Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Hy prijst de kracht syner predikinghe teghen de lasteringhe der valscher Apostelen, 6. ende het Euangelium verghelijckende met de Wet, vermeerdert de weerdicheyt zijns ampts.

A.1

BEghinnen ^a wy onsseluen wederom te prijsen? behoeuen wy, ghelijck sommighe, Lofbrieuen aen v, of Lofbrieuen van v?

a 2.Corint. 5.b.12 ende 10.a.8

2

Ghy zijt onsen brief, in onser herten geschreuen, die ^b bekendt ende ghelesen wordt van alle menschen.

b Of, verstaen

3

Dewijle het openbaer gheworden is, dat ghy den brief Christi zijt, door ons bedient, gheschreuen niet ^c met inckt, maer met den Gheest des leuendighen Gods, ^d niet in steenen tafelen, maer in ^e vleeschelicke tafelen des herten.

c Griecx, in

d Exodi 42.b.12 ende 34.a.1

e Ieremie 31.d.33 Ezechie.11.b.19 ende 36.c.26 Hebr. 8.b.10

4

Sulck een vertrouwen hebben wy door Christum by God:

5

Niet dat wy van onsseluen bequaem zijn yet te dencken, als wt onsseluen: ^f maer dese onse bequaemheyt is wt Gode:

f Philip. 2.b.15

6

Die ons oock bequame ^g Dienaers des ^h Niewen ⁱ Testaments ghemaeckt heeft: niet der letter, maer des Geests. Want de letter doot, maer de Gheest maeckt leuendich.

g 2.Corint. 5.c.20

h Heb. 8.a.6

i Oft, Uerbonts

7

Ist dat de bedieninghe des doots met letteren ^k in steenen ghedruckt, in ^l klaerheyt geweest is, ^m so dat de kinderen Israel Mosis aensicht niet en konden aensien, door zijns aenschijns klaerheyt, de welcke verganckelick was:

k Exodi 24.b.12 ende 34.a.1 Deut.10.a.1

l Oft, eerlicheydt

m Exodi 34.d.30

8

Hoe sal niet meer de bedieninge des Gheests in klaerheyt wesen?

9

Want ist dat de bedieninghe der verdoemenisse klaerheydt [was,] veel meer is de bedieninghe der rechtueerdicheydt oueruloedich in klaerheydt.

B.10

Want dat verklaerde, was oock niet verklaert in desen deele, [namelick,] so veel dese wtnemende klaerheyt aengaet.

11

Want ist dat het ghene dat verganckelick

[fol. 68r]

was, in klaerheyt was, veel meer is het gene dat blijft, in klaerheyt.

12

Dewijle wy dan sodanighe hope hebben, so ghebruycken wy groote vrijmoedicheyt.

13

Ende [zijn] niet gelijck ⁿ Moses [was, die] een decksel op zijn aensichte leyde, om dat de kinderen Israels niet en souden aensien, ^o tot het eynde des ghenen, dat vergaet.

n Exodi 34.d.33

o Roman. 10.a.4

14

^p Maer hare sinnen zijn verhardt geworden: want tot op den huydighen dach blijft dat selue decksel in het lesen des ouden Testaments sonder ontdecken, het welcke ^q door Christum wort te niete ghemaeckt.

p Esaie 6.b.10 Ezechielis 12.a.2 Sapient. 2.c.21 Matthei 13.b.11 Actuum 28.c.26 Roman. 11.a.8

q Griecx, in

15

Maer tot op desen dach, als Moses gelesen wort, leyt dat decksel op haer herte.

16

^r Maer als [dat herte] sal bekeert zijn tot den Heere, dan sal dat decksel wechghenomen worden.

r Matthei 13.b.11 Roman. 11.c.22 1.Corint. 2.b.10

17

^s De Heere is die Gheest: ende waer de Gheest des Heeren is, daer is vrijheyt.

s Ioannis 4.c.24

18

^t Ende wy alle met onbedeckten aensichte de ^u klaerheyt des Heeren als in eenen spiegel aenschouwende, worden ^x na het selue beelt verandert, van klaerheydt tot klaerheyt als van des Heeren Gheest.

t 1.Corint. 13.b.12. 2.Corinth. 5.a.7

u Oft, eerlicheydt

x Of, in