Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Het xij. Capittel.

1. De Ghemeynte wort veruolcht door Herodem, 2. Iacobus ghedoot, 3. Petrus gheuanghen, 7. ende door den Enghel verlost, 20. de vereeninghe Herodis met de Tyriers ende de Sidoniers, 21. zijn hoochmoet ende straffe, 25. Iohannes Marcus aenghenomen van Paulo ende Barnaba wederkeerende van Ierusalem.

A.1

TE dier seluer tijdt begonste Herodes de Koninck sommige vander Ghemeynte te verdrucken: ⁺

+ Herodes doodt Iacobum.

2

Ende doodde ^a Iacobum den broeder Ioannis met den sweerde.

a Matth. 4.c.21.

3

Ende doe hy sach dat het den Ioden wel behaechde, nam hy voor, oock Petrum te vangen, ⁺ (ende het waren de daghen des onghesuerden broots.)

+ Herodes worpt Petrum in de geuanckenisse.

4

^b Den welcken oock gheuanghen hebbende, settede hem in de geuanckenisse, ende heeft hem ouergegeuen ^c vier vierlingen krijchsknechten, dat sy hem bewaerden: ende wilde hem na het Pascha den volcke voortbrenghen.

b Ioannis 21.b.18.

c Ofte, viermael vier krijchsknechten.

5

So werdt dan Petrus in de gheuanckenisse ghehouden: ⁺ ende van de Ghemeynte werdt een ^d gheduerich gebet tot God ghedaen voor hem.

+ De Ghemeynte bidt voor Petrum.

d Of, vyerich

6

Ende als Herodes hem nu soude voortbrenghen: dien seluen nacht sliep Petrus tusschen twee krijchsknechten, ghebonden met twee ketenen: ende de Wachters voor de deur, bewaerden den Karcker.

7

Ende siet, ⁺ de ^e Engel des Heeren quam daer, ende daer scheen een licht in de wooninge, ende hy sloech Petrum aen de zijde, ende weckte hem op, segghende: Staet op haestelick. Ende de ketenen vielen hem van den handen.

+ De Engel verlost Petrum.

e Actuum 5.b.19 ende 16.c.26

8

Ende de Engel seyde tot hem, ommegort dy, ende ^f doet dyne schoenen aen. Ende hy dede also. Ende hy seyde tot hem: Hangt dynen mantel omme dy, ende volcht my na.

f Griecx, onderbindt dyne solen,

9

Ende hy wtgaende volchde hem na, ende wiste niet dat het warachtich was dat door den Enghel gheschiedde: maer meynde dat hy een ghesichte sach.

B.10

Ende als sy door de eerste ende tweedde wachte ghegaen waren, so quamen sy aen de ijseren porte die totter stadt leydt, de welcke hen van selfs gheopent werdt. Ende sy wtghegaen zijnde, ghinghen een strate voor: tende terstont scheydde de Enghel van hem.

[fol. 49v]

11

Ende Petru tot hemseluen ghekomen zijnde, seyde: Nu weet ick warachtelick ^g dat de Heere synen Enghel wtghesonden heeft, ende my verlost heeft wt der hant Herodis, ende wt alle de verwachtinghe des Iootschen volcx.

g Danielis 6.c.2

12

Ende als hy hem bedachte, ^h quam hy tot het huys Marie, des moeders Ioannis, die toegenaemt wort Marcus, daer vele [broeders] waren vergadert ende biddende.

h Actuum 4.c.23.

13

Ende als Petrus aen de deure der poorten geclopt hadde, so ghinck daer een Dienstmaecht voort om te luysteren, ghenaemt Rhode: ⁺

+ Rhode.

14

Ende als sy de stemme Petri bekende, so dede sy de poorte niet open van blijschap, maer liep binnen, ende booptschapte dat Petrus voor de poorte stont.

15

Ende sy seyden tot ^i† haer: Bistu onsinnich? ende sy bleef daer by dat het also ware. Sy seyden: Het is zijn Enghel.

i† Anders, du bist onsinnich,

16

Ende Petrus bleef cloppende: ende als sy opghedaen hadden, sagen sy hem, ende verschrickten.

17

Ende als hy hen metter hant gewenckt hadde, ⁺ dat sy swijgen souden, so vertelde hy hen hoe hem de Heere wt der gheuanckenisse gheleydt hadde, ende seyde: Bootschapt dit Iacobo ende den broederen. Ende hy ghinck wt, ende ^k reysde na een ander plaetse.

+ Petrus wt den karcker verlost door den Engel wijct in een ander plaetse.

k Oft, ghinck in een etcet.

18

Ende als het nu dach werdt, was daer gheen kleyne beroerte onder de Krijchsknechten, wat ^l van Petro gheschiet ware.

l Griecx, Petrus mochte gheworden zijn.

19

Ende als Herodes hem ghesocht hadde, ende niet en vant, ende de wachters onderuraecht hadde, dede hyse wech leyden. Ende is van Iudea af ghegaen na Cesaream, ende heeft daer ^m ghewoont.

m Of, verkeert.

C.20

Ende Herodes hadde inden sin tegen Tyrum ende Sidonem te krijghen: maer sy quamen eendrachtelick tot hem, ende ghekreghen Blastum des Konincx Camerlinck op hare zijde, ende begheerden vrede, om dat haer lant ghespijst wert van des Konincx [lande.]

21

Ende op eenen gesetten dach Herodes de Konincklicke ⁿ kleederen aenghedaen hebbende, ⁺ ende op den Rechtstoel sittende, dede een reden tot hen.

n Syrach 11.a.4

+ Herodes wort leuende van de wormen geten.

22

Ende het volck riep: [Dat is] Gods stemme en niet eens menschen.

23

Ende terstont sloech hem de Enghel des Heeren, om dat hy niet Gode de eere en gaf, ende wert van de ^o wormen gheeten, ende gaf synen gheest op.

o 2.Mach. 9.a.9.

24

Ende het ^p woordt Gods wies, ende vermenichfuldichde.

p Esaie 55.b.11.

25

Ende ^q Barnabas ende Saulus keerden wederom ^r† van Ierusalem, als sy den dienst volbracht hadden, Ioannem met toename Marcus, met hen ghenomen hebbende.

q Actuum 11.d.30

r† Anders, van Ierusalem na Antiochien,