Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Hy vernedertse, straffende hare onachtsaemheydt in het straffen des ghenen die zijns vaders wijf ghenomen hadde, 3. daer na vermaent hyse om hem af te snijden, 8. ende om suyuerheydt na te volghen, 9. ende hoererie te schuwen.

A.1

MEn hoort ganschelick dat daer hoererie onder v is: ende sulcke hoererie die oock onder de Heydenen niet genaemt en wort: namelick, ^a dat yemandt zijns vaders wijf hebben soude.

a Leuitici 18.a.8 Deuter. 27.c.20

2

Ende ghy zijt opgheblasen, ende en hebt niet lieuer rouwe ghedraghen, op dat die dat werck gedaen heeft, soude wt den midden van v wech ghedaen worden.

3

^b Want ick, als die met den lichame daer niet en ben, maer teghenwoordich met den gheeste, hebbe hem die dat also ghedaen heeft, nu als teghenwoordich gheoordeelt,

b Coloss. 2.a.5

4

Dat hy inden name onses Heeren Iesu Christi, in uwe vergaderinghe met mynen gheeste, ende met de macht onses Heeren Iesu Christi,

5

Dat [segghe ick] de sulcke sal ^c den Satan ouergegeuen worden, tot verderuinge des vleeschs, dat de gheest behouden worde inden daghe des Heeren Iesu Christi.

c 1.Timot. 1.c.20

6

Vwen roem en is niet goet: ^d Weet ghy niet dat een weynich suerdeesems, het geheele deech suer maeckt?

d Galat. 5.a.9

7

Suyuert nu dan den ouden syerdeesem wt, op dat ghy nieu deech wesen moecht, gelijck ghy onghesuert zijt. ^e Want oock Christus onse Pascha, is voor ons gheoffert.

e Esaie 53.a.9 Ioannis 1.c.29

8

So dan, laet ons ^f Feeste houden, niet in den ^g ouden suerdeesem, noch in den Suerdeesem der boosheyt ende listicheydt: maer in onghesuerde brooden der ^h oprechticheyt, ende waerheyt.

f 1.Corinth. 15.a.3 Exodi 12.a.3

g Deuter. 16.a.3

h Of, eenuoudicheyt,

9

Ick hebbe v inden Sendbrief gheschreuen, ⁱ dat ghy v niet en soudt met de hoereerders vermenghen.

i Matthei 18.b.17 2.Corinth. 6.b.14 Ephe. 5.b.11 2.Tehss. 3.b.14 Deut. 7.a.2 Syrach 13.a.8

B.10

Ende [meynde dat] niet gheheelick met de hoereerders deser werelt, of ghierighe, of roouers, of afgoden dienaers: want anders moest ghy ter werelt wt gaen.

11

Maer nu hebbe ick v gheschreuen dat ghy v niet en soudt vermenghen, [namelick,] ist dat yemant die een broeder genaemt wordt, een hoe-

[fol. 63v]

reerder is, of een gierigaert, of een afgodendienaer, of een lasteraer, of een dronckaert, of een roouer, ^k dat ghy sulcke oock niet eten en soudt.

k Ieremie 16.a.8 Danielis 1.a.8

12

Want wat hebbe ick oock de ghene die buyten zijn, te oordeelen? oordeelt ghy niet de ghene die binnen zijn?

13

Maer die buyten zijn, oordeelt God. ^l Doet dan den boosen wech van v.

l Deut. 13.a.5