Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxiiij. Capittel.

1. Paulus beschuldicht, 10. gheeft reden van zijn leuen ende leere, 24. wert ontslaghen, 27. Ende dickmael aenghesproken van Felix, verhopende ghelt van hem, 28. de welcke hem in de gheuanckenisse laet.

A.1

ENde ^a vijf daghen daer na, quam Ananias de Ouerpriester af met de Ouderlingen ende Tertullo den Taelman. Dese verschenen voor den Stadthouder tegen Paulum.

a Actuum 23.a.2

2

Ende als hy gheroepen was, ⁺ begonst Tertullus hem te beschuldighen, segghende: Dat wy groote vrede hebben door dy, ende [door] de weldaden desen volcke door dyne voorsichticheydt gheschiet,

+ Tertulli reden tegen Paulum

3

Dat ontfanghen wy, machtichste Felix, alle tijt ende alomme met aller danckbaerheyt.

4

Maer op dat ick dy niet te langhe en houde, so bidde ick dy, hoort ons kortelick na dyne ^b gerechticheyt,

b Of, beleeftheyt,

5

Want wy hebben desen man beuonden [dat hy is als] een peste, ende allen den Ioden alle de werelt door oploop maeckt, ende [is] een Ouerste der seckte der Nazarenen.

6

^c Die oock ^d† versocht heeft den Tempel te ontheylighen. Welcken wy oock aengrijpende, wilden na onse Wet oordeelen.

c Actuum 21.c.26.

d† Anders bestaen

7

Maer Lysias de Ouerste quam, ende nam hem met groot gheweldt wech wt onse handen.

8

Ghebiedende syne verklaghers tot dy te komen: ^e ende du selue machst hem ondersoeckende, van hem weten alle [dingen] daer wy hem mede beschuldighen.

e Griecx, van welcken du machst seluest etcet.

9

Ende de Ioden vielen hem oock toe, seggende, dat het also ware.

B.10

Doe antwoorde Paulus, ⁺ als hem de Stadthouder ^f hadde toeghelaten te spreken: Ick verantwoorde my seluen te vrijmoedelicker, de wijle ick weet dat du vele Iaren desen volcke Richter ^g gheweest hebst:

+ Pauli antwoorde op Tertulli besculdinghe.

f Griecx, wenckte

g Griecx, bist

11

Ende machst weten, dat het niet meer dan twaelf daghen en zijn, dat ick te Ierusalem ben op ghekomen om te aenbidden.

[fol. 55r]

12

Ende sy hebben my noch inden Tempel gheuonden met yemant sprekende, of doende het volck by een loopen, noch in de Synagoghen, noch in de stadt.

13

Noch sy en zijn dat niet machtich te bewijsen daer sy my mede beschuldighen.

14

^h Maer dit bekenne ick dy, dat ick na dien ⁱ wech, welcke men seckte noemt, aldus der vaderen God diene: [namelick,] gheloouende alle dat in de Wet ende Propheten gheschreuen is:

h Actuum 25.a.8 ende 28.b.17

i Dat is, leere,

15

Ende hebbende hope op God, dat de opstandinghe der dooden komen sal, beyde der rechtueerdighen ende onrechtueerdighen: de welcke sy oock selue verwachten.

16

^k Ende hier in oeffene ick my seluen, ⁺ om een onergherlicke consciencie alle tijt te hebben voor God ende de menschen.

k Actuum 13.a.1

+ Consciencie.

17

Ende na vele Iaren ben ick ghekomen, ^l om onder mijn volck aelmoessen te doen, ende offerhande.

l Actuum 11.c.29. Roman. 15.c.25

18

^m Waer in my gheuonden hebben ghereynicht inden Tempel, niet met volck, noch met beroerte,

m Actuum 21.c.26

19

Sommighe Ioden wt Asia: welcke moesten

C.20

hier by dy teghenwoordich zijn, ende my beschuldighen, hadden sy wat teghen my:

21

Of, dat dese selue segghen, doe ick voor den Raet stont, of sy eenighe ongerechticheyt in my gheuonden hebben,

22

Dan van desen eenighen ⁿ roep, dien ick riep, staende onder hen, [namelick,] ^o Ouer de opstandinghe der dooden worde ick heden van v gheoordeelt.

n Of, stemme

o Actuum 23.a.6. ende 28.c.20

23

Felix dit ghehoort hebbende, steldese wt, ende wiste ^p bescheydelick wat van dien weghe was, ende seyde: Als Lysias de Ouerste sal gecomen zijn, dan sal ick volle kennisse nemen van uwe saken.

p Oft, segghende als ick sal bescheydelicker weten wat van desen weghe is,

24

Ende hy beual den Hooftman ouer hondert Paulum te bewaren, ende verlichtinghe te [laten] hebben, ^q ende niet te verbieden dat hem de syne dienden, of tot hem quamen.

q Actuum 27.a.3. ende 28.b.16.

25

Ende na sommighe daghen, Felix ghekomen zijnde, met Drusilla synen wijue, die een Iodinne was, ontboodt Paulum, ende hoorde hem van den ghelooue in Christum.

26

Ende als Paulus handelde van de rechtueerdicheyt, ende maticheyt, ende toekomenden oordeele, Felix beureest geworden zijnde, antwoordde: Gaet nu henen, ende als ick bequamen tijt sal hebben, sal ick dy weder roepen.

27

Ende oock mede hopende dat hem Paulus ghelt gheuen soude om los te worden: waerom hy hem oock dickmael ontboodt ende met hem sprack.

28

Ende als de twee Iaren veruult waren, ghekreech Felix eenen nakomer Portium Festum. ^r Ende Felix willende den Ioden gonste bewijsen, liet Paulum gheuanghen.

r Actuum 25.b.14