Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

1.Hy verbiedt henseluen te vermenghen in de offerhanden der afgodendienaers, 9. ende de krancken in eenighe dinghen te ergheren.

A.1

VAn het ghene dat den Afgoden gheoffert wordt, ⁺ weten wy dat wy alle kennisse hebben: de kennisse ^a verhooueerdicht: maer de liefde ^b betert.

+ Van Afgoden offer.

a Griecx, blaest op:

b Griecx, sticht.

2

Ende so yemant hem laet duncken dat hy wat weet, die en heeft noch niet bekent, gelijck men behoort te kennen.

3

Maer so yemandt God lief heeft, ⁺ die is van hem ^c bekent.

+ Liefde.

c Of, gheleert.

4

^d Van het eten dan der dinghen die den afgoden gheoffert zijn, weten wy, ^e dat een Afgod niet en zy in de werelt, ^f ende dat daer gheen ander God en zy dan een.

d Roman. 14.b.14

e 1.Corin. 10.b.16

f Deuter. 4.d.39 Ephe. 4.a.6

5

Want hoe wel daer zijn die Goden genaemt worden, het zy in den Hemel, of op der Aerden, (ghelijck daer vele goden ende vele heeren zijn:)

6

^g So hebben wy nochtans eenen God, [namelick] dien Vader, ^h wt welcken alle dinghen [zijn] ende wy in hem: ⁱ ende eenen Heere Iesum Christum, door wien alle dinghen [zijn,] ende wy door hem.

g Malachie 2.b.10 Ephe. 4.a.6

h Roman. 11.d.35

i Ioannis 13.b.13 1.Corinth. 12.a.3 Phili. 2.b.11

7

Maer een yeghelick heeft die kennisse niet: ^k want sommighe met een consciencie van den Afgod, eten tot noch toe als dat den afgoden geoffert is, ende haer consciencie wordt beuleckt, dewijle sy noch kranck is.

k 1.Corin. 10.c.28

8

^l De spijse voordert ons voor God niet. ⁺ Want ist dat wyse eten, so zijn wy niet te oueruloedigher, ende ist dat wyse niet en eten, so zijn wy niet te ghebreckelicker.

l Roman. 14.b.17

+ Spijse.

9

^m Maer siet toe, ⁺ dat dese uwe macht niet eenichsins een aenstoot en worde den ghenen die kranck zijn.

m Galat. 5.b.13

+ Erghernisse.

B.10

Want so yemant dy die de kennisse hebst, siet in der afgoden Tempel ter tafel aensitten, sal zijn consciencie die kranck is, niet ghesterckt worden om te eten dat den Afgoden gheoffert is?

11

ⁿ Ende de swacke broeder door dijn kennisse vergaen, om den welcken Christus ghestoruen is?

n Roman. 14.b.15

12

Als ghy also in de broeders sondicht, ende hare krancke consciencie slaet, so sondicht ghy in Christum.

13

^o Daerom, ist dat de spijse mynen broeder erghert, so wil ick in der eewicheyt gheen vleesch eten, op dat ick mynen broeder niet en erghere.

o Roman. 14.c.21 2.Corinth. 11.c.29