Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. Door de gelijckenisse des verloren schaeps, 8. ende des pennincks, 11. ende des verloren soons, noodt Christus tot beteringhe.

A.1

ENde ^a tot hem quamen alle Tollenaers ende Sondaers, ⁺ op dat sy hem hoorden.

a Matthei 9.b.10 Marc. 2.b.15 Luce 5.c.29.

+ De Sondaers hooren Christum.

2

Ende de Phariseen ende de Schriftgheleerde, murmureerden, seggende: Dese ontfangt de Sondaers ende eet met hen.

3

Ende hy sprack tot hen dese ghelijckenisse, segghende:

4

^b Wat mensche isser onder v die hondert schapen heeft, ⁺ ende een van dien verliest, laet hy niet de neghen ende tnegentich in de woestijne, ende gaet na dat verloren tot dat hijt vint?

b Matth. 18.b.12

+ Ghelijckenisse van een verloren Schaep.

5

Ende als hijt gheuonden heeft, verblijdende hem, leyt hijt op syne schouderen.

6

Ende te huys komende, ⁺ roept hy te samen syne vrienden ende ghebueren, segghende tot hen: Verblijt v met my, want ick hebbe mijn schaep gheuonden ^* dat verloren was.

+ Blijschap ouer den bekeerden Sondaren.

* 1.Petri 2.b.10

7

Ick segghe v, dat daer also blijschap sal wesen in den Hemel ouer eenen Sondaer die hem bekeert, meer dan ouer ^c neghen ende tneghentich Rechtueerdighe, die gheen bekeeringhe en behoeuen.

c Luc 5.d.32

8

Of wat vrouwe isser, hebbende thien pennin-

[fol. 30r]

gen, indien sy eenen penninck verliest, ontsteect sy niet een keersse, ende keert het huys, ende soeckt neerstelick tot dat sy hem vindt:

9

Ende als sy hem gheuonden heeft, roept sy te samen haer vriendinnen ende ghebuerinnen, segghende: Verblijdt v met my, want ick hebbe den penninck geuonden dien ick verloren hadde.

B.10

Also, segghe ick v, sal daer blijschap wesen voor de Engelen Gods ouer eenen Sondaer die hem bekeert.

11

Ende hy seyde: ⁺ Een mensche hadde twee sonen:

+ Van den verloren sone.

12

Ende de ionckste van hen seyde tot synen vader: Vader, gheeft my het deel des goets dat my toekoemt. Ende hy deylde hen het goet.

13

Ende niet veel daghen daer na, ⁺ alst de ionckste sone al versamelt hadde, reysde hy wech in verren lande: ende daer heeft hy zijn goet doorghebracht met eenen ouerdadighen leuen.

+ Der Heydenen figure.

14

Ende als hijt al verteert hadde, so is daer geworden ^d een groote diere tijt in dien lande, ende hy begonst ghebreck te lijden.

d Grece, stercken hongher

15

Ende is ghegaen, ende heeft hem gheuoecht by eenen Borger des seluen lants: Ende die heeft hem ghesonden in syne Ackers, om de swijnen te weyden.

16

Ende hy begeerde synen buyck te vullen met den draf dat de swijnen aten: ende niemant gaft hem.

17

Ende tot hem seluen ghekomen zijnde, ⁺ seyde hy: Hoe veel huerlinghen mijns vaders oueruloeyen van brooden, ende ick ^e† vergae van hongher.

+ Castijdinghe geeft verstant.

e† Anders, vergae hier, etcet.

18

Ick sal opstaen ende tot mynen vader gaen, ende hem segghen: Vader ick hebbe gesondicht in den Hemel ende voor dy:

19

Ende ben niet meer weerdich dijn sone ghenaemt te worden: maeckt my als een van dyne huerlinghen.

C.20

Ende hy stondt op ende ghinck na synen vader. ^{+ f} Ende als hy noch verre van daer was, sach hem zijn vader, ende wert beroert met barmherticheyt, ende [tot hem] loopende, viel hem aen den hals, ende kuste hem.

+ De barmherticheydt Gods ouer de bekeerende Sondaers is onwtsprekelic.

f Actuum 2.d.39 Ephe. 2.b.12.16

21

Ende de sone seyde tot hem: Vader ick hebbe ghesondicht teghen den Hemel ende voor dy, ende ben niet meer weerdich dijn sone genaemt te worden.

22

Ende de vader seyde tot syne Dienstknechten: Brengt hier dat beste ^g kleet, ende doet het hem aen, ende geeft hem eenen rinck aen syne hant, ende schoenen aen syne voeten:

g Grece, Stola, ende was een lanck cierlick kleedt tot der Aerden.

23

Ende brengt hier dat ghemeste kalf, ende slachtet, ende laet ons eten ende vrolick zijn.

24

Want dese mijn sone was doodt, ende is weder leuendich gheworden: hy was verloren ende hy is gheuonden. Ende sy begonsten vrolick te zijn.

25

Ende zijn oudtste sone was in den acker, ⁺ ende als hy quam ende den huyse ghenaeckte, hoorde hy het ghesanck ende het ghedans:

+ Der Ioden figure.

26

Ende riep eenen van den knechten, ende vraechde hem wat dat ware.

27

De welcke seyde tot hem: Dijn broeder is gekomen: ende dijn vader heeft dat ghemeste kalf gheslacht, om dat hy hem ghesont weder ontfanghen heeft.

28

Ende hy wert toornich, ende wilde niet in gaen. Doe ghinck zijn vader wt ende badt hem.

29

Ende hy antwoordde ende seyde tot synen vader: Siet ^h ick hebbe dy so veel Iaren ghedient, ende hebbe noyt dijn ghebot ouerghetreden: ende du hebst my noyt eenen Bock ghegheuen, dat ick met myne vrienden vrolick ware.

h Grece, ick diene dy so veel Iaren.

D.30

Maer als dese dijn sone gekomen is, die ^† dijn goet met Hoeren doorgebracht heeft, so hebstu hem dat ghemeste kalf gheslacht.

† anders, zijn.

31

Ende hy seyde tot hem: Kint, du bist altijt met my, ende al wat myne is, is dyne:

32

Men behoorde vrolick ende blijde te zijn, om dat dese dijn broeder doot was, ende is weder leuendich gheworden: hy was verloren, ende is gheuonden.