Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Hy bewijst voort de nutticheyt des cruycen. 4. hoe hy hem bereydt, 5. door wien ende tot wat eynde, 14. hy beschrijft de ghenadeChristi, ende het officie aller geloouighen.

A.1

VVant wy weten ist dat ^a dit onse Aertsche huys deses ^b Tabernakels ghebroken wordt, so hebben wy een timmeringhe van Gode, [namelick,] ^c een huys dat sonder handen ghemaeckt, ende eewich is in de Hemelen.

a 2.Corint. 4.a.7

b Dat is, sterffelicken lichaems

c Dat is, onsterffelicheyt,

2

^d Want hier ^e om suchten wy ende begheeren met onse woonste die van den Hemel is, ouerkleedt te worden:

d Roman. 8.b.19

e Griecx, in

3

^f Want wy oock ^g† bekleet, ende niet naeckt en sullen beuonden worden.

f Apocal. 3.b.18 ende 16.b.15

g† Anders, ontkleedt, en sullen niet etcet.

4

Want wy die in desen Tabernakel zijn, suchten beswaert zijnde, dewijle wy niet en willen ontkleet, maer ouergekleet worden, ^h op dat het sterffelicke van den leuen verslonden worde.

h Roman. 8.b.11 1.Corinth. 15.f.53

5

Ende die ons daer toe gemaect heeft, is God: die ons oock ⁱ den pant des Gheests ghegheuen heeft.

i Roman. 8.b.16 2.Corinth. 1.c.22 Ephe. 1.b.13 ende 4.d.30

6

So hebben wy dan alle tijt goeden moet, ende weten dat wy wt woonen van den Heere, als wy in dit lichaem inwoonen.

7

^k (Want wy wandelen door ghelooue, ende ^l niet door aenschouwen.)

k 1.Corint. 13.b.12 2.Corinth. 3.b.18

l Of, niet wesentlick.

8

Maer wy hebben goeden moet, ende hebben lieuer te verhuysen wt den lichame, ende te gaen woonen by den Heere.

9

Daerom zijn wy ouer neerstich, het zy inwoonende, het zy verhuysende, om hem te behaghen.

B.10

^m Want wy moeten alle openbaer worden voor den Rechtstoel Christi, ⁿ op dat een yeghelick behale het ghene dat door het lichaem [gheschiet] na dat hy ghedaen heeft, het zy goet, het zy quaet.

m Matth. 25.d.32 Roman. 14.b.10

n Psalm. 62.b.13 Ierem. 17.b.19 ende 32.b.10 Matthei 16.c.27 Roman. 2.a.6 ende 14.b.12 1.Corinth. 3.a.8 Galat. 6.a.5 Apocal. 2.c.23 ende 22.b.12

11

Wy dan wetende die vreese des Heeren, beweghen de menschen, maer Gode zijn wy ^o bekent, ende hopen oock in uwe consciencien bekent te zijn.

o Griecx, gheopenbaert,

12

^p Want wy prijsen onsseluen niet wederom voor v, maer wy gheuen v oorsake, om van ons te roemen, om dat ghy [wat] soudt hebben teghen de gene die wt het aenschijn roemen, ende niet in het herte.

p 2.Corinth. 3.a.1 ende 10.a.8

13

Want zijn wy wtsinnich, [so zijn wijt] Gode: zijn wy wel ghesint, [so zijn wijt] v.

14

Want de liefde Christi bedwingt ons, als die wy dit ^q gheuoelen: Ist dat een voor allen ghestoruen is, so zijn sy alle ghestoruen:

q Griecx, oordeelen,

15

Ende hy is voor allen ghestoruen, ^r op dat sy die leuen niet meer henseluen leuen, maer

r Roman. 14.a.7 Galat. 2.c.20 1.Thess. 1.5.b.10 1.Petri 4.a.2

[fol. 68v]

den ghenen die voor hen ghestoruen ende weder opghestaen is.

16

^s So dan, wy kennen voortaen niemant na den vleesche. Ende ist dat wy oock Christum na den vleesche ghekent hebben, so en kennen wy hem nu niet meer.

s Matthei 12.f.50 Ioannis 15.b.14 Galat. 5.a.6 ende 6.b.15 Coloss. 3.b.11

17

So dan yemandt in Christo is, [die is] een nieuwe creatuere. ^t Het oude is voorby gegaen, siet, het is al nieu gheworden.

t Esaie 43.b.19 Apocal. 21.a.5

18

Ende alle dinc is wt Gode ^u die ons met hem seluen versoent heeft door Iesum Christum: ende heeft ons de bedieninghe der versoeninghe ghegheuen:

u Coloss. 1.c.20 1.Ioannis 2.a.2 ende 4.b.19

19

^x Want God was in Christo, de wereldt met hemseluen versoenende, hen hare sonde niet toe rekenende: ende heeft het woort der versoeninge ^y in ons ^z ghegheuen.

x Coloss. 2.a.9 Roman. 3.c.24.25

y Of, onder ons

z Griecx, gheset.

C.20

So zijn wy dan ^a bootschappers wt Christi name, als of God [v] door ons bade, [so] bidden wy wt Christi name, laet v met Gode versoenen:

a 2.Corinth. 3.a.6

21

^b Want hem die gheen sonde ghekendt en heeft, heeft hy ^c voor ons sonde ghemaeckt, om dat wy in hem souden rechtueerdicheydt Gods worden.

b Esaie 53.a.9 1.Petri 2.c.22 1.Ioannis 5.a.5

c Esaie 53.b.12 Rom. 8.a.4 Gala. 3.b.13