Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

5. De verkiesinghe der seuen Diaconen, 8. de ghenade in Stephano, 11. de valsche beschuldinghe teghen hem ghemaeckt.

A.1

ENde in die daghen als de Discipulen vermenichden, ⁺ quam daer een murmureringhe der Griecken tegen de Hebreen, om dat hare weduwen in de daghelicksche bedieninghe [der Armen] ^a veracht werden.

+ Diakenen verordent, die den weduwen ende tafelen dienden, ende de Apostelen prediken.

a Of, versuymt.

2

De twaelue dan, riepen de menichte der Discipulen, ende seyden: ^b Het is niet goet, dat wy het woordt Gods verlaten, ende de disschen bedienen.

b Exodi 18.b.19

3

^c Daerom broeders, siet onder v na seuen ^d mannen die goet ghetuygenisse hebben, vol des heyligen Gheests ende wijsheyts, die wy mochten setten tot desen wercke.

c Actuum 1.c.21 ende 16.a.3 Deut. 1.b.13 1.Timoth. 3.a.7

d Griecx, betuychde mannen

4

Ende wy sullen aenhouden inden ghebede ende in de bedieninghe des woorts.

5

Ende dit woort behaechde der geheelder menichte: ende sy verkoren Stephanum eenen man vol gheloofs ende heyligen Gheests, ende ^e Philippum, ende Prochorum, ende Nicanorem, ende Timonem, ende Parmenam, ende ^f Nicolaum den ^* aenkomelinck van Antiochien.

e Actuum 21.a.8

f Apocal. 2.a.6

* Of, Iodenghenoot.

6

^g Dese stelden sy voor de Apostelen, ende als sy gebeden hadden ^h leyden sy hen de handen op.

g Actuum 1.c.23

h 1.Timo. 4.b.14 ende 5.c.22 2.Timot 1.a.6

7

Ende het woordt Gods wies, ende het ghetal der Discipulen vermenichde te Ierusalem seere: ende een groote schare der Priesteren werden ⁱ den ghelooue ghehoorsaem. ⁺

i Dat is, der leere

+ Daer zijn Priesters den gelooue ghehoorsaem.

8

Ende Stephanus vol gheloofs ende krachts, dede wonderheden ende groote teeckenen onder den volcke.

9

Ende daer stonden op sommighe wt der ^k Synagoge, ghenaemt Libertinen, ende Cyreneren, ⁺ ende Alexandrinen, ende der ghener die wt Cilicia ende Asia waren, ende twisteden met Stephano.

k Dat is Schole, of, Collegie,

+ Stephanus.

B.10

^l Ende sy konden niet wederstaen der wijsheyt ende den Gheest daer hy door sprack.

l Exodi 4.b.12 Esaie 54.b.17 Luce 24.c.24

11

^m Doe maeckten sy mannen wt, ⁺ die seyden: Wy hebben hem lasterlicke woorden hooren spreken teghen Mosen ende God.

m Mattthei 26.f.59.g.60

+ Valsche ghetuyghen.

12

Ende sy beroerden het volck ende de Ouderlinghen ende de Schriftgheleerden, ende quamen hem aen, ende grepen hem [wech,] ende brachten hem voor den Raet:

13

Ende stelden daer valsche ghetuyghen, welcke seyden: Dese mensche houdt niet op lasterlicke woorden te spreken tegen dese Heylige plaetse, ende de Wet.

14

Want wy hebben hem hooren segghen, dat Iesus van Nazareth dese plaetse sal verderuen, ende veranderen de ⁿ insettinghen die ons Moses ghegheuen heeft.

n Of, zeden

15

Ende sy hem aensiende alle die inden Raet saten, saghen sy zijn aensichte als eens Enghels aensichte.