Marci 12.b.12 Luce 21.a.3

g 1.Petri 4.b.10 Prouerb. 3.c.28

13

Want [het en gheschiet] niet om dat een ander soude verlichtinghe hebben, ende ghy verdruckinghe:

14

Maer [op dat] wt ghelijcker bedeelinghe, in desen teghenwoordighen tijde, uwe oueruloet haren ghebreke [te hulpe kome] op dat oock hare oueruloet uwen ghebreke te hulpe kome: also sal ghelijcke bedeelinghe worden.

15

Ghelijck gheschreuen is: ^h Die vele [hadde, dien] schoot niet ouer, ende die luttel [hadde, die] hadde niet min.

h Exodi 16.b.18

16

Ende Gode zy lof, die dese neersticheyt voor v, Tito in het herte ghegheuen heeft,

17

Dat hy de vermaninghe aengenomen heeft: Ia hy neerstich zijnde, van selfs ghewillich tot v ghekomen is.

18

Wy hebben oock met hem ghesonden den broeder die ghepresen is inden Euangelio van alle de Ghemeynten:

19

(Ende dat niet alleenlick, maer is oock van de Ghemeynten verkoren om met ons te reysen met deser ⁱ weldaedt, die van ons bedient wort tot des Heeren prijs, ende uwe bereydde goetwillicheyt.)

i Griecx, ghenade

C.20

Toesiende dat ^k† ons niemant ^l en berispe in dese oueruloedicheyt die van ons bedient wort.

k† Anders v

l Of, lastere

21

^m Want wy besorghen het ghene dat eerlick is, niet alleene voor God, maer oock voor den mensche.

m Roman. 12.b.17

22

Wy hebben oock met hen ghesonden onsen broeder, den welcken wy in vele dinghen dickmael beuonden hebben dat hy neerstich is: ende nu veel neerstigher door het groot vertrouwen op v.

23

Het zy dan Titus, [hy is] onse medegheselle, ende medehulper aen v: het zy dese onse broeders, [sy zijn] ⁿ Apostelen der Ghemeynten, [ende de] eere Christi.

n Dat is, gesonden boden

24

Bewijst dan aen hen, ende aen het aenschijn der Ghemeynten, de bewijsinghe uwer liefden, ende onses roems van v.