Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

1. Dienst die Gode behaecht, 3. vermaninghe tot liefde ende Christelicke werken, 19. begheerlicheyt van wreken verboden.

A.1

ICk ^a bidde v broeders, door de barmherticheyt Gods, ^b dat ghy uwe lichamen Gode begheeft, tot een leuende, heylighe ende welbehaghende offerhande, [welck is] uwen ^c redelicken Godsdienst:

a Of, vermane

b 1.Petri 2.a.5

c Dat is, gheestelicken

2

^d Ende en wordet deser werelt niet ghelijck, maer wordet verandert door de vernieuwinghe uwes ghemoets, ^e op dat ghy moecht ^f beproeuen ^g wat de goede ende welbehaghende ende volmaeckte wille Gods zy.

d 1.Ioan. 2.b.15.

e Ephe. 5.b.17 1.Thess. 4.a.3

f Of, beuinden,

g Of, welcke

3

Want door de ghenade die my ghegheuen is, ghebiede ick eenen yegelicken die onder v is, dat ^h niemant ⁱ gheuoele bouen het ghene dat hy behoort te gheuoelen: maer dat zijn gheuoelen zy tot maticheyt, ^k na dat God eenen yeghelicken de mate des gheloofs ghedeylt heeft.

h Syr. 3.b.19.c.21

i Oft, hemseluen laet duncken

k 2.Corint. 12.b.11 Ephe. 4.a.7

4

^l Want ghelijck wy in eenen lichame veel leden hebben, maer alle de leden niet een werck hebben:

l 1.Corint. 12.b.12

5

^m Also zijn wy vele een lichaem in Christo: maer [wy zijn] een yeghelick des anders leden.

m 1.Corin.12.c.27 Ephe. 1.c.23 ende 4.b.16 ende 5.c.23 Coloss. 1.c.24

6

ⁿ Hebbende dan verscheyden gauen na de ghenade die ons ghegheuen is.

n 1.Corint. 12.a.4 2.Corinth. 10.b.13 1.Petri 4.b.10

7

Het zy ^o prophecie [propheteert] na de mate des gheloofs: het zy bedieninghe, [oeffent v] in het bedienen: het zy die leert, in het leeren:

o 1.Corinth. 12.a.3

8

Het zy die vermaent, int vermanen: ^p die geeft, in eenuoudicheyt: die regeert, in neersticheyt: die barmherticheyt doet, ^q in blijmoedicheyt.

p Matth. 6.a.3

q Deuter. 15.a.7 2.Corinth. 9.a.7

9

De liefde [zy] ongheueynst, ^r haet het quade, ende hangt den goede aen.

r Psalm. 97.b.10 Amos 5.b.15

B.10

^s Weest hertelick beweecht tot malcanderen met broederlicke liefde. ^t Deen den anderen met eere voorgaende.

s Ephe. 4.a.3 Hebr. 13.a.1 1.Petri 1.c.22 ende 2.b.17

t Philip. 2.a.3 1.Petri 5.a.5

11

Niet traech in beneerstinghe, Vyerich van gheeste, dienende ^u† den Heere.

u† Anders, den tijt. Ephe. 5.b.15 Coloss. 4.a.5

12

^x Verblijdende in der hope. ^y Gheduldich in der verdruckinghe. ^z Gheduerich in ghebede.

x Roman. 15.b.13

y Heb. 12.a.1

z Luce 18.a.1 Ephe. 6.b.18 Coloss. 4.a.2 1.Thess. 5.b.17

13

^a Der Heyligen noot mede deylende, ^b gheerne herberghende.

a 1.Corint. 16.a.1.

b Heb. 13.a.2 1.Petri 4.a.9

14

^c Seghentse die v veruolghen, seghent ende en veruloeckt niet.

c Matthei 5.e.44 1.Corinth. 4.b.12

[fol. 61r]

15

Verblijdt v met den blijden: ende weent met den weendenden.

16

^d Weest eensins ghesint ^e op malkanderen: ^f niet hooge gheuoelende [van v seluen,] maer met den nederighen v voeghende. Weest niet kloecksinnich by v seluen.

d Roman. 15.a.5 1.Corinth. 1.b.10 Philip. 2.a.2 ende 3.b.16 1.Petri 3.a.8

e Of, onder

f Prouerb. 3.a.7 Esaie 5.c.21

17

^g Niemande quaet met quaet vergheldende. ^h Besorghende dat eerlick is ⁱ in aller menschen ooghen.

g Prouer. 20.c.22 Matthei 5.d.39 1.Corinth. 6.a.7 1.Thess. 5.b.15

h 2.Corint. 8.c.21 1.Petri 2.b.12

i Griecx, voor alle menschen

18

^k So het moghelick is, so vele in v is, met alle menschen in vrede leuende.

k Hebre. 12.b.14

19

^l V seluen niet wrekende alderliefste: maer gheeft den tooren plaetse. Want daer is geschreuen: ^m Mijn is de wrake, ick salt verghelden, spreekt de Heere.

l Syrach 28.a.1 Luce 6.c.29

m Deuter. 32.d.35 Hebr. 10.d.30 Syrach. 28.a.1

C.20

ⁿ Ist dan dat dijn vyandt honghert, so spijst hem: ist dat hem dorst, so gheeft hem te drincken.

n Prouerb. 25.c.21

21

Want dit doende, saltu vyerige kolen op zijn hooft hoopen.

22

Wort niet ouerwonnen van den quade, maer ouerwint het quaet met goet.