Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. De Christelicke vrijheyt moet ghematicht worden na der liefde ende stichtinge des naesten, 22. ende moet niet doen teghen de consciencie.

A.1

DEn ghenen die kranck is int ghelooue, ⁺ neemt op, [maer] niet tot ^a twistighe tsamensprekinghen.

+ Van de krancke in het ghebruyck der spijsen ende daghen.

a Ofte, twijfelachtighe

2

De een gelooft datmen alle dinck eten mach: ⁺ ende die kranck is [int ghelooue] eet moes.

+ Spijse.

3

^b Wie eet, die verachte hem niet, die niet en eet: ende wie niet en eet, die verdoeme hem niet die eet: want God heeft hem aenghenomen.

b Coloss. 2.b.16

4

^c Wie bistu die eens anders huysknecht oordeelst? Hy staet ofte valt synen Heere: maer hy sal ^d opgehouden worden, want God is machtich hem ^e te houden staende.

c Iacobi 4.b.12

d Of, opghericht

e Of, op te richten

5

^f De een acht den eenen dach meer dan den anderen: de ander acht alle de daghen ghelijck. Een yeghelick zy versekert in zijn gheuoelen.

f Galat. 4.b.10 Coloss. 2.b.16

6

Wie den dach acht, die achten den Heere: ende wie den dach niet en acht, die achten de Heere niet. ^g Ende wie eet, die eet den Heere, want hy danckt God: ende wie niet en eet, die eet den Heere niet, ende danckt God.

g Deuter. 8.b.10 1.Corint. 10.d.31 1.Timoth. 4.a.3

7

Want niemand van ons leeft hemseluen, ende niemant sterft hemseluen.

8

^h Want ist dat wy leuen, so leuen wy den Heere: ende ist dat wy steruen, so steruen wy den Heere. Het zy dan dat wy leuen, het zy dat wy steruen, wij zijn des Heeren.

h 2.Corint. 5.b.15 Galat. 2.c.20 1.Thess. 5.b.10 1.Petri 4.a.2

9

Want hier toe is Christus oock ghestoruen, ende weder opgestaen, ende weder leuendich geworden, om dat hy beyde ouer leuendighe ende doode heerschappie hebben soude.

B.10

Maer du, wat oordeelstu dynen broeder? Of oock du, wat verachtstu dynen broeder? ⁱ Want wy sullen alle voor den Richtstoel Christi ghestelt worden.

i Mattei 25.d.31 2.Corinth. 5.b.10

11

Want daer is gheschreuen: ^k Ick leue, seyt de Heere: voor my sal alle knye buyghen: Ende alle tonghe sal den Heere belijden.

k Esaie 45.c.23 Phil. 2.b.10

12

^l So sullen wy dan, een yeghelick van hemseluen, Gode rekenschap gheuen.

l Psalm. 62.b.13 Ieremie 17.b.10 ende 32.b.19 Matthei 16.c.27 Roman 2.a.6 1.Corint. 3.a.8 2.Corinth. 5.b.10 Galat. 6.a.5 Apocal. 2.c.23 ende 22.b.12

13

Laet ons dan malkanderen niet meer oordeelen, maer oordeelt lieuer dit, [namelick,] ^m dat den broeder geen oorsake tot vallen oft aenstooten ghegheuen en worde.

m 2.Mach. 6.b.18 1.Corinth. 10.d.32 2.Corinth. 6.a.3

14

Ick weet ende ben versekert in Christo Iesu, datter ⁿ niet onreyn en is in hemseluen: dan den ghenen die yet meynt onreyn te zijn, die [is dat] onreyn.

n Matthei 15.b.11 Actuum 10.b.15 1.Corinth. 8.a.4 1.Timoth. 4.a.4

15

Maer ist dat dijn broeder om der spijsen wille bedroeft wort, so wandelstu niet na der liefde: ^o verderft hem niet met dyne spijse, voor den welcken Christus ghestoruen is.

o 1.Corint. 8.b.11

16

Dat dan uwe goet niet ghelastert en worde.

17

^p Want het Koninckrijcke Gdds ⁺ en is niet spijse ende dranck: maer rechtueerdicheyt, ende vrede, ende blijschap door den heylighen Gheest.

p 1.Corinth. 8.a.8

+ Het Koninckrijcke Gods.

18

Want wie hier in Christo dient, die is Gode aenghenaem, ende behaecht den menschen.

19

Laet ons dan soecken dat ten vrede dient, ende tot malcanders stichtinghe.

C.20

Verderft Gods werck niet om der spijsen wille. ^q Alle dinck is reyn, ⁺ maer het is quaet den mensche diet met aenstoot eet.

q Titi 1.b.15

+ Erghernisse.

21

^r Het is goet gheen vleesch te eten, noch wijn

r 1.Corint. 8.b.13 2.Corinth. 11.c.29

[fol. 61v]

te drincken, noch yet waer aen dijn broeder hem stoot, of gheerghert, of ghekrenckt wort.

22

^s† Du hebst gelooue: hebt dat by dy seluen voor God. Salich is hy die hemseluen niet en verdoemt, in het ghene dat hy aenneemt.

s† Anders, hebstu ghelooue?

23

Maer wie twijffelt, die is veroordeelt ist dat hijt eet, want hy eet niet wt den ghelooue.

24

^t Ende al wat wt den ghelooue niet en is, dat is sonde.

t Titi 1.b.15