Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Saulus na dat hy de Ghemeynte veruolcht heeft, 4. wert van Christo geroepen om zijn Apostel te zijn, 32. Ende Petrus gheneest Eneam den ghichtsicken, 36. ende verweckt de dochter in Ioppe.

A.1

ENde Saulus ^a noch blasende dreyghingen ende moort tegen de Discipulen des Heeren, ghinck tot den Ouerpriester,

a Actuum 8.a.3 ende 23.a.4. ende 26.a.9. Galat. 1.b.13 1.Corinth. 15.a.9. 1.Timoth. 1.b.13

2

Ende begheerde van hem brieuen na Damascum tot de ^b Synagogen, op dat hy mannen ende vrouwen, so hy eenige van ^* deser Leere vonde, ghebonden na Ierusalem brochte.

b Dat is, Collegien, scholen, vergaderinghen.

* Griecx, desen weghe

3

^c Ende als hy reysde ist geschiet dat hy by Damascum quam, ende hem ommesloech ^d snellick ^e een licht van den Hemel. ⁺

c Actuum 22.a.6.

d 1.Corint. 15.a.8. 2.Corinth. 12.a.2.

e Actuum 26.b.12

+ Christus bekeert Saulum.

4

Ende ter Aerden gheuallen zijnde, hoorde hy een stemme tot hem segghen: Saul, Saul, wat veruolchstu my.

5

Ende hy seyde: Heere wie bistu? Ende de Heere seyde: Ick ben Iesus welcken du veruolgest: ^f Het is dy hardt de verssen teghen den prickel te slaen.

f Actuum 5.d.39.

6

Ende hy beuende ende vertzaecht, seyde: Heere ^g wat wiltu dat ick doe? Ende de Heere [seyde] tot hem: Staet op ende gaet in de stadt, ende dy sal [daer] gheseydt worden, wat du doen moetest.

g Luce 3.b.10. Actuum 2.d.37. ende 16.d.30

7

Ende de mannen die met hem ouer wech reysden, stonden verwondert ^h want sy de stemme hoorden, ende niemant en saghen.

h Daniel. 10.a.7.

8

Ende Paulus rechte hem op van der Aerden, ende als hy syne ooghen op dede, en sach hy niemant: ende sy leydden hem by der hant, ende brochten hem in Damascum.

[fol. 48r]

9

Ende hy was dry daghen sonder sien, ende at niet, noch dranck niet.

B.10

Ende daer was een Discipel in Damasco, ⁺ genaemt Ananias: ende de Heere seyde tot hem in een ghesichte: Anania. Ende hy seyde: Siet [hier ben] ick Heere.

+ Ananias.

11

Ende de Heere [seyde] tot hem: Staet op, ende gaet in de strate genaemt de rechte: ende vraecht ten huyse Iude na [eenen] ghenaemt Saulus ⁱ van Tarsen, want siet hy bidt.

i Actuum 21.d.39. ende 22.a.3.

12

(Ende hy heeft door een ghesichte gesien eenen man met name Ananias inkomen, ende hem de handen op legghen, op dat hy weder siende worde.)

13

Ende Ananias antwoordde: ⁺ Heere, ick hebbe van velen ghehoort van desen man, ^k hoe veel quaets hy dynen Heylighen in Ierusalem ghedaen heeft:

+ Ananias vreest Paulum.

k Actuum 9.a.1. Galat. 1.b.13. 1.Corinth. 15.a.9. 1.Timot. 1.b.13.

14

Ende heeft hier macht van de Ouerpriesters, te ^l vanghen alle die dynen naem aenroepen.

l Griecx, binden

15

Ende de Heere seyde tot hem: ⁺ Gaet henen, ^m want dese is my een wtuerkoren vat, om mynen naem te dragen voor de Heydenen ende Koninghen, ende kinderen Israels.

+ Paulus een wtuerkoren vat.

m Actuum 13.a.2 ende 22.c.21. Roman. 1.a.1. Galat. 1.b.15. ende 2.a.8. Ephe. 3.a.8. 1.Timoth. 2.a.7 2.Timoth. 1.b.11.

16

ⁿ Want ick sal hem toonen, hoe vele hy lijden moet om mynen naem.

n Actuum 21.b.11. 2.Corinth. 11.c.23.

17

^o Ende Ananias ghinck henen, ende quam in dat huys: ende legghende de handen op hem, seyde: Saul broeder, de Heere heeft my ghesonden: [namelick] Iesus die ^p dy gheopenbaert is in den wech dien du quamest, op dat du weder siende, ende met den heylighen Gheest veruult werdest.

o Actuum 22.b.12

p Ofte, van dy is ghesien gheweest

18

Ende terstont vielen van syne ooghen, ghelijck visch schellen, ende hy wert terstont weder siende: ende stont op, ende wert ghedoopt,

19

Ende nam spijse, ende werdt versterckt: ende Saulus was sommige dagen by de Discipulen die in Damasco waren.

