Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Het ghebet Christi tot synen Uader, so wel voor hem, als voor syne Apostelen, ende alle gheloouighe.

A.1

DIt sprack Iesus, ende hief zijn ooghen op na den Hemel, ⁺ ende seyde: Vader, ^a de vre is gekomen, ^b verklaert dynen Sone, op dat oock dijn Sone dy verklare.

+ Christi gebet.

a Ioannis 12.c.23 ende 13.d.32

b Of, vereerlickt

2

^c Ghelijck du hem macht gegeuen hebst ouer alle vleesch, op dat hy allen den ghenen die du hem ghegheuen hebst, het eewighe leuen geue.

c Matthei 11.c.27. ende 28.b.18 Luce 10.c.22 Ioannis 3.d.35 1.Corinth. 1.c.25 Philip 2.b.10 Hebr. 2.a.8 Psalm. 8.a.7

3

^d Ende dit is het eewige leuen, dat sy dy kennen alleen den eenighen warachtighen God, ende Iesum Christum, welcken du ghesonden hebst.

d Esaie 53.b.11 Ieremie 9.c.23

4

^e Ick hebbe dy ^f verklaert op der Aerden: ick hebbe voleyndt het werck dat du my ghegeuen hebst te doen.

e Ioannis 19.d.30

f Oft, vereerlickt

5

^g Ende nu ^h verklaert my du Vader by dy seluen met der klaerheyt die ick hadde by dy eer de werelt was.

g Ioan. 10.d.30 ende 14.a.9

h Of, vereerlickt

6

Ich hebbe dynen naem den menschen gheopenbaert, die du my vander werelt ghegheuen hebst: sy waren dyne, ende du hebtse my ghegeuen, ende sy hebben dijn woort ghehouden.

7

Nu hebben sy bekent, dat al wat du my ghegheuen hebst van dy is.

8

Want de woorden die du my ghegeuen hebst, hebbe ick hen ghegheuen: ende sy hebbense ontfanghen, ⁱ ende hebben warachtelick bekent dat ick van dy wtghegaen ben, ende hebben ghelooft dat du my ghesonden hebst.

i Ioannis 16.c.27

9

Ick bidde voor hen: ⁺ Ick en bidde niet voor de werelt, maer voor de ghene die du my ghegheuen hebst, want sy zijn dyne.

+ Christus bidt voor de Apostelen.

B.10

^k Ende al wat mijn is, dat is dyne, ende wat dijn is, dat is myne, ende ick ben in hen ^l verklaert.

k Ioannis 16.b.15

l Of, vereerlickt

11

Ende ick en ben niet meer in de werelt: maer dese zijn in de werelt, ende ick kome tot dy, Heylighe Vader, bewaertse in dynen name die du my ghegheuen hebst, op dat sy een zijn, ghelijck als wy.

12

^m Als ick met hen in de werelt was, doe bewaerde ickse in dynen name: ⁿ die du my ghegheuen hebst, hebbe ick bewaert, ende niemant van hen en is verloren, dan de sone der verderffenisse, ^o op dat de Schrift veruult worde.

m Ioannis 6.d.39 ende 10.c.28 ende 18.a.9

n Esaie 8.b.18 Hebr. 2.b.13

o Psalm. 109.a.8

13

Maer nu kome ick tot dy, ende spreke dit in de werelt, op dat sy myne volkomen blijschap in henseluen hebben.

14

Ick hebbe hen dijn woort ghegheuen, ^{+ p} ende de werelt heeftse ghehaet: want sy vander werelt niet en zijn, ghelijck ick van de werelt niet en ben.

+ De Apostelen ghehaet in de Werelt.

p Ioan. 15.b.19.

15

Ick en bidde niet dat du hen wt der werelt nemest: maer dat du hen bewaerst vanden boosen.

[fol. 42v]

16

Sy zijn vander werelt niet, ghelijck ick vander werelt niet en ben.

17

Heylichtse in dyne waerheyt: ^q dijn woordt is de waerheyt.

q Ioan. 8.e.40

18

^r Ghelijck du my ghesonden hebst in de werelt, also hebbe ick hen oock in de werelt gesonden.

r Ioannis 20.c.21

19

^s Ende ick heylighe myseluen voor hen, op dat sy ock gheheylicht worden inder waerheyt.

s 1.Corint. 2.d.30 1.Thess. 4.a.7

C.20

Ende ick en bidde niet alleen voor hen, ⁺ maer oock voor de ghene, die door haer woort in my gheloouen sullen:

+ Christi ghebet voor ons.

21

Op dat sy alle een zijn, ghelijck du Vader in my, ende ick in dy, ^t op dat sy oock in ons een zijn, op dat de werelt ghelooue dat du my ghesonden hebst.

t Galat. 3.c.28

22

Ende ick hebbe hen ghegheuen de klaerheyt die du my ghegheuen hebst, op dat sy een zijn, ghelijck wy een zijn.

23

Ick in hen, ende du in my, op dat sy volmaect zijn in een: ende op dat de werelt bekenne dat du my ghesonden hebst, ende hebtse lief ghehadt, ghelijck du my lief ghehadt hebst.

24

Vader, ^u ick wil dat waer ick ben, oock die by my zijn, die du my ghegheuen hebst, op dat sy myne klaerheyt aenschouwen, die du my ghegheuen hebst: want du hebst my lief ghehadt, eer des werelts gront gheleyt was.

u Ioan. 12.c.26 ende 14.a.3

25

Rechtueerdige Vader, ^x de werelt en heeft dy niet bekent, maer ick hebbe dy bekent, ^y ende dese hebben bekent dat du my ghesonden hebst.

x Ioannis 15.c.21. ende 16.a.3

y Ioan. 16.c.27. ende 17.a.8

26

Ende ick hebbe hen dynen name bekent ghemaeckt, ende sallen bekent maken, op dat de liefde daer du my mede lief ghehadt hebst, in hen zy, ende ick in hen.