Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Uan erghernisse te schuwen, 3. synen naesten te vergheuen, 6. de kracht des gheloofs, 10. de nieticheyt des menschen, 12. ghenesinghe der thien melaetschen, 20. van de toekoemste des Koninckrijcks Gods door Christum.

A.1

ENde ^a hy seyde tot de Discipulen: ⁺ Het is onmoghelick dat daer gheen ergernissen komen: nochtans wee den ghenen, door welcken sy komen.

a Matthei 18.a.7 Marci 9.e.42

+ Van erghernissen.

2

Het ware hem beter dat eenen swaren ^b molensteen aen synen hals ghehangen worde, ende in de Zee gheworpen worde, dan hy ergherde eenen van desen kleynen.

b Grece, Ezelmolensteen.

3

Hoedt v seluen: ^{+ c} Indien dijn broeder teghen dy sondicht, so straft hem: ende indien hy hem bekeert, so vergheuet hem.

+ Dat wy onsen naesten moeten vergheuen.

c Matthei 18.b.15 Leuitici 19.b.17 Prouerb. 17.b.10 Syrach 19.b.13 Iacob. 5.a.9

4

Ende indien hy seuenmael des daechs tegen dy sondicht, ende seuenmael des daechs hem tot dy bekeert, ende seyt: Het is my leedt, so saltu het hem vergheuen.

5

Ende de Apostelen seyden tot den Heere: Vermeerdert ons het ghelooue.

6

Ende de Heere seyde: ^d Hadt ghy ghelooue [so groot] als een mostaert zaedt, ghy soudt tot desen ^e boom segghen, wordt ontwortelt, ende wort in de Zee gheplant: ende hy soude v ghehoorsaem wesen.

d Matth. 17.c.20 ende 21.c.21.

e Grece, Sicamino, ende het is een seker boom in Syria.

7

Wie isser onder v die eenen Dienstknecht heeft ploegende of de beesten hoedende, die hem, wanneer hy weder koemt wt den acker, terstont seyt, Gaet door ende sit aen de tafel.

8

Maer seyt hy hem niet [eerst] bereyt my het Auontmael, ende schort dy op, ende dient my, tot dat ick gheeten ende gedroncken hebbe: ende daerna saltu eten ende drincken?

9

Danckt hy oock den seluen Dienstknecht, dat hy gedaen heeft dat hem beuolen was? Ick meyne neen.

B.10

Also ghy oock, als ghy sult ghedaen hebben al wat v beuolen is, ⁺ so segt: Wy zijn onnutte Dienstknechten, wy hebben gedaen dat wy schuldich waren te doen.

+ Dat wy alle onnutte Dienstknechten zijn.

11

Ende het gheschiedde als hy na Ierusalem reysde, dat hy midden door Samariam ende Galileam tooch.

12

Ende als hy in een vleck quam, zijn hem thien melaetsche mannen te ghemoet ghekomen, de welcke stonden van verre:

13

Ende sy verhieuen hare stemme, ⁺ segghende: Iesu, Meester ontferme dy onser.

+ De thien melaetsche worden ghereynicht.

14

Ende als hyse sach, seyde hy tot hen: Gaet ende ^f verthoont v den Priesteren. Ende het geschiedde, doe sy henen ginghen werden sy ghereynicht.

f Leuitici 13.a.2 ende 14.a.2. Matthei 8.a.4 Luce 5.b.14

15

Ende een onder hen, siende dat hy gesont geworden was, keerde wederom, prijsende God met luyder stemmen:

16

Ende viel op zijn aensicht voor syne voeten, ⁺ hem danckende: ende dese was een Samaritaen.

+ De Samaritaen danct God voor de reyninghe.

17

Ende Iesus antwoordde ende seyde: Zijnder niet thiene ghereynicht? Ende waer zijn die neghen?

18

^g Zijn daer gheene gheuonden wederkeerende om Gode eere te gheuen, dan dese vreemdelinck?

g Of, daer zijn etc.

