Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hy vermaendtse tot een leuen dat Christo weerdich is, door zijn exempel vermanende dat sy hen so wel aen het lichaem als aen de ziele wachten van alle beuleckinghe.

A.1

ENde wy oock [als] ^a medewerckers ^b bidden v, ^c hebt de genade Gods niet te vergheefs ontfanghen.

a 1.Corinth. 3.a.9

b Of, vermanen

c Hebr. 12.b.15

2

Want hy seydt: ^d In aenghenamen tijt hebbe ick dy verhoort, ende ten daghe der salicheyt ben ick dy te hulpe gekomen. Siet, nu is de aenghename tijt, siet, nu is den dach der salicheydt.

d Esaie. 49.a.8

3

^{e f} Wy en gheuen gheenderhande erghernisse in eenich dinck, op dat de bedieninghe ^g niet ghelastert en worde:

e 2.Macha. 6.b.18 Roman. 14.b.13 1.Corinth. 10.d.32

f Ofte, laet ons niet gheuen eenigher hande, etcet.

g Ofte, berispt

4

Maer bewijsen onsseluen in allen, ^h als Dienaers Gods met ⁱ groote lijdsaemheydt, in verdruckinghen, in noot, in benautheden:

h 1.Corinth. 4.a.1

i 2.Corinth. 11.c.23

5

In slaghen, in gheuanckenissen, in ^k oproeren, in arbeyt, met waken, met vasten.

k Of, verloopinghen,

6

Met reynicheyt, met wetenschap, met lanckmoedicheyt, met vriendelickheyt, met den heylighen Gheest, met ongheueynsder liefde:

7

Met den woorde der waerheyt, met de kracht Gods, door de wapenen der rechtueerdicheydt ter rechter ende ter slincker hant:

8

Door eere ende oneere: door lasteringhe ende prijs: als verleyders, ende [nochtans] warachtich:

9

Als onbekende, ende [nochtans] bekendt: ^l als die steruen, ende siet, wy leuen: als die ghestraft worden, ende niet ghedoot:

l Esaie 26.b.19

B.10

Als droeuich zijnde, nochtans altijts vrolick: als arme, nochtans vele rijcke makende: als niet hebbende, ende [nochtans] alle dinck besittende.

11

Onse mont is gheopent tot v O Corinthen, onse herte is verbreyt.

12

Ghy en wort niet benaut in ons, maer ghy zijt nauwe in uwen ^m ghemoede.

m Of, herte Griecx, binnenste leden.

13

De selue vergheldinghe [begheere ick van v,] ick spreke als tot myne kinderen, verbreyt v ghy oock.

14

ⁿ Treckt gheen ander Iock aen, met de ongheloouighe: ^o want wat mededeel [heeft] de gherechticheydt met ongherechticheydt? Ende wat ghemeynschap [heeft] het licht met der duysternisse?

n Deuter. 7.a.2 1.Corinth. 5.a.8

o Syr. 13.b.19.c.20

15

Ende wat eendrachticheydt [heeft] Christus met Belial? Of wat deel [heeft] de gheloouige met den ongheloouighen?

16

Ende wat schick is den Tempel Gods met Afgoden? ^p Want ghy zijt den Tempel des leuendighen Gods: ghelijck God geseyt heeft: ^q Ick sal in hen woonen, ende wandelen, ende sal haer God wesen, ende sy sullen mijn volck wesen.

p 1.Corint. 3.b.16 ende 6.b.19 Hebre. 3.a.6 1.Petri 2.a.5

q Exodi 29.e.45 Leuitici 26.b.11 Ezechie. 37.c.26

17

Daerom ^r gaet wt den midden van onder hen, ende scheyt v af seydt de Heere, ende en tast niet onreyns aen, ende ick sal v ontfanghen.

r Esaie 52.b.11 Apocal. 18.a.4

18

^s Ende ick sal v tot eenen Vader wesen, ende ghy sult my tot sonen ende dochters wesen, seyt de Heere almachtich.

s Ieremie 31.a.1