Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Waerom hy so nederich was in de leere, 4. van het werck ende weerdicheydt des diensts, 21. op de welcke men niet steunen noch roemen en mach, dan op God alleen.

A.1

ENde ick broeders en konde tot v niet spreken als tot Gheestelicke, maer als tot vleesschelicke, als tot ionghe kinderen in Christo.

2

^a Ick hebbe v met melck gheuoedt, ende niet met spijse: want ghy en vermochtet noch niet, ia oock nu en vermoghet ghy niet:

a Hebr. 5.b.12 1.Petri 2.a.2

3

Want ghy zijt noch vleesschelick. ^b Want de wijle onder v nijt is, ende twist, ende tweedracht, zijt ghy niet vleesschelick, ende wandelt na den mensche?

b 1.Corint. 1.b.10 Galat. 5.b.19 Iacobi 3.b.16

4

Want als deen seyt: ^c Ick ben Pauli: ende dander: Ick Apollo: zijt ghy niet vleeschelick?

c 1.Corinth. 1.b.11

5

Wie is dan Paulus? ende wie is ^d Apollos? anders dan Dienaers, door welcke ghy gelooft hebt? ende ghelijck de Heere eenen yeghelicken ghegheuen heeft?

d Actuum 8.c.24 1.Corinth. 1.b.11 ende 16.b.12

6

Ick hebbe gheplant, ^e Apollos heeft nat gemaeckt: maer God heeft den wasdom ghegeuen.

e Actuum 18.c.28 ende 19.a.1.

7

So en is dan noch die plant, noch die nat maect yet: maer God die den wasdom gheeft.

8

Ende die plant, ende die nat maeckt zijn een, maer ^f een yeghelick sal synen loon ontfanghen na synen arbeyt.

f Psalm. 62.b.13 Ieremie 17.b.10 ende 32.b.19 Matthei 16.c.27 Roman. 2.a.6 ende 14.b.12 2.Corinth. 5.b.10 Galat. 6.a.5 Apocal. 2.c.23 ende 22.b.12

9

Want wy zijn Gods ^g medewerckers: Gods ackerwerck, Gods ^h timmeringhe zijt ghy.

g 2.Corinth. 6.a.1

h Ephes. 2.b.19

B.10

Na de ghenade die my God ghegeuen heeft, hebbe ick als een wijs Timmermeester het fundament gheleydt: ende een ander timmert daer op. Maer een yeghelick sie toe, hoe hy daer op timmert.

11

Want niemant en kan een ander fundament legghen, dan het gene ^* dat gheleyt is, welck is Iesus Christus.

* Esaie 28.b.16 Matthei 16.b.18

12

Ende ist dat yemandt op dit fundament timmert, gout, siluer, kostelicke steenen, hout, hoy, stoppelen.

13

Een yeghelicx werck sal openbaer worden: ⁱ want de dach sal het openbaren. Want het sal door het vyer gheopenbaert worden, ende hoedanich een yeghelicx werck is, sal het vyer beproeuen.

i Esaie 48.b.10 1.Petri 1.a.7 ende 4.b.12

14

So yemants werck blijft, dat hy daer op ghetimmert heeft, ^k die sal loon ontfanghen.

k Of, het

15

So yemants werck verbrant, so sal ^l hy scha-

l Of, het

[fol. 63r]

de lijden: maer hy sal behouden worden, nochtans also als door vyer.

16

^m Weet ghy niet dat ghy Gods Tempel zijt, ende dat de Gheest Gods in v woont?

m 1.Corin. 6.b.19 2.Corinth. 6.b.16 Hebr. 3.a.6 1.Petri 2.a.5

17

So yemant den Tempel Gods scheyndt, dien sal God schenden: Want den Tempel Gods is heylich, welck ghy zijt.

18

ⁿ Niemant bedrieghe hemseluen: So yemant onder v dunckt wijs te zijn, die worde dwaes in dese werelt, op dat hy wijs worde.

n Prouerb. 3.a.7 Esaie 5.c.21.

19

Want de wijsheyt deses werelts, is dwasheyt by God. Want daer is gheschreuen: ^o Hy grijpt de wijse in hare listicheyt.

o Iob 5.b.13

C.20

Ende wederom: ^p De Heere kent der wijsen ouerlegghinghen, dat sy ijdel zijn.

p Psalm. 94.b.12.

21

So dan, niemant roeme op menschen: want het is al uwe,

22

Het zy Paulus, het zy Apollos, het zy Cephas, het zy de werelt, het zy het leuen, het zy de doot, het zy het teghenwoordighe, het zy het toekomende: het is al uwe:

23

Maer ghy zijt Christi: ende Christus is Gods.