Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Hy bewijst zijn trouwicheydt in synen dienst, 7. ende het cruyce datmen achtede tot synen achterdeele, dat went hy tot synen voordeele, 17. bewijsende de vrucht daer van.

A.1

DAerom dewijle wy dese bedieninghe hebben, na de barmherticheydt die ons gheschiet is, so worden wy niet traghe:

2

Maer verwerpen de ^a bedeckingen der schande, ^b niet met schalckheyt ommegaende, noch het woort Gods verualschende: maer met de ^c openbaringhe der waerheyt onsseluen ^d bekent makende by aller menschen consciencie in de oogen Gods.

a Griecx, het verborgen der schande

b 2.Corint. 2.b.17

c Of, verklaringe

d Of, recommenderende

3

Ende is het dat oock onse Euangelium bedeckt is, so ist bedeckt in de ghene die verloren worden.

4

In de welcke de God deser werelt ^e de sinnen verblindt heeft, [namelick,] der ongheloouigen, om dat ^f sy niet sien en souden de klaerheyt des Euangeliums der ^g eerlicheyt Christi, ^h die het beelt Gods is.

e Esaie 6.b.10 Ioannis 12.e.40

f Ofte, haer niet schijnen soude

g Of, klaerheyt

h Philip. 2.a.6 Coloss. 1.b.15 Hebr. 1.a.3

5

Want wy en prediken onsseluen niet, maer Christum Iesum den Heere: ende ons uwe Dienaren om Iesus wille.

6

Want God, ⁱ die gheseydt heeft dat het licht wt de duysternisse soude lichten, ^* die heeft in onse herten ghelicht, om te gheuen het licht der kennisse der eerlickheydt Gods in het aenschijn Iesu Christi.

i Gene. 1.a.3

* 2.Petri 1.b.19

7

Maer wy hebben desen schat in ^{k l} aerden vaten: op dat de wtnemende macht, Gods zy, ende niet wt ons:

k 2.Corinth. 5.a.1

l Griecx, schelfteren vaten:

8

Als wy allesins worden bedruckt, maer niet benaut: ^m wanckelmoedich maer niet mismoedich:

m Of, behoeftich, maer vertzagen niet.

9

Veruolcht, maer niet verlaten: te neder gheworpen, maer niet verdoruen.

B.10

De doodinghe onses Heeren Iesu Christi altijts in [onsen] lichame ⁿ omme draghende, om dat oock het leuen onses Heeren Iesu in onsen lichame soude gheopenbaert worden.

n Galat. 6.b.17

11

^o Want wy die leuen, worden alle tijt ter doot ouerghegheuen, om Iesus wille: ^p om dat oock het leuen Iesu soude in onsen sterffelicken vleesche gheopenbaert worden.

o Psalm. 44.c.23 Matthei 5.b.11 Roman. 8.d.36 1.Corinth. 4.a.9 Coloss. 3.a.3

p 1.Corin. 15.e.49 Coloss. 3.a.3

12

So dan, de doot werckt in ons, ende het leuen in v.

13

Ende dewijle wy den seluen Gheest des geloofs hebben, ghelijck geschreuen is: ^q Ick hebbe ghelooft, ende daerom hebbe ick ghesproken: so gheloouen wy oock, daerom wy oock spreken:

q Psalm. 116.b.10

14

Wetende, ^r dat hy die den Heere Iesum opgeweckt heeft, ons oock opwecken sal door Iesum, ende met v daer setten.

r Roman. 6.a.5 ende 8.b.11 1.Corinth. 6.b.14

15

Het gheschiet al om uwent wille, ^s op dat de oueruloedighe ghenade, door veler dancksegginghe, oueruloedich zy ter eerlickheyt Gods.

s 2.Corinth. 1.b.11

16

Daerom ^t verflouwen wy niet: maer al ist dat onse wterlicke mensche verderft, so wordt nochtans [onse] innerlicke [mensche] vernieut van daghe te daghe.

t Of, vertraghen

17

^u Want onse seer lichtelicke vergaende verdruckinghe, werckt in ons een bouen maten onbegrijpelicke grootte der eewiger eerlicheyt:

u Sapient. 3.a.5 Psalm. 30.a.6 Matthei 5.b.12 Roman. 8.b.18 1.Ioannis 3.a.2

18

Dewijle wy niet en sien op het sienlicke, maer op het onsienlicke: want wat sienlick is, dat is tijtlick: maer wat onsienlick is, dat is eewich.