Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Hy recommandeert sommighe, 3. ende groet vele broeders, 13. vermaent hen te wachten van de twistmakers, 25. ende danckt God voor de openbaringhe des Euangeliums.

A.1

ICk beuele v Pheben onse suster, die een Dienersse is der Ghemeynte die in Cenchrea is:

2

Dat ghyse ontfangt in den Heere, ghelijckt den heylighen betaemt: ende haer by staet in wat sake sy v behoeft: want sy heeft velen bystant ghedaen, ende oock my seluen.

3

^a Groet Priscillam ende Aquilam myne medehulpers in Christo Iesu:

a Actu. 18.a.2.c.26

4

(De welcke hare halsen voor mijn leuen ghewaecht hebben, welcken niet alleene ick dancke, maer oock de Ghemeunten der Heydenen.)

5

Ende [groet] de Ghemeynte in haren huyse. Groet Ephenetum mynen liefsten, de welcke is de eerstelinck [onder die van] Achaie tot Christum.

6

Groet Mariam die seer aen ons ghearbeydt heeft.

7

Groet Andronicum, ende Iuniam myne ma-

[fol. 62r]

ghen ende medegheuanghenen, de welcke vermaert zijn onder de Apostelen, ende oock voor my in Christo gheweest zijn.

8

Groet Amplian mynen lieuen in den Heere.

9

Groet Vrbanum mynen medehulper in Christo, ende Stachyn mynen lieuen.

B.10

Groet Appellem den beproefden in Christo. Groetse die van Aristoboli [huysghesin zijn.]

11

Groet Herodionem mijn maechschap: groetse die van Narcissi [huysghesin zijn] die in den Heere zijn.

12

Groet Tryphenam ende Tryphosam, die in den Heere arbeyden. Groet Persidem den lieuen, die seere ghearbeyt heeft in den Heere.

13

Groet Rufum den wtuerkoren in den Heere, ende syne moeder, ende de myne.

14

Groet Asyncritum, Phlegontem, Herman, Patroban, Hermen, ende de broederen die met hen zijn.

15

Groet Philologum ende Iuliam, Nerea ende zijn suster, ende Olympam, ende alle de Heylighen die met hen zijn.

16

^b Groet malcanderen met eenen heyligen kusse. De Ghemeynten Christi groeten v.

b 1.Corin. 16.c.20 2.Corinth. 13.b.12 1.Thess. 5.c.26 1.Petri 5.b.14

17

^c Ick bidde v broeders: Hebt acht op de ghene die tweedracht ende erghernisse maken tegen de leere die ghy gheleert hebt, ^d ende wijckt van hen.

c Coloss. 2.a.8 Titi 3.a.9 2.Ioannis b.10

d Matihei 18.a.8 2.Thess. 3.a.6 2.Thimoth. 3.a.5 Philip. 3.b.18

18

Want de sulcke dienen den Heere Iesu Christo niet, maer haren eyghenen buyck: ende veruoeren de herten der eenuoudighen door schoon spreken ende prijsen.

19

Want uwe ghehoorsaemheyt is tot allen gekomen. Daerom verblijde ick my ouer v: maer ick wil dat ghy ^e wijs zijt in het goede, ende onnoosel in het quade.

e Matthei 10.b.16

C.20

Ende de God des vreden sal den Duyuel kortelick onder uwe voeten vertreden. De ghenade onses Heeren Iesu Christi zy met v. Amen.

21

V groeten, ^f Timotheus mijn medehulper, ^g ende Lucius, ende ^h Iason, ende ⁱ Sofipater myne maghen.

f Actuum 16.a.1 Philip. 2.b.19 1.Thess. 3.a.2

g Actuum 13.a.1

h Actuum 17.a.8

i Actuum 20.a.4

22

Ick Tertius die den brief gheschreuen hebbe, groete v inden Heere.

23

V groet ^k Gaius mijn, ende der geheelder Ghemeynten Weert. V groet ^l Erastus de Rentmeester der stadt, ende Quartus de broeder.

k 1.Corin. 1.b.14

l 2.Timot. 4.c.20

24

De ghenade ons Heeren Iesu Christi zy met v allen: Amen.

25

^m Ende hem die v verstercken kan na mijn Euangelium ende de predikinge Iesu Christi, ⁿ na de ontdeckinghe der verborghentheydt, die van eewighen tijde versweghen is gheweest:

m Ephe. 3.c.20

n Ephes. 1.a.9 ende 3.a.9 Coloss. 1.c.26 2.Timoth. 1.b.10 Titi 1.a.2 1.Petri 1.c.20

26

(Maer nu gheopenbaert, ende door de Prophetische Schriften na het beuel des eewighen Gods, tot ghehoorsaemheydt des gheloofs onder alle de ^o Heydenen gheopenbaert is.)

o Of, Uolcken

27

Desen eenighen wijsen Gode, door Iesum Christum, zy de eerlickheydt in eewicheydt. Amen.

Tot de Romeynen gheschreuen van Corinthen [gesonden,] door Pheben, een Dienersse der Ghemeynten te Cenchrea.