Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hy straft datse onder de godloose te rechte gaen, 9. ende hare ongherechticheyt, hoererie, ende onreynicheyt.

A.1

DErf yemant van v, ⁺ die wat met synen broeder te richten heeft, onder de onrechtueerdighe ^a te rechte gaen, ende niet onder de Heylighen?

+ Van te rechte te gaen.

a Ofte, hem laten richten

2

^b Weet ghy niet dat de Heylighen de werelt oordeelen sullen? Ende ist dat de wereldt van v gheoordeelt wort, zijt ghy dan niet weerdich de minste dinghen te oordelen?

b Sapient. 3.a.8 Matthei 19.c.28 Apoc. 3.c.21

3

Weet ghy niet dat wy de Enghelen oordeelen sullen? hoe veel te meer tijtlicke dinghen?

4

So dan, ist dat ghy ^c tijtlicke dingen te oordelen hebt, die verachtelick zijn in de Ghemeynte, set die [tot Richters.]

c Of, recht houdt van dinghen deses leuens

5

Ick segghet v ter schaemten: Is also geen wijs [man] onder v, oock niet een, die soude konnen oordeelen tusschen syne broeders?

6

Maer de broeder gaet met den broeder te rechte, ende dat onder de ongheloouighe?

7

So is daer nu yimmers ghebreck onder v, dat ghy met malkanderen te rechte gaet. ^d Waerom lijdt ghy niet lieuer onghelijck? Waerom lijdt ghy niet lieuer schade?

d Prouer. 20.c.28. Matthei 5.d.39 Roman. 12.b.17 1.Thess. 5 b.15 1.Petri 3.a.9

8

Maer ghy doet onghelijck ende schade, ende dat, den broederen.

9

Weet ghy niet dat de onrechtueerdige het Koninckrijcke Gods niet en sullen besitten?

B.10

^{e f} Laet v niet verleyden, noch hoereerders, noch afgodendienaers, noch ouerspeelders, noch ^g oncuyssche, noch die by mannen liggen, noch dieuen, noch ghierigaerts, noch dronckaerts, noch lasteraers, noch roouers en sullen het Koninckrijcke Gods niet besitten.

e Galat. 5.c.21 Ephes. 5.a.5

f Of, dwaelt niet,

g Griecx, weecke

11

^h Ende dusdanighe hebt ghy sommighe gheweest: maer ghy zijt afghewasschen, geheylicht, ende gherechtueerdicht in den name des Heeren Iesu, ende in den Gheest onses Gods.

h Ephes. 2.a.8 Coloss. 3.a.7 Titi 3.a.3

12

ⁱ Alle dinghen zijn my gheoorloeft, maer alle dinghen zijn niet oorbaerlick: alle dingen zijn my geoorloeft, maer ick en sal my onder gheens dincx bedwanck laten brenghen.

i 1.Corinh. 10.c.23 Syrach 39.d.31

13

De spijse [behoort] den buycke, ende de buyck der spijse: ende God sal ^k se beyde te niete maken. Maer het lichaem [behoort] der hoererie niet, maer den Heere: ende de Heere den lichame.

k Griecx, desen ende die

14

^l Ende God heeft den Heere verweckt, ende sal ons oock verwecken door zijn macht.

l Roman. 6.a.5 ende 8.b.11 2.Corinth. 4.b.14

15

Weet ghy niet dat uwe lichamen leden Christi zijn? Sal ick nu de leden Christi nemen, ende die eender hoeren leden maken? Dat zy verre.

16

Of weet ghy niet dat hy die der hoere aenhangt, een lichaem [met haer] is? ^m Want sy sullen (seyt hy) twee een vleesch wesen.

m Genes. 2.c.24 Matthei 19.a.5 Marci 10.a.7 Ephe. 5.d.31

17

Maer wie den Heere aenhangt, die is een gheest [met hem.]

18

Schuwt hoererie: Alle sonde die de mensche doet, is buyten den lichame: maer die hoererie bedrijft, die sondicht in zijn eyghen lichaem.

19

ⁿ Of weet ghy niet, dat uwe lichaem is een Tempel des heylighen Gheests, die in v is, dien ghy van Gode hebt: ende ghy en zijt ws selfs niet?

n 1.Corint. 3.b.16 2.Corinth. 6.b.16 Hebr. 3.a.6 1.Petri 2.a.5

20

^o Want ghy zijt dier ^p gekocht: eert dan God in uwen lichame, ende in uwen gheeste, de welcke Gods zijn.

o 1.Corint. 7.c.24 Hebr. 9.b.12 1.Petri 1.b.18

p Griecx, met prijse