Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

5. Christus verthoont hem na zijn opstandinghe, 14. ende straft de ongheloouicheyt zijnder Discipulen, 19. de welcke na zijn opklimminghe, achteruolghende zijn ghebot ende belofte, 20. prediken ende beuestighen het Euangelium met teeckenen.

A.1

ENde ^a als de Sabbath voorby was, ⁺ so hebben Maria Magdalene, ende Iacobi, ende Salome specerije ghekocht, op dat sy quamen, ende hem salfden.

a Matth. 28.a.1. Luce 24.a.1. Ioannis 20.a.1

+ De vrouwen gaen na het graf.

2

Ende zijn seer vroech op den eersten dach der Sabbathen gekomen tot den graue, als de Sonne op ghinck.

3

Ende seyden tot malcanderen: Wie sal ons den steen vander deure des grafs af wentelen?

4

(Ende als sy opsaghen, saghen sy dat de steen af ghewentelt was) want hy was seer groot.

5

^b Ende int graf ghegaen zijnde, hebben sy ghesien eenen Ionghelinck, sittende ter rechter hant, bekleedt met eenen langen witten kleede: ende werden veruaert.

b Ioan. 20.b.12

6

Ende hy seyde tot haer: ⁺ En vreest niet, ^c ghy soect Iesum van Nazareth den ghecruysten: Hy is opghestaen, hy en is hier niet: siet de plaetse daer sy hem gheleyt hadden.

+ De Engel verkondicht de verrijsenisse.

c Matth. 28.a.5. Luc. 24.a.4

7

Maer gaet henen, segt synen Discipulen, ende Petro, dat hy voor v gaet in Galileam, ^d daer sult ghy hem sien, ^e ghelijck hy v gheseyt heeft.

d Act. 1.a.9. 1.Corint. 15.a.6

e Matth. 26.d.32 ende 28.b.10 Marci 14.c.28

8

^f Ende sy wtgaende, zijn haestelick vanden graue gheuloden, want beuinge ende verschrickinghe hadde haer beuanghen, ende seyden niemanden yet, want sy waren beureest.

f Matth. 28.a.8 Luce 24.a.9. Ioannis 20.b.18

9

Als Iesus opghestaen was, ⁺ des morgens op den eersten dach des Sabbaths, ^g wert hy eerst gesien van Maria Magdalene, ^h wt welcke hy seuen Duyuelen wtgheworpen hadde.

+ Christus wort ghesien van Magdalene.

g Ioan.20.b.14

h Luce 8.a.2

B.10

Sy ginck ende bootschaptet den ghenen die met hem gheweest hadden, de welcke truerden ende weenden:

11

Ende als sy hoorden dat hy leefde, ende van haer ghesien was, en gheloofden zijt niet.

12

ⁱ Ende daer na is hy in een ander ghedaente gheopenbaert tween anderen van hen, ⁺ daer sy wandelden ende in het velt ghegaen waren.

i Luce 24.b.13

+ Christus wort ghesien van de twee die na Emaus gingen.

13

Dese ginghen oock henen, ende bootschaptent den anderen, ende dien gheloofden sy oock niet.

14

^k Ten laetsten is hy gheopenbaert den eluen daer sy aen de Tafel saten, ⁺ ende verweet hen haer ongheloouicheyt ende hardicheyt des herten, om dat sy niet gelooft en hadden den genen die hem ghesien hadden weder opghestaen.

k Luce 24.d.35 Ioannis 20.b.19 1.Corint. 15.a.5

+ Der Apostelen ongeloouicheyt.

15

Ende seyde tot hen: ^{+ l} Gaet in de gantsche werelt, predict het Euangelium allen creatueren.

+ Sy worden gesonden te prediken.

l Matth. 28.b.19 Ioannis 15.b.16

16

Die gheloouen sal, ende ghedoopt sal zijn, sal salich worden. ^m Ende die niet en sal ghelooft hebben, sal verdoemt worden.

m Ioannis 3.b.18 ende 12.e.48

17

Ende den ghenen die gheloouen, sullen dese teeckenen na volghen: ⁿ In mynen name sullen sy Duyuelen wtworpen, ^o sy sullen met nieuwe tonghen spreken.

n Luce 10.b.17 Actuum 5.b.16 ende 8.a.7 ende 16.b.18 ende 19.b.12

o Actuum 2.a.4 ende 10.e.46

18

^p Sy sullen slanghen verdrijuen, ende so sy yet doodelicx drincken, dat en sal hen niet schaden. ^q Op de krancke sullen sy de handen leggen, ende sy sullen ghesont worden.

p Luce 10.b.19 Actuum 28.a.5

q Actu. 28.b.10

19

^r Ende na dat de Heere aldus met hen gesproken hadde, wert hy opghenomen ten Hemel, ende is gheseten ter rechterhant Gods.

r Luce 24.f.50 Actu. 1.a.9

20

Ende sy wtghegaen zijnde, predicten ouer al, ^s ende de Heere wrocht mede, ende becrachtichde het woort met nauolghende teeckenen.

s Actu. 14.a.3 Hebr. 2.a.4