C.20

Ende hy predickte terstont Christum in de vergaderinghen, dat dese de Sone Gods was.

21

Ende sy verschrickten alle diet hoorden, ende seyden: Is niet dese, die te Ierusalem vernielde de ghene die desen naem aenriepen: ende is daer toe hier ghekomen, om dat hyse ghebonden tot de Ouerpriesters soude brenghen?

22

Ende Saulus wert meer ende meer versterct, ende beroerde de Ioden die te Damasco woonden, bewijsende dat dese ^q Christus ware.

q Dat is, de Ghesalfde

23

Ende na vele daghen hielden de Ioden raedt te samen, om hem te dooden. ⁺

+ De Ioden soecken Paulum te dooden.

24

Maer hare lagen werden Paulo bekent, ^r ende sy bewaerden de poorten dach ende nacht, op dat sy hem doodden.

r 2.Corint. 11.d.32

25

So namen hem dan de Discipulen des nachts, ^s ende deden hem door den muer, ende lieten hem met koorden af in eenen korf.

s Iosue 2.b.15. 1.Sam. 19.b.12.

26

^t Ende als Paulus te Ierusalem ghekomen was, versocht hy hem by de Discipulen te voeghen, ⁺ maer sy vreesden hem alle, niet geloouende dat hy een Discipel ware.

t Actuum 22.b.17

+ De Discipulen gheloouen niet dat Paulus geloouich is.

27

^u Maer Barnabas nam hem, ende brachte hem tot de Apostelen: ende vertelde hen hoe hy den Heere inden wech ghesien hadde, die met hem ghesproken hadde, ende dat hy te Damasco ^x vrijelick ghesproken hadde in den name Iesu.

u Actuum 11.c.25.

x Of, openbaerlic

28

Ende hy was met hen wt ende in gaende, te Ierusalem: ende handelde vrijmoedichlick, in den name des Heeren Iesu.

29

Hy sprack oock ende ^y handelde met den Griecken: maer dese sochten hem te dooden.

y Of, disputeerde

D.30

Ende doe de broeders dit gewaer werden, geleydden sy hem af tot Cesarien, ende sonden hem na Tarsen.

31

So hadden dan de Ghemeynten vrede door gheheel Iudeam, ⁺ ende Galileam, ende Samariam, ende werden ghesticht, ende werden vermenicht, wandelende in de vreese des Heeren, ende troost des heylighen Gheests.

+ Vrede.

32

Ende het gheschiedde doe Petrus alomme door reysde, dat hy oock quam tot de Heyligen die te Lidda woonden.

33

Ende aldaer vandt hy eenen man ghenaemt Eneas, ⁺ die acht iaren te bedde ghelegen hadde, ende was ^z lam.

+ Eneas ghichtsieck wort ghesont.

z Of, ghichtsieck.

34

Ende Petrus seyde tot hem: Enea, Iesus Christus ^a make dy ghesont: staet op ende maeckt selue dijn bedde. Ende hy stont terstont op.

a Of, maeckt

35

Ende hem saghen alle die te Lidda ende Sarona woonden, de welcke hen bekeerden tot den Heere.

36

Ende te Ioppe was een Discipulinne met name Tabitha, welck is te segghen: ^b Dorkas, dese was vol goede wercken, ende aelmoessen die sy dede.

b dat is, een Hinde of Ree.

37

Ende het gheschiedde in die daghen dat sy kranck wert, ende sterf. Ende als syse ghewasschen hadden, leyden syse in den oppersael.

38

Ende want Lidda by Ioppe was, hoorden de Discipulen dat Petrus daer was, ende sonden twee mannen tot hem, ende baden, dat hy ^c niet en soude vertoeuen tot hen te komen.

c Of, hem niet en liete verdrieten.

39

So stont Petrus op, ende ghinck met hen: ende als hy daer gekomen was, leydden sy hem op den Oppersael: ende alle de Weduwen stonden by hem, weenende ende toonende hem de rocken ende kleederen die Dorkas gemaeckt hadde, als sy by hen was.

E.40

Ende alsse Petrus alle hadde wtghedreuen, knielde hy neder en badt: ende keerde hem tot den lichame, ⁺ ende seyde: Tabitha, staet op. Ende sy heeft haer ooghen opghedaen, ende Petrum ghesien hebbende, sat sy op:

+ Tabitha wordt opgewect van der doot.

41

Ende hy haer de hant gheuende, rechtese op, ende de Heylighen ende Weduwen gheroepen hebbende, steldese [hen] leuende.

42

Ende dit werdt bekent gheheel Ioppe door, ende vele gheloofden in den Heere.

43

Ende het gheschiedde dat hy vele daghen te Ioppe bleef, ⁺ by eenen Simon lederbereyder.

+ Petrus by den Lederbereyder.