Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Christus verandert water in wijn, 17. drijft de verkoopers wt den Tempel, 19. voorseyt zijn doot ende opstandinghe, 23. ende bekeerter vele, 24. betrout de menschen niet.

A.1

ENde ten derden dage wert daer een bruyloft [ghehouden] in Cana Galilee: ⁺ ende de moeder Iesu was daer.

+ Water wort in wijn verandert in de bruyloft.

2

Ende Iesus was oock ghenoodt, ende syne Discipulen, totter bruyloft.

3

Ende als daer wijn gebrack, seyde de moeder Iesu tot hem: Sy hebben gheenen wijn.

4

Ende Iesus seyde tot haer: Vrouwe, ^a wat hebbe ick met dy te doen? Mijn vre is noch niet gekomen.

a Of, Wat is my ende dy? of, Wat gaet het my ende dy aen?

5

Zijn moeder seyde tot de Dienaers: Wat hy v seyt, dat doet.

6

Ende daer waren ses steenen watervaten geset, ^b na der Ioden reyninghe, ende hielden elck twee of drye ^c metreeten.

b Marci, 7.a.5

c Metreta was ontrent een Kentsche ame.

7

Ende Iesus seyde tot hen: Vult die water vaten met water. Ende sy vuldense tot bouen.

8

Ende hy seyde tot hen: Schept nu, ende draghet tot den Opperdischmeester: Ende sy droeghent.

9

Ende als de Opperdischmeester dat water dat wijn gheworden was, geproeft hadde, ende wiste niet van waer [de wijn] ghekomen was (maer de Dienaers die het water gheschept hadden, die wistent) so riep de Opperdischmeester den bruydegom:

B.10

Ende seyde tot hem: Alle man set eerst den goeden wijn, ende als men wel ghedroncken is, dan de minsten: [maer] du hebst den goeden wijn tot nu toe behouden.

11

Dit beghin der teeckenen dede Iesus in Cana Galilee, ⁺ ende openbaerde syne eerlickheyt: ende syne Discipulen gheloofden in hem.

+ De eerlicheydt Christi.

12

Daer na quam hy af na Capernaum, ⁺ hy ende zijn moeder, ende syne broeders, ende syne Discipulen, ende bleuen daer niet vele daghen.

+ Christus te Capernaum.

13

Ende het Pascha der Ioden was na by: ende Iesus ghinck op na Ierusalem.

14

^d Ende hy vant in den Tempel die daer verkochten ossen, ende schapen, ende duyuen, ende de wisselaers sittende.

d Matthei 21.b.12 Marci 11.b.15 Luce 19.e.45

15

Ende hy maecte een gheessel van snoerkens, ⁺ ende dreefse alle wt den Tempel, oock de schapen ende ossen: ende der wisselaren ghelt storte hy wt, ende keerde de tafelen omme.

+ Christus worpt de koopers ende verkoopers wt den Tempel.

16

Ende seyde tot de ghene die daer duyuen verkochten: Weert dit van hier wech, ende maeckt niet van mijns Vaders huys, een koophuys.

17

Ende syne Discipulen werden gedachtich dat daer gheschreuen is: ^e Die vyerighe liefde dijns Huys heeft my verslonden.

e Psalm. 69.b.10

18

Doe antwoordden de Ioden, ende seyden tot hem: ^f Wat teecken bewijsestu ons ^g dat du dat doen moechst?

f Matthei 12.d.38 ende 16.a.1 Marci 8.b.11 Luce 11.c.29 Ioannis 6.d.30

g Griecx, dat du dat doest, of, want du doest dat.

19

Iesus antwoordde ende seyde tot hem: ^h Breect

h Matthei 26.g.61 ende 27.d.39 Marci 14.f.58 ende 15.c.29.

[fol. 35v]

desen Tempel, ende in dryen daghen sal ick hem oprechten.

C.20

So seyden hem dan de Ioden: Ses ende veertich iaer lanck wert desen Tempel ghetimmert, ende saltu hem in dry daghen oprichten?

21

Maer hy sprack van den Tempel zijns lichaems. ⁺

+ Den Tempel, dat is, het lichaem Christi, soude van den Ioden ghebroken werden.

22

Als hy nu opghestaen was van de dooden, werden de Discipulen zijns ghedachtich, dat hy dat gheseydt hadde: ende sy gheloofden de Schrift ende den woorde dat Iesus ghesproken hadde.

23

Ende als hy te Ierusalem was op het Pascha in het Feest, ⁺ vele gheloofden in synen naem die de teeckenen saghen die hy dede.

+ Vele geloouen aen Christum om de wonderdaden.

24

Maer Iesus betroude hemseluen hen niet, daerom dat hyse alle kende:

25

Ende dat hy niet en behoefde dat yemant getuyghenisse gaue van den mensche, ⁱ want hy wiste wat inden mensche was.

i 1.Sam. 16.a.7 2.Para. 28.a.9 Psalm. 7.b.10 ende 103.b.14 Ieremie 11.c.20 ende 17.b.10 ende 20.b.12