Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Het eynde der ghesontmakinghe, 30. de opentlicke belijdinghe des blintgheborenen, 39. wat blinde Christus siende maeckt.

A.1

ENde voorby gaende, ⁺ sach hy eenen mensche blint vander gheboorten aen.

+ Die blint gheboren was, wordt siende.

2

Ende syne Discipulen vraechden hem, seggende: Rabbi, wie heefter ghesondicht? dese, oft syne Ouders, dat hy blint gheboren is?

3

Iesus antwoordde: ⁺ Noch dese heeft ghesondicht, noch syne Ouders: ^a maer op dat de wercken Gods in hem souden geopenbaert worden.

+ Oorsaecke der blintheyt.

a Ioannis 11.a.4

4

^b Ick moet wercken de wercken des ghenen die my ghesonden heeft, so langhe als het dach is: de nacht koemt wanneer niemant wercken en kan.

b Ioannis 5.b.19.

5

So langhe ick in de werelt ben, ben ick ^c het licht der werelt.

c Ioannis 1.a.9 ende 8.b.12 ende 12.d.35.e.46 Esaie 42.a.6. ende 49.a.6 Luce 2.d.32 Actuum 13.e.47

6

Als hy dit gheseyt hadde, spooch hy opter

[fol. 39r]

Aerden, ende maecte slijck wt dat speecsel, ende smeerde dat slijck op de ooghen des blinden,

7

Ende seyde tot hem: Gaet henen, wascht dy in het baedwater Siloe, welck wtgheleyt wort, wtghesonden. Doe ginck hy henen, ende wiesch hem, ende quam siende.

8

De ghebueren dan, ende die hem te voren ghesien hadden dat hy ^d† blint was, seyden: Is dese niet die daer sat ende bedelde?

d† and. bedelaer.

9

De andere seyden: Hy ist: De andere: Hy is hem ghelijck. Hy seyde: Ick bent.

B.10

Doe seyden sy tot hem: Hoe zijn dy dyne ooghen gheopent?

11

Hy antwoordde en seyde: Die mensche die Iesus ghenaemt is, maeckte slijck, ende besmeerde myne oogen, ende seyde tot my: Gaet henen tot het baedwater Siloe, ende wascht dy: ende ick ginck henen ende wiesch my, ende wert siende.

12

Doe seyden sy tot hem: Waer is die? Hy seyde: Ick en weets niet.

13

Sy brachten hem tot de Phariseen, hem [namelick] die te voren blint gheweest hadde.

14

^e Ende het was Sabbath, als Iesus het slijck maecte, ende hem syne ooghen opende.

e Ioannis 5.a.9 Matthei 12.a.1. Marci 2.c.23 Luce 6.a.1

15

Doe vraechden hem oock de Phariseen wederom, ⁺ hoe hy siende gheworden was. Ende hy seyde tot hen: Hy leyde slijck op myne ooghen, ende ick wiesch my, ende ick sie.

+ De Phariseen onderuraghen den blinden.

16

Doe seyden sommighe vanden Phariseen: Dese mensche en is van Gode niet: want hy en houdt den Sabbath niet. ⁺ Andere seyden: ^f Hoe kan een sondich mensche sulcke teeckenen doen: ^g ende daer was tweedracht onder hen.

+ Tweedracht van Christo.

f Ioannis 3.a.3 ende 9.d.33

g Ioannis 7.b.12 ende 10.b.19

17

Sy seyden wederom tot den blinden: Wat segstu van hem, dat hy dyne oogen geopent heeft? Doe seyde hy: ^h Hy is een Propheet.

h Luce 7.b.16 ende 24.b.19 Ioannis 4.b.19. ende 6.b.14

18

So en gheloofdent de Ioden niet van hem dat hy blint gheweest hadde, ende siende was gheworden, tot dat sy gheroepen hadden de ouders des ghenen die siende gheworden was:

19

Ende vraechden hen, segghende: Is dese uwe sone, welcken ghy segt, dat hy blint gheboren is? Hoe siet hy dan nu?

