Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Uermaninge tot gehoorsaemheyt der Ouericheyt, 8. tot liefde, 11. ende heylicheyt.

A.1

^a EEn ^b yeghelick zy der voornemelicker ^c Macht onderdanich: ^d want daer en is gheen Macht dan van Gode: ende die Machten zijn, die zijn van Gode gheordineert.

a Griecx, een yegelicke ziele

b Titi 3.a.1 1.Petri 2.b.13

c Dat is, Ouericheyt

d Sapient. 6.a.4

2

So dan wie der Macht wederstaet, die wederstaet der ordinancie Gods: ende diese wederstaen, die sullen het oordeel [teghen] henseluen nemen.

3

Want de Ouerste zijn niet ^e te vreesen den genen die goet doen, maer die quaet doen. Wiltu de Macht niet vreesen? so doet dat goet is, ende du salt prijs van haer hebben.

e Griecx, vreese den goeden wercken, maer den quaden,

4

Want het is Gods Dienersse dy tot goet: maer ist dat du doest dat quaet is, so vreest, want sy draecht het sweert niet te vergheefs. Want het is Gods Dienersse ende wreker tot ^f straffe den ghenen die quaet doet.

f Griecx, toornicheyt

5

Daerom moetmen onderdanich zijn, niet alleenlick om der straffe, maer oock om der consciencie.

6

Want hierom betaelt ghy oock schattinghe: want sy zijn Gods Dienaers, tot dit selue gheduerichlick arbeydende.

7

^g Gheeft dan eenen yegelicken dat ghy schuldich zijt, schattinghe, ⁺ dien ghy schattinge [schuldich zijt,] tol, dien ghy tot [schuldich zijt] vreese, dien ghy vreese [schuldich zijt,] eere, dien ghy eere [schuldich zijt.]

g Matthei 22.c.21

+ Schattinghe.

8

^h Weest niemandt niet schuldich, dan malcanderen lief te hebben, ⁺ (want wie den anderen lief heeft, die heeft de Wet veruult.

h Galat. 5.b.14 1.Timoth. 1.a.5

+ Liefde.

9

Want dit, [namelick,] ⁱ Du salt niet stelen, Du salt gheen valsch ghetuygenisse gheuen, Du salt niet begheeren: ende so daer eenich ander gebot is, wort in desen woorde begrepen, namelick: ^k Du salt dynen naesten lief hebben ghelijck dy seluen.

i Exodi 20.b.14 Deuter. 5.b.18 Matth. 19.b.18

k Leuitici 19.b.17 Matthei 22.d.38 Marci 12.d.31 Galat. 5.b.14 Iacobi 2.a.8

B.10

De liefde doet den naesten gheen quaet. ^l So is de liefde de veruullinghe der Wet.)

l 1.Timoth. 1.a.5

11

Ende dat ^m dewijle ghy de gheleghentheydt des tijdts weet, [namelick,] dat het nu tijdt is dat van den slape opstaen, want de salicheyt is ons naerder dan doe wy ghelooft hebben.

m 1.Thess. 5.a.6 Ephes. 5.b.14

12

De nacht is vergaen, ende de dach is aenghekomen. ⁿ Laet ons dan de wercken der duysterheyt aflegghen: ende met de wapenen des lichts bekleedt worden.

n Coloss. 3.a.8

13

Laet ons eerbaerlick wandelen als in den daghe: ^o niet in brassen ende dronckenschap, ^p niet in slaepkameren ende ^q wulpsheden, niet in ^r kijuen ende nijdicheyt.

o Luce 21.d.34 1.Thess. 5.a.6

p 1.Corint. 6.b.10 Ephe. 5.a.5

q Ofte, dertelheden

r Iacobi 3.b.14

14

^s Maer doet aen den Heere Iesum Christum, ^t ende besorcht het vleesch niet tot lusten.

s Galat. 5.b.16.

t 1.Petri 2.b.11