19

Ende hy seyde tot hem: Staet op ende gaet henen, dijn ghelooue heeft dy gheholpen.

C.20

Ende als hy van de Phariseen gheuraecht wert, ⁺ wanneer het Koninckrijcke Gods komen soude: antwoordde hy hen, ende seyde: Het Koninckrijcke Gods koemt niet met wterlicken gebare:

+ Wanneer het Koninckrijcke Gods koemt.

21

Noch men sal niet segghen: ^h Siet hier, of siet daer: want het Koninckrijcke Gods is ^* binnen in v.

h Matth. 24.c.23 Marci 13.c.21. Luce 21.a.7

* Of, onder v

22

Ende hy seyde tot syne Discipulen: De dagen sullen komen, dat ghy sult begheeren eenen van de dagen des Soons des menschen te sien, ende ghy sulten niet sien.

23

Ende sy sullen v segghen: Siet hier of siet daer: gaetter niet henen, noch volcht niet.

24

Want ghelijck de blixem van den eenen eynde des Hemels blixemt, ende schijnt tot den anderen eynde des Hemels: also sal oock de Sone des menschen wesen in synen daghe.

25

ⁱ Maer hy moet eerst vele lijden, ende verworpen worden van desen gheslachte.

i Matthei 16.c.21 ende 17.c.22 ende 20.b.18 Marci 8.d.31 ende 9.d.31 ende 10.d.33 Luce 9.c.22 ende 18.d.31. ende 24.a.6

26

^k Ende ghelijck het gheschiedde in de daghen Noe: also salt ooc wesen in die dagen des Soons des menschen:

k Matth. 24.c.27 Gene. 6.a.5 1.Petri 3.c.20

27

Sy aten, sy droncken, sy trouden, sy gauen te houwelicke, tot op dien dach dat Noe in de Arcke ghinck: ende de wateruloedt quam, ende verderfse alle.

28

Desghelijcks oock als het gheschiedde in de daghen Lots: Sy aten, sy droncken, sy kochten, sy verkochten, sy planteden, sy timmerden.

29

^l Ende ten daghe als Lot wt ghinck wt Sodoma, so regendet vyer ende solpher van den Hemel, ende verderfse alle.

l Gene. 19.c.24. Deuter. 29.c.23 Esaie 13.b.19 Ieremie 50.e.40 Ezechie. 16.e.49 Osee 11.a.8 Amos 4.b.12 Iude. a.7

30

Also salt in dien daghe wesen, wanneer de

[fol. 31r]

Sone des menschen ^m geopenbaert sal worden.

m Grece, gheopenbaert wert.

31

In dien seluen dage wie op het dack zijn sal, ende zijn ⁿ huysraet in huys: die kome niet neder dat te halen. Ende wie in den acker zijn sal, die keere oock desgelijcks niet na het ghene dat achter ghelaten is.

n Grece, Uaten, ende beduydt alle dingen diemen besicht.

32

^o Ghedenckt des wijfs Lots.

o Gene. 19.c.26

33

^p So wie zijn ziele soeckt te behouden, die salse verliesen: ende wiese verliest, die salse leuendich maken.

p Matthei 10.d.39 ende 16.c.25 Marci 8.d.35 Luce 9.c.24 Ioannis 12.c.25.

34

^q Ick segghe v: in die selue nacht sullen twee op een bedde wesen, de een sal aenghenomen, ende de ander sal achter ghelaten worden.

q Matth. 24.e.40 1.Thess. 4.b.17

35

Twee sullen tsamen malen: de een sal aengenomen worden, ende de andere sal achter ghelaten worden.

36

Ende sy antwoordden ende seyden hem: Waer Heere?

36[37]

Hy seyde tot hen: ^r Waer het ^s† lichaem is, daer sullen de Arenden vergaderen.

r Iob 39.d.33 Matthei 24.c.28

s† Anders, aes