Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxi. Capittel.

1. Hy openbaert wederom zijn opstandinge, 15. ende beueelt Petro zijn Schapen, 18. voorseyt hem synen doot, ende roept hem, 25. het groot ghetal der miraculen Christi.

A.1

DAer na openbaerde Iesus hem wederom den Discipulen, ⁺ aen de Zee Tiberiadis, ende hy openbaerde hem aldus:

+ Christus openbaert hem Petro ende de anderen Visschers.

2

Daer waren te samen Simon Petrus, ende

[fol. 44r]

Thomas genaemt Didymus, ende ^a Nathanael van Cana Galilee, ende ^b de sonen Zebedei, ende twee andere van syne Discipulen.

a Ioannis 1.e.45

b Matthei 4.c.21 Marci 1.b.19

3

Ende Simon Petrus seyde tot hen: Ick gae visschen. Sy seyden tot hem: Wy gaen oock met dy. Sy ginghen wt, ende traden terstont in het schipken, ende in dien nacht en vinghen sy niet.

4

Ende doen nu de morghen ghekomen was, stont Iesus op den Oeuer, nochtans de Discipulen en wisten niet dat het Iesus was.

5

So seyde Iesus tot hen: Kinderkens, hebt ghy eenighe toespijse? Sy antwoordden hem: Neen.

6

Ende hy seyde tot hen: ^c Worpt het net ter rechter zijden des schipkens, ⁺ ende ghy sult vinden. Doe wierpen zijt, ende en kondent niet meer trecken, om de menichte der visschen.

c Luce 5.a.4

+ Menichte van visschen.

7

So seyde de Discipel, ^d welcken Iesus lief hadde, tot Petrum: Het is de Heere. Doe nu Simon Petrus hoorde dat het de Heere was, omgordde hy zijn opperkleedt (want hy was naect) ende wierp hemseluen in de Zee.

d Ioannis 13.c.23 ende 20.a.2

8

Ende de andere Discipulen quamen met het schipken (want sy en waren niet verre vanden lande, maer ontrent twee hondert ellen) treckende het net met den visschen.

9

Ende als sy wt traden op het lant, saghen sy een koolvyer ligghen, ende visch daer op gheleyt, ende broot.

B.10

^e Iesus seyde tot hen: Brengt vanden visschen die ghy nu gheuanghen hebt.

e Luce. 24.e.40

11

Simon Petrus ghinck op, ende track het net aent lant vol groote visschen, hondert ende dry ende vijftich. Ende hoewel datter so vele waren, so en scheurde het net niet.

12

Iesus seyde tot hen: Koemt, eet het middachmael. Ende niemant van de Discipulen en dorste hem vraghen: Wie bistu? de wijle sy wisten dat het de Heere was.

13

So quam dan Iesus, ende nam het broot, ende ^f† gaf het hen, ende desghelijcks den visch.

f† Anders, ende doe hy danck gheseyt hadde, gaf etc.

14

Dit was nu het derdemael dat Iesus hem synen Discipulen openbaerde, na dat hy vanden dooden opghestaen was.

15

Als sy dan het middachmael ghedaen hadden, seyde Iesus tot Simon Petrus: Simon ^* Iona [soon] hebstu my lieuer dan dese? Hy seyde tot hem: Ia Heere, du wetest dat ick dy lief hebbe. Hy seyde tot hem: Weydet myne lammeren:

* Anders, Ioanna

16

Hy seyde andermael: Simon Iona [soon] hebstu my lief? Hy seyde tot hem: Ia Heere, du wetest, dat ick dy lief hebbe. Hy seyde tot hem: ^g Hoedt myne schapen.

g Dat is, zijt een Herder myner schapen.

17

Hy seyde derdemael tot hem: Simon Iona [sone] hebstu my lief? Petrus wert bedroeft dat hy derdemael tot hem seyde: Hebstu my lief? ende seyde tot hem: ^h Heere, du wetest alle dinck, du wetest dat ick dy lief hebbe. Iesus seyde tot hem: Weydet myne schapen.

h Ioan. 16.d.30

18

ⁱ Voorwaer voorwaer segghe ick dy, ⁺ als du iongher warest, so gorddestu dy seluen, ende wandeldest waer du wildest: maer als du salt oudt wesen, saltu dyne handen wtstrecken, ende een ander sal dy gorden, ende leyden waer du niet salt willen.

i Ioannis 13.d.36 Actuum 12.a.4 2.Petri 1.b.14

+ Petri doot. wort voorseyt.

19

Dit seyde hy, beteeckenende met wat doot hy God ^k verklaren soude. Ende als hy dit ghesproken hadde, seyde hy tot hem: Volcht my na.

k Oft, vereerlicken

C.20

Als Petrus hem omkeerde, ⁺ sach hy ^l den Discipel volghen welcken Iesus lief hadde, welck oock in het Auontmael op zijn borst viel, ende seyde: Heere, wie ist die dy verraedt?

+ Ioannes.

l Ioannis 13.c.23. ende 20.a.2. ende 21.a.7.

21

Als Petrus desen sach, seyde hy tot Iesum: Heere, wat sal dese?

22

Iesus seyde tot hem: Of ick wil dat hy blijue tot dat ick kome, wat gaet het dy aen? Volcht du my na.

23

So ghinck dan dit woort wt onder den broederen, dat die Discipel niet ^m steruen en soude. Ende Iesus en hadde hem niet gheseyt ⁿ dat hy niet steruen en soude: maer, of ick wil dat hy blijue tot dat ick kome, wat gaet het dy aen?

m Griecx, sterft.

n Griecx, dat hy niet sterft:

24

Dit is de Discipel die van dese [dinghen] ghetuycht, ende dit gheschreuen heeft: ende wy weten dat zijn ghetuyghenisse warachtich is.

25

^o Ende daer zijn vele andere [dinghen] die Iesus ghedaen heeft, welcke somense elck bysonder beschreue, ick meyne dat de werelt de gheschreuen boecken niet vaten en soude. Amen.

o Ioan. 20.d.30