Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Christus vertroost de syne, 12. vermaentse tot ghelooue ende bedinghe, 13. bewijst hen zijn ampt, 26. ende laet hen synen Gheest, ende synen vrede.

A.1

VWe ^a† herte en worde niet beroert, ^b ghi ghelooft in God, gelooft oock in my.

a† Anders, ende hy seyde tot syne Discipulen, uwe herte, etcet.

b Of, gelooft in God, ende gelooft in my, of, ghelooft ghy in God, so gelooft oock in my.

2

In mijns Vaders huys zijn vele wooningen: ware het also niet, ick soude v doch gheseyt hebben, ick gae henen v plaetse te bereyden.

3

Ende indien ick gae v plaetse bereyden, ^c ick sal wederom keeren, ende sal v tot my nemen, ^d op dat ghy oock zijt waer ick ben.

c Of, so sal ick

d Ioannis 12.c.26 ende 17.c.24

4

Ende waer ick henen gae, dat weet ghy, ende ghy weet den wech.

5

Thomas seyde tot hem: Heere, wy en weten niet waer du henen gaest: ende hoe konnen wy den wech weten?

6

Iesus seyde tot hem: ^e Ick ben de wech, ^f de waerheyt ende het ^g leuen: ^h Niemant en koemt tot den Vader dan door my.

e Hebr. 9.a.8

f Esaie 53.a.9. 1.Petri 2.c.22

g Ioannis 1.a.4 ende 11.c.25

h Ioannis 10.a.9

7

Waert dat ghy my gekent hadt, so soudt ghy oock den Vader ghekent hebben: ende van nu voort kent ghy hem, ende hebt hem ghesien.

8

Philippus seyde tot hem: Heere, thoont ons den Vader, ende het is ons ghenoech.

9

Iesus seyde tot hem: Ben ick so lange tijt met v, ende hebstu my niet ghekent Philippe? ⁱ Wie my ghesien heeft, ⁺ die heeft oock den Vader ghesien: Ende hoe segstu: thoont ons den Vader?

i Ioannis 10.d.30

+ Christus ende de Vader zijn een.

B.10

Gheloofstu niet, ^k dat ick in de Vader [ben] ende dat de Vader in my is? ^l De woorden die ick tot v spreke, en spreke ick van my seluen niet: ^m maer de Vader die in my ^* woont, die doet de wercken.

k Ioannis 16.d.32

l Ioannis 7.b.16 ende 8.c.28 ende 12.e.49 ende 14.c.24 ende 16.b.15

m Ioannis 5.b.17

* Griecx, blijft,

11

Ghelooft my, dat ick in den Vader ben, ende de Vader in my: of anders, ghelooft my om der wercken wille.

12

ⁿ Voorwaer voorwaer segghe ick v, die in my ghelooft, de wercken die ick doe, sal hy oock doen, ende sal meerder doen dan dese: want ick gae tot den Vader.

n Matthei 21.c.21 Luce 17.a.6

13

^o Ende wat ghy in mynen naem begheeren sult, dat sal ick doen, op dat de Vader in den Sone ^p verklaert worde.

o Ieremie 29.b.12 Matthei 7.a.7 Marci 11.c.24 Luce 11.a.9 Ioannis 15.a.7 ende 16.c.24 Iacobi 1.a.5 1.Ioannis 3.c.22

p Of, vereerlickt

14

So ghy yet begheert in mynen naem, dat sal ick doen.

15

^q Ist dat ghy my lieft hebt, so houdt myne gheboden.

q Ioan. 14.c.21.23 ende 15.b.10 1.Ioannis 5.a.3 Syrach 2.c.21

16

Ende ick sal den Vader bidden, ende hy sal v eenen anderen Trooster gheuen, op dat hy in eewicheyt by v blijue.

17

[Namelick] den Gheest der waerheyt, welcken de werelt niet en kan ontfangen, ⁺ want sy en siet hem niet, noch en kent hem niet: maer ghy kent hem, want hy woont by v, ende sal in v wesen.

+ De heylighe Gheest is een Trooster.

18

^r Ick en sal v gheen weesen laten: ick sal tot v komen.

r Matthei 28.c.20

[fol. 41v]

19

Noch een weynich, ende de werelt ^s en sal my niet meer sien: maer ghy sult my sien: want ick leue, ende ghy sult leuen.

s Griecx, siet my

C.20

In dien daghe sult ghy bekennen, dat ick in den Vader ben, ende ghy in my, ende ick in v.

21

Wie myne geboden heeft, ende de selue houdt, die ist die my lief heeft, ⁺ ende die my lief heeft, ^t dien sal mijn Vader lief hebben: ende ick sal hem lief hebben, ende sal hem my seluen openbaren.

+ Christum lief hebben.

t Griecx, die sal van mynen Uader ghelieft worden:

22

Doe seyde hem Iudas (niet die Iscarioth,) Heere, wat is het, dat du dy seluen ons openbaren salt, ende niet der werelt.

23

Iesus antwoordde, ende seyde tot hem: So yemant my lief heeft, die sal mijn woort houden: ende mijn Vader sal hem lief hebben, ende wy sullen tot hem komen, ende wooninghe by hem maken.

24

Wie my niet lief en heeft, die en houdt mijn woort niet: ^u ende het woort dat ghy hoort, en is myne niet, maer des Vaders die my ghesonden heeft.

u Ioannis 7.b.16 ende 8.c.28 ende 12.e.49 ende 14.b.10 ende 16.b.15

25

Dit hebbe ick gheseyt by v blijuende.

26

^x Maer de Vertrooster de heylighe Gheest, den welcken de Vader senden sal in mynen naem, ^y die sal v alle [dinghen] leeren, ende indachtich maken, al wat ick v gheseyt hebbe.

x Ioannis 15.c.26 ende 16.a.7 Actuum 2.a.4 Luce 24.e.49

y Ioannis 16.b.13

27

Vrede late ick v, ^z mynen vrede gheue ick v, niet gelijckerwijs de werelt geeft, geue icken v: uwe herte en worde niet beroert noch veruaert.

z Philip. 4.a.7

28

^a Ghy hebt ghehoort, dat ick v gheseyt hebbe: Ick gae henen, ende sal tot v komen. Hadt ghy my lief, so soudt ghy v doch verblijden, om dat ick gheseyt hebbe, Ick gae tot den Vader: want mijn Vader is meerder dan ick.

a Ioannis 14.a.3

29

^b Ende nu hebbe ickt v gheseyt, eer het gheschiet, op dat ghy ghelooft, als het gheschiet is.

b Ioannis 13.b.19 ende 16.a.4.

D.30

Ick en sal niet veel meer met v spreken: ^{+ c} de Ouerste deser werelt koemt, ende ^d† heeft in my niet.

+ De Prince der Werelt.

c Ioannis 12.d.31

d† Anders, sal niet in my vinden.

31

Maer op dat de werelt bekenne, dat ick den Vader lief hebbe, ende dat ick also doe ghelijck my de Vader beuolen heeft: staet op, laet ons van hier gaen.