Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

DE EERSTE Sendbrief Pauli tot den Corinthen.

Dat Eerste Capittel.

1. Paulus de ghenade Gods in hen gepresen hebbende, 10. vermaentse tot eenicheyt, ende ootmoedicheydt de moeder daer van, 20. ende leyt alle hoocheyt af, die in God niet ghefundeert en is.

A.1

PAulus gheroepen [tot een] Apostel Iesu Christi, door den wille Gods: ende de broeder Sosthenes,

2

Der Ghemeynte Gods die te Corinthen is, ^a den gheheylichden in Christo Iesu, ^b [ende] gheroepen Heylighen, ^c met allen die den name onses Heeren Iesu Christi aenroepen, in wat plaetse het zy, haers [Heeren] ende oock onses.

a Ioannis 17.b.19 Actuum 15.a.9 1.Thess. 4.a.7

b Roman. 1.a.7. Ephes. 1.a.1

c 2.Thimoth. 1.c.22

3

^d Ghenade ende vrede [zy] v van Gode onsen Vader, ende den Heere Iesu Christo.

d Roman. 1.a.7 2.Corinth. 1.a.2 Ephes. 1.a.2 1.Petri 1.a.2

4

Ick dancke mynen God alle tijdt van v om de ghenade Gods die v ghegheuen is in Christo Iesu:

5

^e Dat ghy in allen zijt rijcke geworden in hem, in allen woorde ende alder kennisse:

e Coloss. 1.a.9

6

Ghelijck de ghetuyghenisse Christi in v versterckt is gheweest,

7

So dat ghy in gheene gaue verhindert zijt: ^f verwachtende op de openbaringhe onses Heeren Iesu Christi.

f Philip. 3.c.20 Titi. 2.b.13

8

^g De welcke v oock sal tot den eynde verstercken, op dat ghy onstraffelick zijt in den dach onses Heeren Iesu Christi.

g 1.Thess. 3.b.13 ende 5.c.23

9

^h God is ghetrouwe door welcken ghy gheroepen zijt tot de gemeynschap zijns Soons Iesu Christi onses Heeren.

h 1.Thess. 5.c.25 1.Corinth. 10.b.13

B.10

Maer ick bidde v broeders, door den naem onses Heeren Iesu Christi, dat ghy alle ⁱ eensins spreeckt, ende dat gheen tweedracht onder v en zy: ^k maer weest vereenicht in eenen sin, ende in een gheuoelen.

i Griecx, het selue

k Roman. 12.b.16 ende 15.a.5 Philipp. 2.a.2 ende 3.b.16 1.Petri 3.a.8

11

Want my is te kennen ghegheuen broeders, door [sommighe] wt Cloes huysgesinne van v, dat daer twist onder v is.

12

Ick segghe daer van, dat een yeghelick van v seyt: ^l Ick ben Pauli, maer ick [ben] ^m Apollo, maer ick [ben] Cephe, maer ick [ben] Christi.

l 1.Corinth. 3.a.4

m Actuum 18.c.24 1.Corinth. 16.b.12

13

Is Christus ghedeylt? Is Paulus voor v ghecruyst? Of zijt ghy inden name Pauli ghedoopt gheweest?

14

Ick dancke God, dat ick niemant van v ghedoopt en hebbe, dan ⁿ Crispum ende ^o Gaium:

n Actuum 18.a.8

o Roman. 16.c.22.

15

Op dat niemant en segghe dat ick in mynen naem ghedoopt hebbe.

16

Maer ick hebbe oock ^p Stephane huysghesin ghedoopt: voort weet ick niet of ick yemant anders ghedoopt hebbe.

p 1.Cor. 16.b.15.17

17

Want Christus en heeft my niet ghesonden om te doopen, maer om het Euangelium te verkondighen: ^q niet ^r met konste van spreken, op dat het cruyce Christi niet verijdelt en worde.

q 1.Corin. 2.a.1.4 2.Petri 1.b.16

r Griecx, in wijsheyt der redenen

18

Want het woordt vanden cruyce is wel den ghenen die verloren worden, dwaesheydt: maer ons die wy behouden worden, is het ^s de macht Gods.

s Roman. 1.b.16

19

Want daer is geschreuen: ^t Ick sal de wijsheyt der Wijsen te niete maken, ende het verstant der verstandighen sal ick ^u wech nemen.

t Esaie 29.b.14 Iob 5.b.13

u Of, verachten.

C.20

^x Waer is de Wijse? Waer is de Schrijuer?

x Esaie 33.b.18

[fol. 62v]

Waer is de ^y ondersoecker deses Werelts? Heeft God niet de wijsheydt deser werelt dwaes ghemaeckt?

y Oft, disputeerder

21

^z Want dewijle in de wijsheyt Gods de Werelt God niet gekent en heeft door de wijsheyt, so heuet Gode behaecht, door ^a een dwase predikinghe, de geloouighe te behouden:

z Matthei 11.c.25. Luce 10.c.21

a Gr. de dwaesheyt der predikinghe,

22

Dewijle ^b de Ioden teeckenen begeeren, ende oock de Griecken wijsheyt soecken.

b Matthei 12.d.39 ende 16.a.1 Ioannis 4.e.48

23

Ende wy prediken den ghecruycichden Chistum, ^c den Ioden wel een erghernisse, ende den Griecken een dwaesheyt.

c Ioan. 6.g.60.66

24

Maer hen die gheroepen zijn beyde den Ioden ende Griecken [prediken wy] Christum de macht Gods, ende de ^d wijsheyt Gods.

d Coloss. 2.a.3

25

Want de dwaesheydt Gods, is wijser dan de menschen [zijn:] ende de kranckheyt Gods, is stercker dan de menschen [zijn.]

26

Want ghy siet uwe roepinghe broeders, ^e dat niet vele wijse na den vleesche, niet vele machtighe, niet vele edele gheroepen zijn.

e Ioannis 7.e.48 ende 12.e.42 Iacobi 2.a.5

27

Maer het dwase der Wereldt heeft God wtuerkoren, om de wijse te beschamen: Ende het krancke des Wereldts heeft God wtuerkoren, om het stercke te beschamen:

28

Ende het onedele der Werelt, ende het verachte heeft God wtuerkoren, ende het ghene dat niet en is, om het gene dat is, te niete te maken.

29

O dat gheen vleesch voor hem en roeme.

D.30

Maer wt hem zijt ghy in Christo Iesu, de welcke ons wijsheydt van Gode gheworden is, ende ^f rechtueerdicheydt, ende ^g heylicheyt, ende verlossinghe:

f Ieremie 23.a.5

g Ioannis 17.b.19

31

Op dat, ghelijck geschreuen is: ^h Wie hem ⁱ beroemt, die beroeme hem in den Heere.

h Ieremie 9.c.23 2.Corinth. 10.b.17 Esaie 65.b.16

i Of, verhuecht