Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy gaet voort, bewijs geuende van zijn vertoeuen, 4. bewijst zijn liefde tot hen, 7. ende begeert hare liefde aen den boetueerdighen sondaer, 14. ende hy loeft God door de kracht syner leere, om dat sy die souden begheeren, 17. ende wederleyt syne lasteraers.

A.1

MAer ick hebbe dit voor my genomen, dat ick niet wederom in droefheydt tot v komen soude.

2

Want ist dat ick v bedroeue, wie isser dan die my vrolick maeckt, ten zy de ghene die van my bedroeft is?

3

Ende ick hebbe v dat selfste gheschreuen, om dat ick gheen droefheyt hebben en soude van de ghene daer ick my moeste van verblijden, vertrouwende van v allen dat mijn blijschap uwer aller blijschap zy.

4

Want ick hebbe v wt grooten drucke ende benautheyt des herten gheschreuen met vele tranen, niet om dat ghy soudt bedroeft worden, maer om dat ghy mijn liefde weten soudt, die ick seer oueruloedelick tot v ^a draghe.

a Griecx, hebbe.

5

Ist dat yemant droefheyt aengebracht heeft, die en heeft my gheen droefheyt aenghebracht, maer eensdeels, (op dat ick [hem] niet en versware) v allen.

6

^b Het is den sulcken ghenoech, dat hy van velen ghestraft is:

b 1.Corinth.5.a.3

7

So dat ghy daer teghen meer [moet] vergheuen, ende vertroosten: op dat de sulcke in oueruloedigher droefheydt niet eenichsins en vergae.

8

Daerom bidde ick v, dat ghy de liefde aen hem beuesticht.

9

Want hier toe hebbe ick oock geschreuen, om dat ick uwer ^c beproeuinghe weten soude, [namelick,] of ghy tot alle dinghen ghehoorsaem zijt.

c Of, v beproefde

B.10

Dien ghy wat vergheeft, [dien vergheue] ick oock; want ist dat ick oock yet vergheuen hebbe, dien ick vergheuen hebbe [hebbe ick vergeuen] om uwent wille, in ^d het aenschijn Christi,

d Of, de persoon

11

Op dat wy van den Duyuel niet ^e bedroghen worden, want syne ghedachten en zijn ons niet onbekent.

e Griecx, vergiericht

12

Voort als ick te ^f Troas quam in het Euangelium Christi, ende my daer een deure in den Heere gheopent was,

f Actu. 16.a.8.9

13

So was ick niet gherust van gheeste, om dat ick Titum mynen broeder niet en vandt: maer nam oorlof aen hen, ende reysde na Macedoniam.

14

Ende Gode zy ^g lof die alle tijdt ^h door ons triumpheert in Christo ⁱ ende den reuck syner kennissen te aller plaetsen door ons openbaert.

g Griecx, genade

h Ofte, ons doet triumpheren, Griecx, triumpheert ons,

i Coloss. 1.c.27

15

Want wy zijn Gode de ^k goede reucke Christi in de ghene die salich worden, ende in de ghene die verloren gaen:

k Griecx, welriekenheyt

16

^l Den desen een reucke des doots ter doot, ende den ghenen een reucke des leuens ten leuen. Ende wie is hier toe bequaem?

l Luce 2.d.34

17

Want wy en zijn niet ghelijck vele, het woort Gods ^m verualschende: maer wy spreken ⁿ van Christo, als wt oprechticheydt, als wt Gode in de teghenwoordicheyt Gods.

m Of, om eyghen ghewin leerende,

n Griecx, in