Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

13. Simon de toouenaer wert ghedoopt, 20. ende van Petro ghestraft om syne ghiericheydt ende gheueynstheyts wille, 27. oock de Camerlinck der Koninginne Candaces, 37. na dien hy ghelooft hadde in Iesum Christum, wort van Philippo ghedoopt.

A.1

ENde ^a Saulus ^b bewillichde oock in synen doot. Ende daer wert te dien daghe groote veruolginghe tegen de Gemeynte die in Ierusalem was: ^c ende sy werden alle verstroyt in de landen Iudee ende Samarie, behaluen de Apostelen.

a Actuum 22.c.20

b Ofte, hadde een welbehaghen.

c Actuum 11.b.19

2

Ende [sommighe] Goduruchtighe mannen droeghen Stephanum te samen [ten graue,] ^d ende maeckten een groote ^e klaghe ouer hem.

d Gene. 23.a.2. ende 50.b.10 2.Sam. 3.d.31.

e Of, rouwe

3

^f Ende Saulus verwoestede de Ghemeynte, gaende in alle de huysen: ende treckende mannen ende vrouwen, leuerdese ouer in de gheuanckenisse.

f Actuum 9.a.5 ende 22.a.4. ende 26.a.9. Galat. 1.b.13 1.Corinth. 15.a.9 1.Timoth. 1.b.13.

4

^g Sy dan die verstroyt waren, ghinghen alomme ende verkondichden het woort.

g Actuum 11.b.19

5

Ende Philippus quam af in de stadt Samarie, ⁺ ende predickte hen Christum.

+ Philippus predickt de Samariten.

6

Ende de scharen namen eendrachtelick waer dat van Philippo gheseyt wert, hoorende ende

[fol. 47v]

siende de teeckenen die hy dede.

7

^h Want de onreyne Gheesten voeren wt van vele besetene, roepende met luyder stemmen: ende vele ⁱ lamme ende kreupele werden ghesont ghemaeckt.

h Marci 16.b.18. Actuum 5.b.16. ende 16.b.18. ende 19.b.12

i Of, gichtsiecke

8

Ende daer wert groote blijschap in die stadt.

9

Ende een man ghenaemt Simon, ⁺ hadde te voren in die stadt ^k pleghende gheweest toouerie, ende het volck van Samaria wtsinnich makende, segghende dat hy wat groots was:

+ Simon magus

k Actuum 13.a.6.

B.10

Welcken sy alle waer namen van den kleynsten tot den grootsten, segghende: Dese is die groote macht Gods.

11

Ende sy namen hem waer, daerom dat hyse langhe tijdt met toouerie wtsinnich ghemaeckt hadde.

12

Maer doe sy gheloofden Philippo, die van den Koninckrijcke Gods verkondichde, ende van den name Iesu Christi, werden sy gedoopt mannen ende vrouwen.

13

Ende Simon gheloofde oock selue, ⁺ ende ghedoopt zijnde, bleef by Philippum, ende als hy de teeckenen ende groote krachten sach, die daer gheschiedden, verschrickte hy hem.

+ Simon magus wort gedoopt.

14

Ende als de Apostelen te Ierusalem hoorden, dat Samaria het woordt Gods ontfangen hadde, sonden sy tot hen Petrum ende Ioannem.

15

De welcke quamen af ende baden voor hen, dat sy den heylighen Gheest ontfinghen.

16

Want hy was noch niet op eenighen van hen ghekomen, maer sy waren alleenlick ghedoopt in den naem des Heeren Iesu.

17

Doe ^l leyden sy de handen op hen, ende sy ontfinghen den heylighen Gheest.

l Actuum 6.a.6. ende 13.a.3. ende 19.a.6. 1.Timoth. 4.b.14 ende 5.c.22. 2.Timoth. 1.a.6.

18

Als dan Simon sach, dat door de oplegginge der handen der Apostelen de heylighe Gheest ghegheuen wert,

19

So boot hy hen ghelt, seggende: Gheeft my oock dese macht, op dat so wien ick de hant op legghe, hy den Heylighen Gheest ontfanghe.

