Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Hy bewijst door het ghebruyck des Doops, dat niemant de gherechticheyt in Christo verkrijcht, die niet van stonden aen gheheylicht en wort, 11. waer wt volghen de vermaninghen tot heylicheyt ende reynicheydt des leuens.

A.1

VVat sullen wy dan segghen? ⁺ Sullen wy in de sonde blijuen, op dat de ghenade te meerder worde?

+ Men moet der sonde niet dienen.

2

Dat zy verre. [Want] wy ^a die der sonden ghestoruen zijn, hoe sullen wy noch in die selue leuen?

a Dat is, in dewelcke de macht ende iuecht der sonden door Christum ghebluscht is.

3

Weet ghy niet ^b dat wy alle die in Christum Iesum gedoopt zijn, ⁺ in synen doot gedoopt zijn?

b Galat. 3.c.27.

+ Doop

4

^c So zijn wy dan met hem begrauen door den Doop inden doot: op dat, ghelijck Christus wt den dooden verwect is, wy oock also tot de eerlicheyt zijns Vaders, ^d in nieuwicheyt des leuens wandelen.

c Coloss. 2.b.12. Philip. 3.b.10.

d Ephes. 4.c.27 Coloss. 3.b.10. Hebr. 12.a.1. 1.Petri 2.a.2.

5

^e Want ist dat wy door de ghelijckmakinghe zijns doots aen [hem] ghewassen zijn: so sullen wy oock wesen [aenghewassen door de gelijckmakinghe] der opstandinghe.

e Roman. 8.b.11. 1.Corinth. 6.b.14 2.Corinth. 4.b.14

6

Dit wetende, dat de oude mensche die in ons is, met [hem] gecruycicht is, op dat het lichaem der sonde te niete gedaen worde, op dat wy niet meer der sonde en dienen.

7

^f Want wie ghestoruen is, ⁺ die is ^g gherechtueerdicht van de sonde.

f 1.Petri 4.a.1.

+ Der sonde steruen.

g Dat is, sondicht niet meer

8

^h Ende ist dat wy met Christo gestoruen zijn, so gheloouen wy dat wy oock sullen met hem leuen:

h 2.Timot. 2.b.11.

9

Wetende ⁱ dat Christus opgheweckt vanden dooden, niet meer en sterft: de doot en heeft geen heerschappie meer ouer hem.

i Apocal. 1.b.18.

B.10

^k Want dat hy ghestoruen is, dat is hy eenmael ^l der sonde ghestoruen: ende dat hy leeft, dat leeft hy Gode.

k 1.Petri 2.c.24.

l Om die te niete te maken.

11

Also ghy oock, houdt v daer voor, dat ghy der sonde ghestoruen zijt, ende Gode leeft in Christo Iesu onsen Heere. ⁺

+ Gode leuen.

12

So en laet nu dan de sonde gheen ouerhandt hebben in uwen sterffelicken lichame, om haer in syne lusten ghehoorsaem te zijn.

13

Noch en begheeft oock uwe leden niet tot der sonde, ⁺ om wapenen der ongerechticheyt te zijn: ^m maer begheeft v seluen Gode, als die wt de dooden leuendich zijt. Ende [begheeft] uwe leden Gode, tot wapenen der gherechticheyt.

+ Onse leden.

m Luce 1.h.74. Galat. 2.c.20. Hebr. 9.b.14. 1.Petri 4.a.2.

14

Want de sonde en sal gheen ouerhant ouer v hebben: want ghy en zijt niet onder de ⁿ Wet: maer onder de ^o ghenade.

n Door welcke de sonde haer kracht heeft:

o Begaeft met de kracht des heylighen Gheests.

15

Hoe dan? sullen wy sondigen, om dat wy niet en zijn onder de Wet, maer onder de ghenade? Dat zy verre.

16

En weet ghy niet, ^p wien ghy v seluen begheeft tot dienstknechten ter ghehoorsaemheyt, dat ghy desseluen dienstknechten zijt dien ghy gehoorsaem zijt: het zy der sonde ter doot, of der ghehoorsaemheyt ter rechtueerdicheyt?

p Ioannis 8.d.34 2.Petri 2.b.19.

17

Maer God hebbe danck, dat ghy knechten der sonde gheweest zijt, maer zijt nu van herten ghehoorsaem gheworden den exempel der leere daer ghy in begheuen zijt.

18

^q Ende vrij ghemaect van der sonde, zijt gheworden knechten der gherechticheyt.

q Ioannis 8.d.35. Galat. 5.a.1. 1.Petri 2.b.16.

19

Ick spreke menschelick om de swackheyt ws vleeschs: Te weten, ghelijck ghy uwe leden begheuen hebt tot dienstknechten der onreynicheyt, ende der ongherechticheyt tot ongerechticheyt: begheeft nu oock also uwe leden tot dienstknechten der gherechticheyt tot heylicheyt.

C.20

^r Want als ghy dienstknechten der sonde waert, doe ^s waert ghy vrij van de gherechticheyt.

r Ioannis 8.d.34

s Dat is, de gherechticheydt en hadde in v gheen macht.

21

Wat vrucht dan hadt ghy doe? Daer ghy v nu van schaemt? want het eynde der seluen, is de doot.

22

Maer nu als ghy zijt vrij ghemaeckt van der sonde, ende dienstknechten gheworden der gherechticheyt, hebt ghy uwe vrucht tot heylichma-

[fol. 59r]

kinghe, ende het eynde dat eewighe leuen.

23

^t Want de besoldinghe der sonde is de doodt, ^u maer de gaue Gods, is het eewige leuen, door Christum Iesum onsen Heere.

t Gene. 2.b.17. Roman. 5.b.12. 1.Corinth. 15.c.21.

u 1.Petri 1.a.3.