Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Betuycht hebbende van synen goeden wille, bewijst de oorsake der verworpinghe der Ioden, 5. het onderscheyt der rechtueerdicheyt der Wet, ende des gheloofs, 11. welck niemant wt en sluyt: 14. den oorspronck daer van, 19. de prophecie vanden val der Ioden, ende aenneminghe der Heydenen.

A.1

BRoeders, mijns herten wensch ende ghebet tot God voor Israel, is ter salicheyt.

2

Want ick gheue hen ghetuyghenisse, ^a dat sy vyericheyt ^b tot God hebben, maer ^c niet met verstande.

a Roman. 9.d.31 Galat. 4.b.17

b Griecx, Gods

c Griecx, niet na bekenninghe,

3

Want de wijle de rechtueerdicheyt Gods hen onbekent is, ⁺ ende soecken hare eyghen rechtueerdicheyt op te richten, so en zijn sy der rechtueerdicheyt Gods niet onderworpen gheweest.

+ Tweederley rechtueerdicheyt.

4

^d Want het eynde der Wet, is Christus, tot rechtueerdicheyt, eenen yeghelicken die gelooft.

d Actuum 13.d.38 2.Corint. 3.b.13 Galat. 3.c.24 Matth. 5.b.17

5

Want Moses beschrijft de rechtueerdicheyt der Wet, [namelick,] ^e dat de mensche die dit sal ghedaen hebben, sal daer in leuen.

e Leuitici 18.a.5. Ezech. 20.b.11. Galat. 3.b.12

6

Maer de rechtueerdicheyt die wt den ghelooue is, die spreeckt aldus: ^{f g} En segt niet in dijn herte: Wie sal ten Hemel op varen? dat is, Christum van bouen af brenghen:

f Deuter. 30.b.12

g Dat is, denckt niet by dy seluen:

7

Of wie sal inden afgront neder varen? dat is Christum vanden dooden op brenghen?

8

Maer wat seyt ^h sy: ⁱ Het woort is dy na by, [namelick] in dynen monde, ende in dijn herte. Dit is het woort des gheloofs dat wy prediken.

h Of, de Schrift:

i Dit spreect Moses van de Wet, Deuter. 30. Maer Paulus voeghet tot het Euangelium, waer door wy in der waerheyt verkrijghen dat de Wet beloeft, ende ontgaen datse dreycht.

9

Want ist dat du met dynen monde belijdest den Heere Iesum, ende met dijn herte geloofst, dat God hem vanden dooden opghewect heeft, so saltu behouden worden.

B.10

Want met den herten ghelooftmen ter rechtueerdicheyt: maer metten monde belijdtmen ter salicheyt.

11

Want de Schrift seyt: ^k So wie in hem ghelooft, die en sal niet beschaemt worden.

k Esaie 28.b.16 Roman. 9.d.33

12

Want daer en is gheen onderscheyt tusschen de Ioden ende Griecken: want de selue [haerder] aller Heere, is rijck ouer alle die hem aenroepen.

13

^l Want so wie den naem des Heeren sal aenroepen, die sal behouden wesen.

l Ioel 2.d.32 Actuum 2.c.21

14

Hoe sullen sy dan [hem] aenroepen, ⁺ inden welcken sy niet ghelooft en hebben? Ende hoe sullen sy [in hem] gheloouen, ⁺ vanden welcken sy niet ghehoort en hebben? ⁺ Ende hoe sullen sy hooren sonder Predicant?

+ Aenroepen.

+ Gheloouen.

+ Hooren.

15

Ende hoe sullen sy prediken, ⁺ ist dat sy niet ghesonden worden? ⁺ Ghelijck gheschreuen is: ^m Hoe lieflick zijn de voeten der ghener die den vrede verkondighen, die dat goede verkondighen.

+ Prediken.

+ Senden.

m Esaie 52.a.7 Nahum. 1.b.15

16

Maer sy en hebben niet alle den Euengelio ghehoorsaem gheweest. Want Esaias seyt: ⁿ Heere, wie heeft ^o onse prediken ghelooft?

n Esaie 53.a.1 Ioannis 12.d.38

o Griecx, onsen ghehoore,

17

So is dan het ghelooue wt het ghehoor: ende het ghehoor door het woort Gods.

18

Maer (ick segghe) hebben zijt niet ghehoort? ^p Voorwaer haer gheluyt is in allen lande ghegaen, ende hare woorden tot de eynden der werelt.

p Psalm. 19.a.5

19

Maer (ick segge,) Israel heeft hy [God] niet bekent? ^q Ten eersten seyt Moses: ^r Ick sal v tot nauolghinghe verwecken door [de ghene] die gheen volck en zijn, ^s door een onuerstandich volck sal ick v vertoornen.

q Griecx, Moses de eerste seyt,

r Deute. 32.c.21 Ieremie 15.b.14.

s Griecx, in

C.20

Ende Esaias wort stout, ende seyt: ^t Ick ben gheuonden van de ghene die my niet en sochten: Ick ben openbaer gheworden den ghenen die na my niet en vraechden.

t Esaie 65.a.1

21

Maer teghen Israel seyt hy: ^u Den gheheelen dach hebbe ick myne handen wtghestreckt tot een onghehoorsaem ende teghensprekende volck.

u Esaie 65.a.2.