Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

3. Christus ontschuldicht het werck Marie, 14. rijdt te Ierusalem in op eenen Ezel. 20 Sommighe Griecken begheeren hem te sien, 28. De Uader gheeft oock ghetuyghenisse van hem, 36 ende vermanende eenen yeghelicken tot gheloouen, 37. vint wederspannicheyt in velen.

A.1

SEs ^a daghen dan voor het Pascha, ⁺ quam Iesus tot Bethania, daer Lazarus was de ghestoruene, welcke hy opghewect hadde van de dooden.

a Matthei 26.a.6 Marci 14.a.3 Luce 7.d.37 Ioannis 11.a.2

+ Christus is tot Martha ter maeltijdt met Lazaro

2

So bereydden sy hem daer een Auontmael, ende Martha diende: ende Lazarus was een der ghenen die met hem ter tafel aensaten.

3

Doe nam Maria een pont onuerualschter kostelicker Nardensalue, ⁺ ende salfde de voeten Iesu, ende droochde zijn voeten met haren hayre, ende het huys wert vol vanden reucke der saluen.

+ Maria salft de voeten Iesu.

4

So seyde een van syne Discipulen, Iudas Simonis Iscarioth, die hem soude verraden:

5

Waerom is dese salue niet verkocht om drye hondert penningen, ⁺ ende den armen gegeuen?

+ Bedeckte giericheyt.

6

Ende dit seyde hy, niet dat hy sorghe voor den armen hadde, maer om dat hy een Dief was, ende ^b hadde de borse, ende droech het ghene dat ghegheuen wert.

b Ioannis 13.c.29

7

So seyde Iesus: Laetse [met vreden] ^c† sy heeft dit bewaert tot den dach mijnder begrauinghe.

c† Anders, op dat sy dat beware, etc.

8

Want de armen hebt ghy altijt met v, maer my en hebt ghy niet altijt.

9

So vernamen een groote schare der Ioden, dat hy daer ^d was, ende en quamen niet om Iesus wille alleenlick, maer oock op dat sy Lazarum sien souden, ^e welcken hy van de dooden opgheweckt hadde.

d Griecx, is.

e Ioan. 11.e.44

B.10

Ende de Ouerpriesters hielden raet, dat sy oock Lazarum doodden.

11

Want om synent wille ginghen vele Ioden henen, ⁺ ende gheloofden in Iesum.

+ De Priesters willen oock Lazarum dooden.

12

^f Des anderen daechs hoorde een groote schare die op het Feest gekomen was, dat Iesus na Ierusalem quam.

f Matthei 21.a.8 Marci 11.a.8 Luce 19.d.36

13

Ende namen Palmtacken, ende ginghen wt hem te ghemoete, ende riepen: ^g Hosanna ^h gheseghent zy die daer koemt in den naem des Heeren, de Koninck Israel.

g Psalm. 118.c.26.

h Of, ghepresen

14

Ende Iesus vandt een Ezelken, ⁺ ende sat daer op, ghelijck gheschreuen is,

+ Iesus rijdt op den Ezel te Ierusalem in.

15

ⁱ Vreest niet du dochter Sion: Siet, dijn Ko-

i Esaie 26.b.11 Zach. 9.a.9

[fol. 40v]

ninck koemt, sittende op een veulen eener Ezelinnen.

16

Ende dit en verstonden syne Discipulen eerstmael niet: maer als Iesus verclaert was, doe gedachten sy, dat sulcks van hem geschreuen was, ende dat sy hem sulx ghedaen hadden.

17

So gaf de schare ghetuyghenisse die met hem was, als hy Lazarum wt den graue riep, ende hem van de dooden opweckte.

18

Daerom quam hem oock de schare te gemoet, want sy gehoort hadden, dat hy dat teecken gedaen hadde.

19

So seyden dan de Phariseen ^k onder malcanderen: ^l Ghy siet dat ghy niet en voordert: Siet, de werelt is hem na ghegaen.

k Griecx, tot

l Ioannis 11.e.47

C.20

Ende daer waren sommighe Griecken onder de ghene die ^m opghekomen waren om te aenbidden op het Feest.

m Actuum 8.c.26

21

Dese dan ginghen tot Philippum, ⁿ die van Bethsaida wt Galilea was, ende baden hem, segghende: Heere, wy ^o begheeren Iesum te sien.

n Ioannis 1.e.44

o Griecx, willen

22

Philippus quam, ende seydet Andree: ende wederom Philippus ende Andreas seydent Iesu.

23

Ende Iesus antwoordde hen, segghende: De vre is ghekomen, ^p dat de Sone des menschen ^q verklaert worde.

p Ioannis 13.d.32 ende 17.a.2

q Of, vereerlickt.

24

Voorwaer voorwaer segge ick v, ^* ten zy dat het tarwen koren in de Aerde valle, ende versterue, so blijft het alleen: maer indien het sterft, so draecht het veel vrucht.

* 1.Corin. 15.d.36

25

^r Wie zijn ^† leuen lief heeft, die salt verliesen: Ende wie zijn leuen haet in dese werelt, die salt ten eewighen leuen bewaren.

r Matth. 10.d.39 ende 16.c.25 Marci 8.d.34. Luce 9.c.24 ende 17.d.33

† Griecx, ziele.

26

So my yemant dient, die volghe my na, ^s ende waer ick ben, daer sal oock mijn Dienaer wesen: ende so my yemant dient, de Vader sal hem eeren.

s Ioannis 14.a.3 ende 17.c.24

27

^t Nu is mijn siele beroert, ende wat sal ick segghen? Vader, helpt my wt deser vre: Maer daerom ben ick in dese vre ghekomen.

t Matthei 26.d.37 Marci 14.d.34 Luce 22.e.44

28

Vader verklaert dynen naem. So quam daer een stemme wt den Hemel [segghende:] Ende ick hebbe hem verklaert, ende sal hem weder verklaren.

