Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

2. Paulus vele Griecxsche landen doorwandelt hebbende, 9. verwect Eutychum, 18. ende de Ouderlinghen der Ghemeynten van Ephesen vermaent hebbende, reyst na Ierusalem.

A.1

ALs nu den oproer ghestilt was, riep Paulus de Discipulen ende groettese, ^a ende ghinck wt om na Macedonien te reysen.

a 1.Timoth. 1.a.3.

2

Ende als hy die eynden hadde doorreyst, ende hen met vele woorden vertroost ende vermaent hadde, quam hy in Greciam.

3

Ende als hy daer dry maenden voleyndt hadde, ende hem van de Ioden laghen gheleyt waren, als hy na Syriam woude varen, wert hy gesint weder te keeren door Macedoniam.

4

Daer waren met hem ghekomen tot Asien toe, Sopater van Berreen, ende van de Thessalonicensen, ^b Aristarchus ende Secundus, ende Gaius van Derben, ende Timotheus: ende van Asien ^c Tichicus ende ^d Trophimus.

b Actuum 19.c.29 ende 27.a.2.

c 2.Timot. 4.b.12

d Actuum 21.c.29 2.Timoth. 4.c.20

5

Dese waren voorghegaen, ende vertoefden ons te Troas.

6

Ende wy scheepten van Philippis na de daghen des onghesuerden broots, ende quamen binnen vijf daghen tot hen te Troas, ende verkeerden daer seuen daghen.

7

Ende op ^e den eersten dach der weken als de Ionghers vergadert waren om broot te breken, leerdese Paulus, willende des anderen daechs wech reysen: ende bleef sprekende tot den middernacht.

e Griecx, eenen der Sabbathen

8

Ende daer waren vele lichten in de opperkamer daer ^f wy vergadert waren.

f Of, sy

9

Ende daer sat een Ionghelinck met namen Eutychus in de venster, ⁺ door diepen slaep neder heldende te wijle dat Paulus sprack, ende hy door den slaep neder gedruct, viel vanden derden solder af, ende wert doot opghenomen.

+ Eutychus.

B.10

Ende als Paulus af ghegaen was, ^* viel hy op hem, ende als hy hem omuangen hadde, seyde hy: En weest niet beroert, want zijn ziele is in hem.

* 1.Reg. 17.c.23 2.Reg. 4.d.34

11

Als hy dan opghestaen was, ende broot ghebroken ende gheeten hadde, sprack hy tot dat den dach op ghinck, ende is also wtghereyst.

12

Ende sy brachten den knecht leuende, ende waren bouen maten vertroost.

13

Ende wy tot het schip gegaen zijnde, voeren af na Asson, daer wy Paulum souden in nemen, want hy haddet also gheschickt, te wijle hy selue soude te voete gaen.

14

Ende als hy te Asson by ons ghekomen was, namen wy hem in, ende quamen tot Mitylene.

15

Ende na dat wy van daer af ghescheept waren, quamen wy des ander daechs tegen Chios: ende sdaechs daer na, quamen wy aen tot Samos, ende bleuen te Trogillion: ende den naesten dach quamen wy te Milete.

16

Want Paulus hadde besloten, Ephesen voorby te varen, om dat hy den tijt niet en soude in Asia doorbrenghen: ^† want hy haestede, om den ^g Pinxterdach te Ierusalem te wesen, so [hem dat] moghelick ware.

† Act. 21.a.4.b.12.

g Griecx, den dach des vijftichsten

17

Maer van Mileten sandt hy na Ephesen, ende ontboot de Ouderlinghen der Ghemeynte.

18

Ende als sy tot hem ghekomen waren, ⁺ seyde hy tot hen: Ghy weet, hoe ick ^h vanden eersten daghe af dat ick in Asiam ghekomen ben, met v alle tijt gheweest hebbe:

+ Paulus bewijst syne neersticheyt, ende vermaent de Dienaren der Gemeynten van Ephesen.

h Actuum 19.b.10

19

Dienende den Heere met aller ootmoedicheyt, ende met vele tranen ende versoeckinghen, die my door der Ioden laghen toeghekomen zijn.

