Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

4. Hy straft de misbruycken die in hare ghemeyne vergaderinghen ghekomen waren, aengaende de maniere van bidden ende propheteren, 20. ende in het Nachtmael.

A.1

VVeest ^a myne nauolghers, ghelijck als ick Christi.

a 1.Corint. 4.b.16 Phili. 3.b.17 1.Thess. 1.a.6 2.Thess. 3.a.9

2

Ick prijse v broeders, dat ghy in allen mijns gedachtich zijt, ende houdt de insettinghen ghelijck ick v die ouerghegheuen hebbe.

3

Maer ick wil dat ghy weet ^b dat Christus is het Hooft eens yeghelicken mans: ⁺ ende het hooft der vrouwen is de man: ende het hooft Christi is God.

b Ephe. 5.c.23

+ Waerom de mannen het hooft ontdeckt, ende de vrouwen gedeckt hebben moeten.

4

Een yeghelick man die bidt oft propheteert met ghedeckten hoofde, die onteert zijn hooft:

5

Maer een yegelicke vrouwe, die bidt oft propheteert met onghedeckten hoofde, die onteert haer hooft: want het is euen so veel of sy geschoren ware.

6

Want ist dat de vrouwe niet gedect en wort, dat sy oock [ het hayr] late afsnijden, ^c maer ist dat het der vrouwen qualick staet, gekort of geschoren te zijn, dat sy haer decke.

c Deuter. 22.a.5

7

De man moet zijn hooft niet decken, ^d want hy is het beelt ende eerlickheyt Gods: maer de vrouwe is des mans eerlickheyt.

d Gene. 1.c.26.27 ende 5.a.1 ende 9.a.6 Coloss. 3.b.10

8

^e Want de man is van der vrouwe niet: maer de vrouwe van den man.

e Gene. 2.c.28

9

Want oock en is de man niet gheschapen om der vrouwen: maer de vrouwe om den man.

B.10

Hierom moet de vrouwe een ^f macht op het hooft hebben, om der ^g Enghelen wille.

f Dat is een decksel het welcke beduydt dat sy onder eens anders macht is.

g Malach. 2.a.7 Apocal. 1.c.20

11

Nochtans is noch de man sonder de vrouwe, noch de vrouwe sonder de man, in den Heere.

12

Want ghelijck de vrouwe is van den man, also is ooc de man door de vrouwe: doch alle dinck van Gode.

13

Oordeelt ghy onder v seluen, staet het wel dat de vrouwe onghedeckt zijnde, God bidt?

14

Leert ooc de natuere dat niet, dat het den manne oneerlick is onghekort hayr te hebben?

15

Ende der vrouwen eerlick is, lanck hayr te hebben? want het langhe hayr is haer voor een decksel ghegheuen.

16

^h Ist dat yemant schijnt ghenoechte te hebben in ⁱ kijuen: wy en hebben die gewoonte niet, noch de Ghemeynten Gods.

h 1.Timoth. 6.a.5

i Griecx, ouerwinnen:

17

Maer dit verkondighe ick v, ⁺ niet prijsende dat ghy niet tot verbeteringe, maer tot verergeringhe te samen koemt.

+ De Gemeynte is niet twistachtich.

18

Want ten eersten, als ghy vergadert zijt, so hoore ick, dat daer tweedracht onder v is, ende ick gheloouet eens deels.

19

^k Want daer moeten oock secten onder v zijn, ^l op dat sy die rechtsinnich zijn, onder v, openbaer worden.

k Matthei 18.a.7

l 1.Ioan. 2.b.19

C.20

Wanneer ghy dan by een te samen koemt, ⁺ so en eetmen des Heeren Auontmael niet.

+ Van den Nachtmale des Heeren.

21

Want een yeghelick neemt zijn eyghen Auontmael voor, in het eten: ende de een is hongherich, ende de ander dronckich.

22

Hebt ghy dan gheen huysen om te eten ende te drincken? Of veracht ghy de Gemeynte Gods? ende beschaemt de gene die niet en hebben? Wat sal ick v segghen? sal ick v hier in prijsen? Ick en prijse v niet.

23

Want ick hebbe van den Heere ontfanghen, het welcke ick v oock ^m gegeuen hebbe, [namelick] ⁿ dat de Heere Iesus inder nacht doe hy verraden wert, nam het broot:

m Of, gheleert

n Matth. 26.c.25 Marci 14.c.22 Luce 22.b.19

24

Ende als hy ghedanckt hadde, brack hijt, ende seyde: Neemt, eet, dit is mijn lichaem, welck voor v ghebroken wordt: doet dit tot myner gedachtenisse.

25

Desghelijcx [nam] hy oock den Drinckbeker na het Auontmael, segghende: Dese drinckbeker is het Nieuwe ^o Testament in mynen bloede, doet dit so menichmael als ghy [dien] drinct, tot myner ghedachtenisse.

o Ofte, Uerbont

26

Want so menichmael als ghy dit Broot sult eten, ende desen Drinckbeker sult drincken, ^* sult ghy den doot des Heeren verkondigen ^p tot dat hy koemt.

* Of, verkondicht ghy, etcet.

p Actuum 1.b.11

27

^q So dan, wie dit Broot eet, of desen Drincbeker des Heeren onweerdichlick drinckt, die is schuldich des lichaems ende bloets des Heeren.

q Ioannis 6.f.51 g.63.64 ende 13.c.27

28

^r De mensche proeue hemseluen, ende ete als van dien Broode, ende drincke van dien Drincbeker.

r Syrach 18.b.18 2.Corinth. 13.a.5

29

Want wie onweerdichlick eet ende drinct, die eet ende drinckt hemseluen het oordeel, niet onderscheydende het lichaem des Heeren.

D.30

Hierom [zijn] onder v vele krancke, ende onghesonde, ende vele slapen.

31

^s Want waert dat wy onsseluen ^t onderscheyden, so souden wy niet gheoordeelt worden.

s Syrach 18.d.30

t Of, Oordeelden,

32

Ende als wy ^u geoordeelt worden, so worden wy van den Heere gheleert, om dat wy niet en souden met der werelt verdoemt worden.

u Of, ghestraft

33

So dan myne broeders, als ghy te samen koemt om te eten, verbeyt malcanderen:

34

Ist dat yemant hongerich is, die ete te huys, op dat ghy niet tot oordeel te samen en koemt. Het ander sal ick ordineren als ick kome.