C.20

Maer Petrus seyde tot hem: Dijn gheldt zy met dy tot verderffenisse, ^{+ m} want du ghemeynt hebst dat de gaue Gods door ghelt verkreghen wordt.

+ Gods gaue wort door geen gelt verkregen.

m Matth. 10.a.8.

21

Du hebst noch deel noch lot in desen woorde: want dijn herte en is niet recht voor God.

22

Daerom bekeert dy van dese dyne boosheyt, ende bidt God of dy dit ghedachte dijns herten vergheuen worde.

23

Want ick sie dat du bist in bitter galle, ende tsamenknoopinghe der ongherechticheyt.

24

Ende Simon antwoordde ende seyde: ⁿ Bidt ghy den Heere voor my, op dat niet op my en kome daer ghy van gheseyt hebt.

n Numeri 21.a.7

25

Als sy nu alomme het woort des Heeren betuycht ende ghesproken hadden, keerden sy wederom na Ierusalem, ende verkondichden het Euangelium velen vlecken der Samaritanen.

26

Ende de Enghel des Heeren sprack tot Philippum, segghende: Staet op, ende gaet henen teghent Suyden, op den wech die van Ierusalem af koemt na [de stadt] ⁺ Gaza, ^o welcke woest is.

+ Philippus verkondicht het Euangelium den Camerlinghe der Koninginnen van Ethiopien.

o Griecx, dese is woeste

27

Ende hy stont op, ende ghinck henen, ende siet een Moorman die een ^p Camerlinck was ende een machtighe Candaces, der Koninginne van Ethiopien: welcke ouer alle haren schat was, ^q die was komen te Ierusalem om aen te bidden.

p Oft, ghesneden

q Ioannis 12.c.20

28

Ende keerde wederom sittende op synen waghen, ende las den Propheet Esaiam.

29

Ende de Gheest seyde tot Philippum: Gaet toe, ende voecht dy by desen waghen.

D.30

Ende Philippus liep toe ende hoorde hem lesen den Propheet Esaiam, ende seyde: Verstaestu oock wat du lesest?

31

Ende hy seyde: Hoe soude ick konnen, ten ware dat my yemandt onderwese? Ende badt Philippum dat hy soude op komen ende by hem sitten.

32

Ende de plaetse der Schrift die hy las, was dese: ^r Hy is ghelijck een schaep ter slachtinghe ghebracht, ende als een Lam voor synen Scheerder stemmeloos, also heeft hy synen mont niet op ghedaen.

r Esaie 53.a.7.

33

Zijn oordeel is in syne nederheyt ^s wechghenomen: ende wie sal zijn ^t eewe vertellen? want zijn leuen wert van der Aerden wechgenomen.

s Oft, verheuen.

t Of, gheslachte

34

Ende de ^u Camerlinck antwoordde Philippo, ende seyde: Ick bidde dy, van wien seydt de Propheet dat? van hemseluen, of van eenen anderen?

u Of, ghesneden

35

^x Ende Philippus dede synen mont op, ende beginnende van dier Schrift aen, verkondichde hem Iesum.

x Luc. 24.e.45.46

36

Ende daer sy ouer wech voeren, quamen sy aen een water: ende de Camerlinck seyde: Siet daer water, ^y wat verhindert my ghedoopt te worden?

y Actuum 10.e.47

37

Ende Philippus seyde: Gheloofstu wt gheheelder herten, so ist gheoorloeft: Hy antwoordde ende seyde: Ick ghelooue dat Iesus Christus, ⁺ zy de Sone Gods.

+ Des Camerlincx gelooue.

38

Ende hy gheboot den wagen stille te houden, ende sy daelden beyde in het water, Philippus ende de Camerlinck, ende hy doopte hem.

39

Ende als sy ^z van den water op quamen, nam de Gheest Philippum wech, ende de Camerlinck sach hem niet meer: want hy reysde vrolick synen wech.

z Of, wt

40

Ende Philippus werdt gheuonden te Azoten, ende ghinck alomme, verkondighende het Euangelium allen steden, tot dat hy te Cesarien quam.