C.20

Syne ouders antwoordden hen, ende seyden: Wy weten dat dese onse sone is, ende dat hy blint gheboren is:

21

Maer hoe hy nu siet, en weten wy niet, oft wie syne ooghen gheopent heeft, en weten wy niet. Hy heeft [syne] ouderdom, vraecht hem, hy sal van hemseluen spreken.

22

Dit seyden de ouders, daerom dat sy de Ioden vreesden: ^{+ i} want de Ioden hadden nu ouer een ghedraghen, so hem yemant belede dat hy Christus ware, dat die wt de vergaderinghe soude gheworpen worden.

+ Die Christum belijden die worden verbannen.

i Ioannis 11.f.57 ende 12.e.42

23

Daerom seyden syne ouders: Hy heeft [zijn] ouderdom, vraecht hem.

24

Doe riepen sy andermael den mensche die blint gheweest hadde, ende seyden hem: ^k Gheeft Gode eere: wy weten dat dese mensche een sondaer is.

k Iosu. 7.b.19

25

So antwoordde hy, ende seyde: Of hy een sondaer is en weet ick niet: een [dinck] weet ick, dat ick blint was, ende nu sie ick.

26

Ende sy seyden wederom tot hem: Wat dede hy dy? Hoe heeft hy dyne ooghen gheopent?

27

Hy antwoordde hen: Ick hebt v nu gheseyt, ende ^l ghy en hebbet niet gehoort: wat wilt ghy wederom hooren? wilt ghy oock syne Discipulen worden?

l Ofte, hebt ghijt niet ghehoort? of, ghy hebbet ghehoort:

28

Doe beschimpten sy hem, ende seyden: Weest du zijn Discipel: ⁺ wy zijn Mosis Discipulen.

+ Mosis Discipulen.

29

Wy weten dat God met Moses ghesproken heeft: maer desen en weten wy niet van waer hy is.

D.30

Die mensche antwoordde ende seyde tot hen: Dit is een wonderlick dinck, dat ghy niet en weet waer hy is, ende [nochtans] hy heeft myne ooghen gheopent.

31

Wy weten ^m dat God de sondaren niet en hoort: ⁺ maer so yemandt Godvruchtich is, ⁺ ende synen wille doet, dien hoort hy.

m Mich 3.a.4.

+ Sondaers.

+ Goduruchtige

32

Het en is vanden beginne der werelt aen niet ghehoort, dat yemandt eens blintgheborenen ooghen gheopent heeft.

33

ⁿ So dese van God niet en ware, so en hadde hijt niet konnen ghedoen.

n Ioannis 3.a.8 ende 9.b.16

34

Sy antwoordden, ⁺ ende seyden tot hem: Du bist gheheel in sonden gheboren, ende leerstu ons? Ende sy wierpen hem wt.

+ Phariseische hooueerdicheyt.

35

Iesus hoorde dat sy hem wtgheworpen hadden: ende doe hy hem vant, seyde hy tot hem: Gheloofstu inden Sone Gods?

36

Hy antwoordde, ende seyde: Wie is hy Heere, op dat ick in hem ghelooue?

37

Ende Iesus seyde tot hem: Ende du hebst hem ghesien, ^o ende die met dy spreect, die ist.

o Ioannis 4.c.16

38

Ende hy seyde: Ick gelooue Heere: ende aenbadt hem.

39

Ende Iesus seyde: ^{+ p} Tot een oordeel ben ick in de werelt ghekomen, ^q op dat die niet en sien, siende worden: ende die sien, blint worden.

+ Christus stelt zijn oordeel tegen den Phariseischen Ban.

p Ioanns 3.b.17 ende 12.e.47

q Matthei 13.b.13

E.40

Ende dit hoorden sommighe vanden Phariseen, die by hem waren, ende seyden tot hem: Zijn wy oock blint?

41

Iesus seyde tot hen: Waert ghy blindt, so en soudt ghy doch gheen sonde hebben: maer nu segt ghy: Wy sien: daerom blijft uwe sonde.