Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Hy verhaelt in wat nederheydt hy hen verkondicht heeft het Euangelium, veracht van der Werelt, 7. nochtans vol wijsheyts, die den natuerlicken mensche onbegrijpelick is, 10. ten zy door de openbaringhe des heylighen Gheests.

A.1

ENde ick broeders, ⁺ als ick tot v quam, ^a ben niet ghekomen met wtnementheyt van spreken, ofte wijsheyt, v verkondigende het ghetuyghenisse van God:

+ Paulus en gebruyckt gheen konste van spreken int prediken.

a 1.Corint. 1.b.15 ende 2.a.4

2

Want ick en hebbe niet ^b gheacht yet te weten onder v, dan Iesum Christum, ende den seluen ghecruycighet.

b Of, gheen achte ghehadt om yet te weten,

3

^c Ende ick hebbe by v geweest met krancheyt ende vreese, ende groote beuinghe.

c Actuum 18.a.1

4

Ende mijn woort, ende mijn predikinghe en heeft niet gheweest ^d in beweghelicke woorden der menschelicker wijsheyt: maer bethooninghe ^e der Gheestelicker macht.

d Corint. 1.b.15 ende 2.a.1 2.Petri 1.b.16

e Gr. des gheests ende machts

5

Op dat uwe ghelooue niet en zy in wijsheydt der menschen, maer in de kracht Gods.

6

^f Maer wy spreken wijsheydt onder de volmaecte: niet ^g wijsheyt deser Werelt, noch der Ouersten deser Werelt ^h de welcke te niete worden.

f Iob 28.c.20

g Iacobi 3.b.15

h 1.Corin. 15.c.24

7

Maer wy spreken de wijsheyt Gods [welcke is] in verborghenheydt, [dat is] de verborghen [wijsheydt] de welcke God te voren bescheyden heeft, eer de Werelt was, tot onser eerlickheydt.

8

ⁱ De welcke gheen Ouerste deser Werelt bekent en heeft: ^k want hadden syse bekent, so en hadden sy den Heere der eerlickheyt gheensins ghecruyst.

i Matthei 11.c.25 Ioannis 7.e.48 2.Corint. 3.b.14

k Ioannis 16.a.3 Actuum 3.b.17 ende 13.c.27 1.Timoth. 1.b.13

9

Maer [wy prediken v] ghelijck gheschreuen is: ^l Dat gheen ooge ghesien en heeft, noch oore ghehoort, noch in het herte des menschen ghekomen is, dat God bereyt heeft den ghenen die hem lief hebben.

l Iesaie 64.a.4

B.10

^m Maer ons heeft het God gheopenbaert: door synen Gheest: ⁿ Want de Gheest doorsoect alle dinghen, oock de diepten Gods.

m Matth. 13.b.11 2.Corinth. 3.b.14

n Sapient. 7.c.23

11

Want wat mensche weet het ghene dat ^o des menschen is, dan de gheest des menschen die in hem is. Also weet oock niemant het ghene dat Gods is, dan de Gheest Gods.

o Oft, in den etcet

12

Ende wy en hebben niet ontfangen den gheest des werelts: maer den Gheest die ^p wt Gode is: op dat wy weten wat ons van Gode geschoncken is.

p Of, in etc.

13

Het welck wy oock spreken ^q niet ^r met redenen die de menschelicke wijsheyt leert: maer met [redenen] die de heylige Gheest leert: ende voeghen Gheestelicke [dingen] tot Gheestelicke.

q 1.Corint. 1.b.15 ende 2.a.4 2.Petri 1.b.16

r Griecx, in

14

Maer ^s de ^t natuerlicke mensche en begrijpt niet dat des Gheests Gods si: want het is hem dwaesheyt, ende hy en kan niet verstaen ^u het ghene dat Gheestelick onderscheyden wort.

s Roman. 8.a.5

t zielicke, oft, die vernuft volcht

u Ofte, want het gheestelick, of, dat het gheestelick

15

Maer de ^x Gheestelicke [mensche] ^y onderscheyt alle dinck: ende selue en wort hy van niemant onderscheyden.

x Prouerb. 28.a.5

y Of, verstaet:

16

^z Want wie heeft de meyninghe des Heeren ghekent, die hem soude raedt gheuen? maer wy hebben de meyninghe Christi.

z Esaie 40.b.13 Roman. 11.d.34 Sapient. 9.b.13