Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxv. Capittel.

1. Paulus voor Festus beschuldicht, appelleert totten Keyser, 14. zijn sake wert voor Agrippa verhaelt, 23. ende hy wert oock voor hem ghebracht.

A.1

ALs nu Festus in dat Lantschap ghekomen was, ghinck hy na dry daghen van Cesarien op na Ierusalem.

2

Ende de Ouerpriester ende de voorneemste des Iodischen volcx verschenen voor hem teghen Paulum: ende baden hem,

3

Begheerende gonste teghen hem, dat hy hem dede komen te Ierusalem, ende leyden laghen om hem onder weghe te dooden.

4

Festus antwoordde, dat Paulus soude te Cesarien bewaert worden, maer dat hy selue soude korts [derwaerts] wtreysen.

5

Die daer onder v (seyde hy) macht hebben, dat sy mede afreysen, ende desen man beschuldighen, indien daer yet in hem is.

6

Ende als hy ^a† meer dan thien dagen met hen ghebleuen hadde, quam hy af na Cesarien: ende des anderen daechs sat hy op den rechtstoel, ende beual Paulum te brenghen.

a† Anders, niet meer

7

De welcke ghekomen zijnde, stonden de Ioden die van Ierusalem af ghekomen waren omme hem, vele ende sware beschuldingen teghen Paulum brenghende, de welcke sy niet machtich en waren te bewijsen;

8

Als hy hem verantwoordde ^b dat hy noch teghen de Wet der Ioden, ⁺ noch teghen den Tempel, noch teghen den Keyser yet ghesondicht hadde.

b Actu. 24.b.14 ende 28.b.17

+ Paulus verantwoort hem seluen voor Festum.

9

Maer Festus willende den Ioden gonste bewijsen, antwoordde Paulo, ende seyde: Wiltu te Ierusalem gaen, ende daer van desen by my gheoordeelt worden?

B.10

Doe seyde Paulus: Ick stae aen des Keysers rechtstoel, daer ick moet gheoordeelt worden: den Ioden en hebbe ick gheen onghelijck ghedaen, ghelijck du oock wel wetest.

11

^c Want indien ick onghelijck doe, ende yet ghedaen hebbe dat de doot weerdich is, so en weyghere ick niet te steruen: maer indien dier [dinghen] daer my dese mede beschuldigen [gheen en is,] so en is niemant machtich my hen wt gonste te gheuen: ick beroepe my op den Keyser.

c Actuum 18.b.14

12

Festus dan met den Raet ghesproken hebbende, ⁺ antwoordde: Hebstu dy op den Keyser beroepen? du salt tot den Keyser gaen.

+ Paulus appelleert tot den Keyser.

13

Als nu sommighe daghen voorleden waren, quam de Koninck Agrippa ende Bernice te Cesarien om Festum te groeten.

14

Ende als sy daer vele daghen gheweest hadden, verhaelde Festus den Koninck van [de sake] Pauli, segghende: ^d Hier is een man van Felix gheuanghen ghelaten:

d Actu. 24.c.28

15

Om wiens wille de Ouerpriesters ende Ouderlinghen der Ioden voor my verschenen als ick te Ierusalem was, begheerende vonnisse teghen hem.

16

Welcken ick antwoordde, dat de Romeynen die ghewoonte niet en hebben ^e eenighen mensche wt gonste ter doot te gheuen, eer de beschuldichde syne beschuldighers voor ooghen heeft, ende plaetse vercreghen heeft, hemseluen van de beschuldinghe te verantwoorden.

e Deut. 17.a.4

17

Als sy dan hier te samen ghekomen waren, maeckte ick gheen wtstel, maer sat des naestkomenden daechs op den rechtstoel, ende beual den man te brenghen.

18

Wiens beschuldigers teghenwoordich staende, en brochten gheen schult by van sulcke dinghen als ick vermoedde.

19

Maer sy hadden sommighe vraghen teghen hem van haren Godsdienst, ende van eenen Iesu die ghestoruen is, welcken Paulus seyde dat hy leeft.

C.20

Ick dan van sulcker vraghen twijffelende, ^f vraechde of hy te Ierusalem wilde gaen, ende daer van dese dinghen gheoordeelt worden.

f Griecx, seyde ick

21

Maer als hy hem beriep datmen hem totter kennisse Augusti soude bewaren, so hebbe ick beuolen hem te bewaren, tot dat ick hem tot den Keyser sende.

22

Ende Agrippa seyde tot Festum: Ick wilde selue oock dien man [gheerne] hooren. Hy seyde: Morghen saltu hem hooren.

23

Des ander daechs dan als Agrippa ende Bernice met groote pomperie ghekomen was, met

[fol. 55v]

de Hooftmannen, ende met de eerlickste mannen der stadt in het rechthuys ghegaen was, wert Paulus ghebracht door Festus beuel.

24

Ende Festus seyde: Agrippa Koninck, ende ghy mannen alle die hier met ons teghenwoordich zijt, ghy siet desen, van welcken my gheheel de menichte der Ioden aenghesproken heeft, beyde te Ierusalem, ende oock hier, roepende dat hy niet meer en behoort te leuen.

25

Maer ick en hebbe niet vernomen, ^g dat hy yet ghedaen heeft dat de doot weert is: ende dewijle hy selue hem op Augustum beroepen heeft, hebbe ick besloten hem te senden:

g Actuum 23.a.9 ende 28.d.31.

26

Van welcken ick niet sekers en hebbe den heere te schrijuen. Daerom hebbe ick hem voor v ghebracht, ende meest voor dy Koninck Agrippa, op dat ick wat hebbe te schrijuen als de ondersoeckinghe sal gheschiet wesen.

27

Want het dunckt my teghen reden, eenen ^h gheuanghen te senden, ende de beschuldinghen teghen hem niet te kennen te gheuen.

h Griecx, gebonden