Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

2. Het volck verwondert van de heelinghe des creupelen, 12. ende tot Christum ghebracht door Petrum, 19. hen predikende boete tot vergheuinghe der sonden.

A.1

PEtrus ende Ioannes ghinghen ghelijck op na den Tempel, ⁺ ter vren der bedinge, ter neghenster [vren.]

+ De kreupel geboren wort gesont in Christi naem.

2

^a Ende een man die kreupel was van moeders lijue aen, wert ghedraghen, welcken sy dagelicx setten voor de deure des Tempels ghenaemt de Schoone, op dat hy aelmoessen begheerde van den ghenen die inden Tempel ghinghen.

a Actuum 14.a.7

3

Als hy Petrum ende Ioannem sach dat sy in den Tempel souden gaen, so begheerde hy aelmoessen.

4

Ende Petrus sach hem aen, met Ioanne, ende seyde: Siet ons aen.

5

Ende hy sachse aen, verhopende wat van hen te ontfanghen.

6

Ende Petrus seyde: Siluer ende Gout hebbe ick niet: maer wat ick hebbe dat gheue ick dy: ^b Inden naem Iesu Christi van Nazareth, staet op, ende wandelt.

b Actuum 4.b.10

7

Ende hy greep hem by der rechter hant, ⁺ ende rechtede hem op: ende terstont werden syne voeten ende verssenen vaste.

+ De kreupel wort ghesont, ende sprinct God danckende.

8

Ende hy spranck, stont, ende wandelde, ende hy ghinck met hen ten Tempel in, springhende ende danckende God.

9

Ende alle het volck sach hem wandelen, ende God dancken.

B.10

Ende sy bekenden dat hy de gene was, die om aelmoessen sat aen de Schoone poorte des Tempels. Ende sy werden vol verwonderinghe ende verschrickinghe ouer het ghene dat hem gheschiet was.

11

Als nu de kreupele die ghesont gemaect was [aen] Petrum ende Ioannem hielt, liep alle het volck verwondert tot hen, in het ^c voorhuys genaemt Salomonis.

c 1.Regum 6.a.3 Ioannis 10.c.23. Actuum 5.b.12

12

Ende als Petrus dat sach, antwoordde hy den volcke: Ghy mannen van Israel, wat verwondert ghy v hier in, of wat siet ghy op ons, ghelijck oft wy desen hadden doen wandelen door onse macht, ofte Godsalicheyt?

13

^d De God Abrahams, ende Isaacx, ende Iacobs, de God onser vaderen heeft synen Sone Iesum ^e verklaert: welcken ghy ouergheleuert ende verloochent hebt voor het aensichte Pilati, als hy hem oordeelde los te laten.

d Actuum 5.d.31 Philip. 2.a.9.

e Of, vereerlickt:

14

^f Maer ghy verloochendet den Heyligen ende Gherechtigen, ende begheerdet den man die een Dootslagher was, v ghegheuen te hebben.

f Matthei 27.c.20 Marci 15.b.11 Luce 23.b.18 Ioannis 18.e.40

15

Ende den Vorst des leuens dooddet ghy, welcken God opgewect heeft vanden dooden: ^{+ g} des zijn wy ghetuyghen.

+ Getuygen der opstandinghe.

g Actuum 1.a.8 ende 2.d.32

16

Ende door het ghelooue in synen name, heeft synen naem desen dien ghy siet ende kendt, ghesterckt: ⁺ ende het ghelooue door hem heeft dese volle ghesontheyt ghegheuen in uwer allen teghenwoordicheyt.

+ Ghelooue.

17

Ende nu broeders, ⁺ ick weet ^h dat ghy dat door onwetenheyt ghedaen hebt, ghelijck oock uwe Ouerste:

+ Onwetenheit.

h Ioannis 16.a.3 1.Corinth. 2.a.8 1.Timot. 1.b.13

18

Maer God ⁱ wat hy voorseyt heeft door den mont aller Propheten dat Christus lijden soude, dat heeft hy also veruult.

i Luce 24.c.27 Esaie 50.a.6. ende 53.a.5

19

^k So betert v dan, ende bekeert v, op dat uwe sonden moghen wtghedaen worden,

k Syrach 17.c.20

C.20

^l Op dat de tijden der verkoelinge komen van den aensichte des Heeren, ende dat hy sende die v ^m† te voren ghepredickt is, Iesum Christum.

l Oft, na dien de tijden der verkoelinghe etcet. gekomen zijn, ende hy ghesonden heeft.

m† Anders, te voren bethoont,

21

ⁿ Welcken de Hemel moet ontfangen tot der tijt, dat het al weder opgerecht worde wat God ghesproken heeft door den mont aller syner heylighen Propheten, van der eewicheyt aen.

n Of, welcke den Hemel moet houden.

22

Want Moses heeft totten vaderen gheseyt: ^o De Heere uwe God sal v eenen Propheet verwecken wt uwe broederen, ghelijck als my: ^p dien sult ghy hooren in allen wat hy tot v spreken sal.

o Deut. 18.b.15.18 Ioannis 1.e.45 Actuum 7.d.37

p Matthei 17.a.5. ende 23.a.8

23

Ende het sal gheschieden, dat alle ziele die de-

[fol. 45v]

sen Prophete niet en hoort, die sal wt den volcke vernielt worden.

24

Ende oock alle de Propheten, so vele alsser van Samuel aen, ende daerna ghesproken hebben, die hebben oock dese daghen voorseyt.

25

Ghy zijt kinders der Propheten, ende des ^q verbonts dat God tot onse Vaderen bestelt heeft, segghende tot Abraham: ^r Ende in dynen zade sullen alle gheslachten der Aerden gheseghent worden.

q Of, Testaments

r Gene. 12.a.3 ende 18.b.18 ende 22.b.18 ende 26.a.4 ende 49.b.10 Syrach 44.c.21 Galat. 3.a.8

26

God heeft Iesum zijn kint v eerst verweckt, ende ghesonden om v te segenen, op dat een yeghelick hem afkeere van syne boosheden.