29

De schare dan die daer stont, ende [dat] ghehoort hadde, seyde, dat een donderslach geschiet was. Andere seyden: Een Engel heeft met hem ghesproken.

D.30

Iesus antwoordde, ende seyde: ^u Dese stemme en is om mynent wille niet gheschiet, maer om uwent wille.

u Ioan. 11.e.42

31

^x Nu is het oordeel der werelt: ^y Nu sal de Ouerste deser werelt wtgheworpen worden.

x Ioannis 16.b.11 Coloss. 2.b.15

y Ioan 14.d.30

32

^z Ende wanneer ick sal verhoocht wesen van der Aerden, so sal ickse alle tot my seluen trecken.

z Numeri 21.a.9 2.Regum 18.a.4 Ioannis 3.b.14 ende 8.c.28.

33

Dit seyde hy, beteeckenende wat doot hy steruen soude.

34

De schare antwoordde hem: Wy hebben wt der Wet ghehoort, ^a dat Christus in der eewicheyt blijft: ende hoe segstu dat de Sone des menschen moet verhoocht worden? Wie is dese Sone des menschen?

a 2.Sam. 7.b.16 1.Para 22.b.10 Psalm. 45.a.7 ende 89.d.36 ende 110.a.4 Esaie 9.a.7 Ieremie 23.a.6 Ezech. 37.c.26 Danielis 3.l.110 ende 7.b.14.c.27 Mich. 4.a.7 Hebr. 1.a.8

35

Doe seyde Iesus tot hen: ^b Een kleyne tijt is het licht by v, ^c wandelt so langhe als ghy het licht hebt, op dat v de duysternisse niet en beuanghe. Want wie in duysternisse wandelt, die en weet niet waer hy henen gaet.

b Ioannis 1.a.9 ende 8.b.12 ende 9.a.5 ende 12.e.46

c Ieremie 13.b.16 Ephe. 5.a.8. 1.Thess. 5.a.4

36

De wijle ghy het licht hebt, ghelooft in het licht, op dat ghy kinderen des lichts worden moecht. Dit seyde Iesus, ende ginck wech, ende verberch hem.

37

Ende hoewel hy so veel teeckenen voor hen ghedaen hadde, so en geloofden sy niet in hem:

38

Op dat het woort Esaie des Propheten veruult worde, dat hy ghesproken heeft: ^d Heere, wie heeft onse ^e woorden ghelooft, ende wien is den arm des Heeren gheopenbaert?

d Esaie 53.a.1 Roman. 10.b.16

e Griecx, gehoort

39

Daerom en konden sy niet gheloouen, want Esaias wederom seyt:

E.40

^f Hy heeft hare ooghen verblint ende haer herte verhardt, op dat sy met de oogen niet en sien, ende met der herten verstaen, ende bekeert worden, ende dat ickse ghesont make.

f Esaie 6.a.9 Ezech. 12.a.2 Matth. 13.b.14 Marci 4.b.12 Luce 8.b.10 Actuum 28.c.26 Roman. 11.a.8

41

Dit seyde Esaias, als hy syne eerlicheyt sach, ende sprack van hem.

42

^g Nochtans gheloofden oock vele vanden Ouersten in hem: ⁺ maer om der Phariseen wille en beleden zijt niet, ^h op dat sy niet wt der vergaderinghe verworpen worden.

g Ioan. 7.b.13.e.48

+ De Ouersten die gheloouen, belijdent niet, vreesende den Ban.

h Ioannis 9.c.22

43

ⁱ Want sy hadden de eere der menschen lieuer, dan de eere Gods.

i Ioannis 5.e.44

44

Ende Iesus riep, ende seyde: Wie in my ghelooft, die ghelooft in my niet, maer in den ghenen die my ghesonden heeft.

45

^k Ende wie my siet, die siet den genen die my ghesonden heeft.

k Ioan. 10.d.30 ende 14.a.9.

46

^l Ick ben een licht in der werelt ghekomen, op dat so wie in my ghelooft, niet in de duysternisse en blijue.

l Ioannis 1.a.9 ende 8.b.12 ende 9.a.5. ende 12.d.35 Esaie 42.a.6 ende 49.a.6 Actuum 13.e.47

47

Ende so yemant myne woorden hoort, ende niet en ghelooft, Ick en ^m verdoeme hem niet, ⁿ want ick en ben niet ghekomen om de werelt te ^o verdoemen: maer om de werelt salich te maken.

m Griecx, oordeele

n Ioaunis 3.b.17 ende 9.d.39

o Griecx, oordeelen:

48

^p Wie my verworpt, ende myne woorden niet en ontfangt, die heeft eenen die hem oordeelt: het woort dat ick gesproken hebbe, dat sal hem oordeelen ten wtersten daghe.

p Ioanis 3.b.18 ende 8.c.24

49

^q Want ick en hebbe wt my seluen niet ghesproken, maer de Vader die my gesonden heeft, die heeft my een ghebot ghegeuen, wat ick spreken, ende wat ick segghen sal.

q Deut. 18.b.18 Ioannis 3.b.11 ende 5.c.20 ende 7.b.16 ende 8.c.28 ende 14.b.10.c.24 ende 16.b.13

50

Ende ick weet dat zijn ghebot het eewighe leuen is. So wat ick dan spreke, dat spreke ick ghelijck my mijn Vader gheseyt heeft.