Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Het ghebruyck der Wet, 4. ende hoe de gheloouighe daer van gheurijt zijn, 7. den moeyelicken krijch des vleeschs teghen den Gheest.

A.1

VVeet ghy niet broeders (want ick spreke tot de ghene die de Wet weten) dat de Wet heerschappie heeft ouer den mensche, so langhe als ^a hy leeft?

a Oft, zy

2

^b Want een wijf die onder den man is, is aen den leuenden man gebonden door de Wet: maer ist dat de man ghestoruen is, so is sy vrij gheworden van der Wet des mans.

b 1.Corint. 7.d.39

3

^c Daeromme so langhe de man leeft, ist dat sy haer tot eenen anderen man voecht, so sal sy een ouerspeelster gheheeten worden: Maer als de man ghestoruen is, so is sy vrij van de Wet, op dat sy gheen ouerspeelster en zy, ⁺ als sy haer tot eenen anderen man voecht.

c Matth. 5.d.32.

+ Die vrij zijn van der Wet, dienen Gode in den Gheest.

4

Also dan mijn broeders, ^d ghy zijt oock der Wet ghedoodt door het lichaem Christi, om dat ghy soudt eens anderen wesen, [namelick] diens die vanden dooden verweckt is, op dat wy Gode vruchten draghen.

d Galat. 2.c.20. 1.Thess. 5.b.10. 1.Petri 4.a.2.

5

Want als wy int vleesch waren, doe waren de beweghinghen der sonden (die door de Wet waren) krachtich in onse leden om der doot vruchten te draghen.

6

Maer nu zijn wy vrij vander Wet, dewijle [hy] daer wy onder ghehouden waren, ghestoruen is, op dat wy dienen in een ^e nieu wesen des Gheests, ende niet in het ^f oude wesen der letter.

e Griecx, nieuwicheydt

f Griecx, outheyt

7

Wat sullen wy dan seggen: ^g Is de Wet sonde? Dat zy verre: Maer ick en hebbe de sonde niet ghekent dan door de Wet. Want ick en soude oock de begheerte niet ghekent hebben, en hadde de Wet niet gheseyt: ^h Du salt niet begheeren.

g Roman. 3.c.20 Hebr. 7.b.19

h Exodi 20.b.17. Deute. 5.c.21.

8

ⁱ Maer de sonde oorsake ghenomen hebbende, heeft alle begheerte in my ghewracht door het ghebot. Want sonder de Wet is de sonde doot.

i Ioannis 15.c.22. Roman. 4.b.15. ende 5.c.20. Galat 3.b.19.

9

Want ick was voortijden leuende sonder de Wet, maer als het ghebot quam, is de sonde weder leuendich gheworden:

B.10

Maer ick ben ghestoruen: ende dat ghebot welck [my ghegheuen was] tot den leuen, is beuonden my [te ghedijen] tot der doot.

11

Want de sonde oorsake ghenomen hebbende, heeft my verleydt door dat gebot, ende door dat selue ghedoodt.

12

^k So is dan de Wet heylich, ende dat ghebot is heylich, ende oprecht, ende goet.

k 1.Timoth. 1.a.8. Psalm. 19.a.8.

13

Is dan dat goet is, my de doot gheworden? Dat zy verre: maer de sonde [is my de doot gheworden,] werckende my de doot door het ghene dat goet is: op dat de sonde openbaer werde, [dat is] op dat de sonde worde bouen maten sondighende door dat ghebot.

14

Want wy weten dat de Wet gheestelick is: ⁺ maer ick ben vleesschelick, ^l verkocht onder de sonde.

+ De Wet is geestelick.

l Esaie 52.a.3.

15

Want dat ick doe, dat ^m en bekenne ick niet: ⁿ want ick en doe niet dat ick wil, maer dat ick hate, dat doe ick.

m Oft, houde ick niet voor goet:

n Galat. 5.b.17.

16

Ende ist dat ick doe dat ick niet en wil, so belijde ick dat de Wet goet is.

17

So doe ick dan nu niet meer dat: maer de sonde die in my woont. ⁺

+ Sonde

18

^o Want ick weet dat in my, dat is, in mijn vleesch, gheen goet en woont. Want den wille hebbe ick wel: maer het goet te volbrenghen dat en vinde ick niet.

o Gene 6.a.5. ende, 8.c.21.

19

Want het goet dat ick wil, dat en doe ick niet: maer het quaet dat ick niet en wil, dat doe ick.

C.20

Ist dat ick dan doe het ghene dat ick niet en wil, so doe ick dat niet meer: maer de sonde die in my woont.

21

So beuinde ick dan een Wet [in my, namelic] als ick goet wil doen, ⁺ dat my quaet aenhangt.

+ De inwendige mensche.

22

Want ick hebbe ^p lust aen de Wet Gods na den inwendighen mensche:

p Ofte, verblijde my met de Wet.

23

^q Maer ick sie een ander wet in myne leden, ⁺ de welcke strijdt tegen de Wet mijns gemoets, ⁺ ende my der wet der sonden die in myne leden is, gheuangen maeckt:

q Galat. 5.b.17.

+ De wet der leden of der sonden.

+ De wet des ghemoets.

24

Ick ellendighe mensche, wie sal my verlossen van dit lichaem des doots?

25

Ick dancke God door Iesum Christum onsen Heere.

26

So diene ick dan selue met den ghemoede, ⁺ der Wet Gods, maer met den vleessche der wet der sonde. ⁺

+ Ghemoedt.

+ Vleesch.