Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

2. Paulus te Corinthen woonende, ende met syne handen werckende, 5. verkondicht den Ioden dat Iesus is Christus, het welck sommighe gheloouen, ende sommighe niet, 19. van daer koemt hy te Ephesen, 22. daer na te Cesarien ende Antiochien, 24. ende Apollos arbeyt te Ephesen voorspoedelick in het werck des Heeren.

A.1

DAerna scheydde Paulus van Athenen, ⁺ ende quam tot Corinthen.

+ Paulus arbeydet met Priscilla ende Aquila, ende predickt Christum.

2

Ende vandt eenen Iode met namen ^a Aquila, gheboren in Ponto, ende onlancks wt Italien ghekomen, met Priscilla synen wijue, (daeromme dat Claudius gheboden hadde dat alle de Ioden wt Roomen gaen souden) ende ghinck tot hen.

a Roman. 16.a.3. 2.Timoth. 4.b.19

3

Ende om dat hy van den seluen hantwercke was, bleef hy by hen, ende arbeydde (want sy waren Tabernakelmakers van hare hantwerck.)

4

Ende hy handelde op alle Sabbathen in de Synagoge, ende vermaende beyde Ioden ende Griecken.

5

^b Ende als Silas ende Timotheus van Macedonia gekomen waren, wert Paulus ^* door den Gheest, betuyghende den Ioden dat Iesus Christus is.

b Actuum 17.b.15

* Of, ghedrongen door den Gheest, den Ioden te betuygen Iesum etce.

6

Ende als sy hem wederstonden, ende lasterden, ^c schudde hy syne kleederen, ende seyde tot hen: Vwe bloet zy op uwe hooft: ick ben reyn, ende gae van nu voort tot de Heydenen.

c Matth. 10.b.14. Actuum 13.f.51.

7

Ende van daer ghegaen zijnde, quam hy in het huys van eenen ghenaemt Iustus, die Godvruchtich was, ende zijn huys was naest der Synagoge.

8

^d Ende Crispus de Ouerste van der Synagoge gheloofde [in] den Heere met gheheel synen huyse, ende vele vanden Corinthen [hem] hoorende, gheloofden, ende werden ghedoopt.

d 1.Corinth. 1.b.14

9

^e Ende de Heere seyde tot Paulum in een gesichte by der nacht: Vreest niet, maer spreeckt ende swijcht niet:

e Actuum 23.b.11.

B.10

Want ick ben met dy, ende niemant en sal dy aenkomen om quaet te doen: want ick hebbe veel volcx in dese stadt.

11

Ende hy sat daer een iaer ende ses maenden, leerende onder hen het woort Gods.

12

Maer als Gallio Stadthouder van Achaya was, stonden de Ioden eendrachtelick tegen Paulum op, ende brachten hem voor den Rechtstoel,

13

Segghende: Dese raedt den menschen God te dienen teghen de Wet. ⁺

+ Paulus beschuldicht voor Gallio.

14

Ende als Paulus synen mont soude open doen, seyde Gallio tot den Ioden: ^f Waer daer eenich onghelijck oft quaet seyt [ghedaen] O Ioden, so ware het doch reden dat ick v ^g hoorde.

f Actuum 25.b.11.

g Griecx, verdroeghe.

15

Maer indien daer ^h twist is van uwe reden oft namen, ofte Wet, so siet ghy selue toe: want ick wil daer ouer gheen Richter zijn.

h Griecx, vraghe

16

Ende hy dreefse wech van den Rechtstoel.

17

Doe namen alle de Griecken Sosthenem den Ouersten der Synagoge, ⁺ ende sloegen hem voor den Rechtstoel: ende Gallio hadde daer gheen achte op:

+ Sosthenes voor den Rechterstoel geslagen.

18

Ende als Paulus daer noch vele daghen ghebleuen hadde, nam hy oorlof aen de broederen, ende scheepte wech na Syrien, ende Priscilla ende Aquila met hem, als hy ⁱ zijn hooft te Cenchreen gheschoren hadde: want hy hadde een belofte [ghedaen.]

i Numeri 6.a.9. Actuum 21.c.23.

19

Ende hy quam te Ephesen, ende verlietse daer: maer hy ghinck in de vergaderinghe, ende handelde met de Ioden.

C.20

Ende als sy hem baden dat hy daer langher blijuen soude, bewillichde hijt niet.

21

Maer nam oorlof aen hen, segghende: Ick moet voor alle dinck de toekomende Feeste te Ierusalem houden: maer ick sal wederom keeren tot v, ^k so het God wil. Ende schiet van Epheso.

k 1.Corint.4.b.19 Hebr. 6.a,3. Iacobi 4.b.15.

22

Ende als hy was afgekomen te Cesarien, ende opghegaen was [te Ierusalem] ende de Ghemeynte ghegroet hadde, is hy afghekomen tot Antiochien.

23

Ende als hy [daer] wat tijdts gheweest hadde, ghinck hy wech, ende doorghinck ordentlick het Galileische lant, ende Phrygiam, versterckende alle de Discipulen.

24

Ende te Ephesen quam een Iode ghenaemt ^l Apollos, ⁺ gheboren van Alexandria, een welsprekende man, ende machtich in de Schriften.

l 1.Corint. 1.b.12.

+ Apollos leert Christum.

25

Dese was inden wech des Heeren onderwesen: ende vyerich zijnde van gheeste, sprack ende leerde neerstelick vanden Heere, alleenlick wetende den Doop Ioannis.

[fol. 52v]

26

Ende begonst vrijmoedichlick te spreken in de Synagoge: ende als hem ^m Aquila ende Priscilla ghehoort hadden, namen sy hem aen, ende leyden hem den wech Gods bescheydelicker wt.

m Roman. 16.a.3

27

Ende als hy wilde na Achaiam gaen, ^n† vermaenden de broeders, ende schreuen tot de Discipulen, dat sy hem aennemen souden.

n† ander, werden de broeders daer toe vermaent, etc.

28

De welcke daer ghekomen zijnde, was seer ^o profijtelick den genen die gelooft hadden door de ghenade: want hy ouerwan de Ioden sterckelick int openbare, bewijsende metter Schrift dat Iesus zy Christus.

o 1.Corint. 3.a.6.