Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Hy vermaentse van de versamelinghe der aelmoessen, 13. van de volstandicheyt int ghelooue, ende de liefde Christi, ende des naesten, 15. ende na sommige groetenissen ende recommendacien, wenscht hy hen alle goet.

A.1

VOort ^a van de versamelinghe die den Heylighen, ⁺ [gheschiedt,] ghelijck ick den Ghemeynten in Galatia beuolen hebbe, doet ghy oock also.

a Roman. 12.b.13

+ Versamelinge om de arme Heylighen.

2

^b Op elcken ^c eersten dach der weke, een yeghelick van v by hemseluen legghe wech, [als] eenen schat vergaderende, na dat hy gheluckich geworden is: op dat niet, als ick kome, dan eerst de versamelinghen gheschieden.

b Actuum 11.c.29 2.Corinth. 8.a.4 ende 9.a.1

c Dat is, Sondach,

3

Ende als ick daer sal ghekomen zijn, so wie ghy met Sendbrieuen bewillicht, die selue sal ick senden om uwe ^d weldaet te Ierusalem ouer te draghen.

d Griecx, genade

4

Ende ist dat het weert is, dat ick oock reyse, so sullen sy met my reysen.

5

^e Ick sal tot v komen, als ick Macedoniam sal door ghegaen hebben: want ick sal door Macedoniam gaen.

e 2.Corinth. 1.b.15

6

Maer by v sal ick moghelick blijuen, of oock ouerwinteren, op dat ghy my moecht geleyden waer ick henen reyse.

7

Want ick wil v nu ^f int doorgaen niet sien, maer ick hope eenen tijt [lanck] by v te blijuen, ist dat het de Heere toelaet.

f Griecx, in voorbygange, of, doorganghe

8

Maer ick sal te Ephesen blijuen tot de ^g vijftichsten [dach.]

g Of, Pingxsten.

9

Want my is een groote ende krachtige deure gheopent, ende [daer zijn] vele wederpartien.

B.10

Ist dat Timotheus koemt, siet dat hy onbeureest by v zy: want hy werckt het werck des Heeren, oock ghelijck ick.

11

Niemant dan en verachte hem: maer gheleydt hem in vrede, op dat hy tot my kome: want ick verwachte hem met de broederen.

12

Ende aengaende den broeder ^h Apollos, ick hebbe hem seer vermaent, dat hy met de broederen tot v komen soude, ende het en was gheensins synen wille, dat hy nu soude komen: maer hy sal komen wanneer het hem sal wel gheleghen wesen.

h Actuum 18.c.24 1.Corinth. 1.b.12

13

Waeckt, staet in het ghelooue, houdt v als mannen, weest sterck.

14

Doet alle uwe dinghen inder liefde.

15

Ende ick bidde v broeders: ghy weet dat het huys ⁱ Stephane, zy de eerstelingen van Achaia, ende dat sy henseluen te dienste der Heylighen gheschickt hebben.

i 1.Corint. 1.b.14

16

Dat ghy oock den sulcken onderdanich zijt, ende allen medehulpers ende arbeyders.

17

Ick ben verblijt van de toekoemst Stephane, ende Fortunati, ende Achaici, want ^k wat my aen v ghebrack, dat hebben dese veruult.

k Griecx, uwe gebreck

18

Want sy hebben mynen gheest ende uwen gheest ^l gerust ghemaeckt: bekent dan de sulcke.

l Of, vermaeckt

19

De Ghemeynten in Asia groeten v. V groeten seere in den Heere Aquila ende Priscilla, met de Ghemeynte die te haren huyse is.

C.20

V groeten alle de broeders: ^m Groet malkanderen met eeenen heylighen kusse.

m Roman, 16.b.15 2.Corinth. 13.b.12 1.Thess. 5.c.26 1.Petri 5.b.14

21

ⁿ Ick Paulus groete v met myne hant.

n Griecx, de groetinghe met mijnder hant Pauli.

22

Ist dat yemant den Heere Iesum niet lief en heeft, die zy ^o veruloeckt.

o Anathema Maramatha.

23

De ghenade des Heeren Iesu Christi zy met v.

24

Mijn liefde zy met v allen in Christo Iesu. Amen.

De eerste Sendbrief tot de Corinthen geschreuen van Philippis [ghesonden] door Stephanum ende Fortunatum, ende Achaicum, ende Timotheum.