Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xii. Capittel.

1. Hy bewijst waer toe men alle gauen des Heeren gebruycken sal, namelick, tot stichtinghe.

A.1

VAn de gheestelicke [gauen] broeders, wil ick niet dat ghy onwetende zijt.

2

Ghy weet hoe ghy, als ghy Heydenen waert, tot de stomme Afgoden v liet verleyden, also ghy gheleydt werdt.

3

Daerom gheue ick v te kennen, ^a dat niemant door den Gheest Gods sprekende: Iesum veruloeckt: ^b ende niemant kan segghen dat Iesus de Heere is, dan door den heylighen Gheest.

a Marci 9.d.39

b Ioannis 13.b.13 1.Corinth. 8.a.6 Philip. 2.b.11

4

^c Ende daer zijn ^d verscheyden gauen: maer het is de selue Gheest.

c Roman. 12.a.6 2.Corinth. 10.b.13 1.Petri 4.b.10

d Griecx, verscheydinghen der gauen:

[fol. 65v]

5

Ende daer zijn verscheyden bedieningen, maer de selue Heere.

6

Ende daer zijn verscheyden werckinghen, ^e maer het is de selue God, diese alle in allen werckt.

e Oft, daer is een God die krachtelick werckt alle dinghen in allen.

7

Ende eenen yeghelicken wort de openbaringhe des Gheests ghegheuen tot het ghene dat oorbaerlick is.

8

Want den desen wort door den Gheest ghegheuen het woort der wijsheyt, ⁺ den anderen het woort der kennisse door den seluen Gheest:

+ Bedeylinghe der geestelicker gauen.

9

Den anderen het ghelooue door den seluen Gheest: den anderen de gauen der gesontmakinghen door den seluen Gheest.

B.10

Den anderen krachtighe werckinghen: den anderen prophecie: den anderen onderscheydinghe der gheesten: den anderen verscheyden ^f tongen: den anderen wtlegghinghe der tonghen.

f Of, talent:

11

^g Ende alle dese dinghen werckt de eenighe ende selue Gheest, ^h deelende eenen yegelicken het syne also hy wil.

g Roma. 12.a.3.6 Ephe. 4.a.6

h 1.Corint. 7.a.7 2.Corinth. 10.b.13

12

ⁱ Want ghelijck het lichaem een is, ⁺ ende vele leden heeft, ende alle de leden eens lichaems, hoewel sy vele zijn, nochtans een lichaem zijn: also oock Christus.

i Roman. 12.a.4

+ Verscheyden leden in een lichaem.

13

Want wy alle zijn in eenen Gheest tot een lichaem ghedoopt, het zy Ioden of Griecken, of dienstbare, of vrije: ende wy ^k† hebben alle eenen dranck ghedroncken tot eenen Gheest.

k† Anders, zijn alle tot eenen Gheest gedrenct.

14

Want het lichaem en is niet een lidt, maer vele [leden].

15

Of de voet seyde: Ick en ben gheen hant, so ben ick van den lichame niet: Is hy daerom van den lichame niet?

16

Ende of de oore seyde: Ick en ben de ooge niet, so ben ick vanden lichame niet: is sy daerom van den lichame niet?

17

Ware het geheel lichaem de ooge, waer [bleue] het ghehoor? Waer het geheel [lichaem] dat ghehoor, waer [bleue] de reucke?

18

Maer nu heeft God de leden gheset, een yeghelick van hen in het lichaem, ghelijck hy ghewilt heeft.

19

Waren sy alle een lidt, waer [bleue] het lichaem?

C.20

Maer nu [zijnder] wel vele leden, maer een lichaem.

21

Ende de ooghe en kan totter hant niet seggen: Ick en behoeue dy niet: of wederom het hooft tot de voeten: Ick en behoeue dy niet.

22

Maer veel meer zijn de leden des lichaems noodich, die de kranckste schijnen te wesen.

23

Ende die ons duncken de oneerlickste [leden] des lichaems te wesen, den seluen doen wy oueruloedigher eere aen: ende onse oneerlicke [leden] hebben oueruloedigher eerlickheyt.

24

Maer die in ons eerlick zijn, en behoeuens niet: maer God heeft het lichaem te samen ghetempert, ende heeft den ghebreckelicken [lede] meerder eere ghegheuen,

25

Om dat gheen tweedracht inden lichame wesen soude: maer dat de leden ghelijcke sorge voor malcanderen draghen souden.

26

Ende ist dat een lidt lijdt, ⁺ so lijden alle de leden mede: ende ist dat een lidt vereert wordt, so verblijden alle de leden mede.

+ De Gemeynte is het lichaem Christi.

27

^l Ghy zijt het lichaem Christi, ende eensdeels leden.

l Roman. 12.a.5 Ephe. 1.c.23 ende 4.b.16 ende 5.c.23 Coloss. 1.c.24

28

Ende God heeft sommighe in der Gemeynte gheset, ten eersten ^m Apostelen, ten anderen Propheten, ten derden Leeraers, daer na ⁿ krachten, daer na gauen der ghesontmakinghen, helpers, regeerders, verscheyden tonghen.

m Ephes. 4.b.12

n Of, macht wonderheden te doen,

29

Zijn sy alle Apostelen? zijn sy alle Propheten? zijn sy alle Leeraers? hebben sy alle krachten?

D.30

Hebben sy alle gauen der ghesontmakinghe? Spreken sy alle met [verscheyden] tongen? zijn sy alle wtlegghers?

31

^o Zijt ghy vyerich na de beste gauen? Ick wijse v noch ^p eenen beteren wech.

o Of, ghy zijt

p Ofte, den wech bouen maten.