C.20

Hoe ick niet dat profijtelick was, achterghehouden hebbe, dat ickt v niet en soude verkondighen, ende v leeren openbaerlick ende in de huysen,

21

Betuyghende beyde den Ioden ende Griecken, ⁱ de bekeeringhe tot God, ende het ghelooue in onsen Heere Iesum Christum.

i Luce 24.e.47

22

Ende nu siet, ick reyse na Ierusalem ghebonden door den Gheest, niet wetende wat my daer gheschieden sal:

23

Dan dat my de heylighe Gheest in allen steden betuycht, segghende: ^k dat mij banden ende verdruckinghen ^l naken.

k Actuum 21.b.13

l Of, verwachten

24

^m Maer ick en achte nerghens op: noch en houde oock mijn leuen niet dierbaer voor my seluen, op dat ick mynen loop met blijschap mach veruullen, ende den dienst ⁿ welcken ick vanden Heere Iesu ontfanghen hebbe, om het Euangelium der ghenaden Gods te betuyghen.

m Actuum 21.b.13

n Galat. 1.a.1 Titi 1.a.3.

25

Ende nu siet, ick weet dat ghy alle daer ick doorgegaen ben, predikende het Konincrkrijcke Gods, mijn aensichte niet meer sien en sult.

26

Daerom betuyghe ick v te desen huydighen daghe, ^o dat ick van [uwer] allen bloede reyn ben.

o Ezech. 33.a.9

27

Want ick en hebbe niet ontrocken dat ick v niet en soude verkondighen alle den raet des Heeren.

28

^p So hebbet dan nu acht op v seluen, ende op de gheheele kudde, waerin v de heylige Gheest Opsienders gheset heeft, om de Vergaderinghe ^q† Gods te ^r hoeden, ^s welcke hy met synen bloede vercreghen heeft.

p 1.Petri 5.a.2.

q† Anders, des Heeren ende Gods,

r Of, weyden, regeeren,

s Ephe. 1.a.7. Coloss. 1.b.14. Hebr. 9.b.13 1.Petri 1.b.19 Apocal. 5.a.9.

29

Want ick weet dit, dat na mijn afscheyden, ^t sware woluen onder v komen sullen, die de kudde niet sparen en sullen.

t 2.Petri 2.a.1

D.30

Ende ^u wt v seluen sullen mannen opstaen, die verkeerde [dinghen] spreken sullen, om de Discipulen af te trecken achter hen.

u Psalm. 41.b.10 Matthei 26.c.22 Ioannis 13.b.18 Actuum 1.b.17 1.Ioannis 2.b.19.

31

Daerom waect, ende ghedenct dat ick dry Iaren lanck niet opghehouden en hebbe nacht ende dach eenen yeghelicken met tranen te vermanen.

32

Ende nu broeders, beuele ick v Gode ende den woorde syner ghenade, die v machtich is op te bouwen, ende de erue onder allen geheylichden te gheuen.

33

^x Ick en hebbe niemandts gout oft siluer, of kleedinghe begheert:

x 1.Corint. 9.b.12. 2.Corinth. 11.a.9 ende 12.b.14

34

Ende ghy weet selue ^y dat [my] dese selue handen tot mynen nootdruft ende der ghener die met my waren, ghedient hebben.

y Actuum 18.a.3 1.Corinth 4.b.12. 1.Thess. 2.a.9 2.Thess. 3.a.8.

35

Ick hebbe v in allen onderwesen, ^z datmen also arbeydende moet de swacke ophouden: ende het woort des Heeren Iesu ghedencken, want hy gheseyt heeft: Het is ^a saligher te gheuen dan te nemen.

z Ephe. 4.c.28.

a Oft, geluckiger

36

Ende als hy dit gheseyt hadde, knielde hy, ende badt met hen allen.

37

Ende daer wert veel weenens van allen, ende sy vielen Paulo aenden hals, ende kusten hem,

38

Bedroeft zijnde aldermeest om dat woordt dat

[fol. 53v]

hy gheseyt hadde, dat sy zijn aensichte niet meer sien en souden. Ende gheleydden hem tot het schip.