Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

5. Wat voor de laetste toekoemste Christi geschieden moet, 33. ende hoemen hemseluen moet voor bereyden.

A.1

ALs hy ^a wt den Tempel ghinck, seyde hem een van syne Discipulen: Meester, siet welcke steenen, ende welcke timmeragie.

a Matth. 24.a.1 Luce 21.a.5

2

Ende Iesus antwoordde, segghende tot hem: Siestu dese groote timmeragien, ^b daer en sal niet eenen steen op den anderen gelaten worden, die niet afghebroken sal worden.

b Luce 19.e.44 1.Reg. 9.a.8. Mich. 3.b.12

3

^c Ende als hy op den Olijfberch satt, teghen ouer den Tempel, Petrus ende Iacobus, ende Ioannes, ende Andreas, vraechden hem besijden, segghende:

c Matth. 24.a.3 Luce 21.a.7

4

^* Segt ons, ⁺ wanneer sullen dese dingen gheschieden? ende wat teecken [sal daer wesen] wanneer dit alles voleynt sal worden?

* Act. 1.a.6

+ Teeckenen die de toekoemst Christi voorgaen.

5

Ende Iesus antwoorddende hen, begonste te segghen: ^d Siet toe dat v niemant verleyde:

d Ierem. 29.a.8 Ephe. 5.a.6. Coloss. 2.b.18 2.Thess. 2.a.2. 1.Ioannis 4.a.1

6

Want vele sullender komen ^e in mynen naem, segghende, ick ben [Christus] ende sullender vele verleyden.

e Ierem. 14.b.14 ende 23.c.21

7

Ende als ghy sult hooren oorloghe ende gheruchte van oorloghe, so en vreest niet, want het moet gheschieden: maer het en is noch gheen eynde.

8

^f Want het een volck sal tegen het ander oprijsen, ende het een Koninckrijck tegen het ander, ende daer sullen Aertbeuinghen zijn in verscheyden

f Esai. 19.a.2. 4.Esd. 13.d.31 ende 15.b.15

[fol. 20r]

plaetsen, ende daer sullen diere tijden wesen, ende beroerten: dese [dinghen] zijn het beghin der smerten.

9

^g Siet ghy toe voor v seluen: ⁺ want sy sullen v ouerleueren in de raethuysen, ende in de vergaderinghen sult ghy ghegeeselt worden, ende voor Stadthouderen ende Koninghen sult ghy gheleydt worden, om mynen wille, hen tot een ghetuyghenisse.

g Matth. 10.b.17. ende 24.a.9. Luce 21.b.12 Ioannis 15.b.19 ende 16.a.2 Apocal. 2.b.10

+ Veruolginghe om des Euangeliums wille.

B.10

Ende het Euangelium moet eerst onder alle volcken ghepredickt worden.

11

^h Ende wanneer sy v leyden sullen om ouer te leueren, ⁺ so sorcht te voren niet wat ghy segghen sult, noch bedenckt niet, maer dat v gegeuen sal worden te dier vre, dat spreeckt: Want ghy zijt niet die daer spreeckt, maer de heylighe Gheest.

h Matth. 10.b.19 Luce. 12.b.11 ende 21.b.14

+ Het Euangelium sal gepredict worden allen volcken.

12

ⁱ Ende de een broeder sal den anderen broeder ouer leueren in den doot, ende de vader het kint: ende de kinderen sullen opstaen teghen hare ouderen, ende sullense dooden.

i Ezech. 38.c.21 Mich. 7.a.2 4.Esd. 5.a.9

13

Ende ghy sult ghehaet worden van alle [menschen] om mijns naems wille: ^k maer wie volstandich blijft totten eynde, die sal salich worden.

k Matth. 10.c.22. ende 24.b.13 Luce 21.b.19 Apocal. 2.a.7 ende 3.b.10

14

^l Ende als ghy sult sien den grouwel der verwoestinge (daer ^m Daniel de Propheet van ghesproken heeft) staende daer hy niet behoort (diet leest die versta het) als dan wie in Iudea is, die vliede op de berghen.

l Matth. 24.b.15 Luce 21.c.20

m Dan. 9.c.27

15

Ende die op het dack is, ⁺ die kome niet af in zijn huys, noch gae niet om yet wt zijn huys te nemen:

+ De verwoestinge Ierusalems.

16

Ende die in den Acker is, die keere niet wederom te rugghe om zijn kleedt te nemen.

17

Ende wee den beuruchten [vrouwen] ende den sooghenden in die daghen.

18

Ende bidt dat uwe vlucht niet en gheschiede in den winter.

19

Want ⁿ in dese daghen sal sulcke verdruckinghe wesen, dies ghelijcks niet geweest en is van den beginne der creatueren die God geschapen heeft tot nu toe, noch wesen sal.

n Griecx, dese daghen sullen etcet.

C.20

Ende so de Here die daghen niet verkort en hadde, gheen vleesch soude salich worden: maer om der wtuerkorenen wille die hy wtuerkoren heeft, heeft hy die daghen verkort.

21

^o Ende als v dan yemant segget: Siet hier is Christus, of, siet daer: ghelooft het niet.

o Matth. 24.c.23 Luce 21.a.7

22

^p Want daer sullen valsche Christi, ⁺ ende valsche Propheten opstaen, ende sullen teeckenen ende wonderlickheden doen, om te verleyden waert moghelick, oock de wtuerkorene.

p Deut. 13.a.1 2.Thess. 2.b.12

+ Der valsscher Propheten miraculen.

23

Siet ghy dan voor v, siet ick hebt v alles voorseydt.

24

^q Ende in die daghen na de verdruckinge, sal de Sonne verduystert worden, ende de Mane sal haer schijnsel niet gheuen.

q Matth. 24.c.29. Luce 21.c.25 Esai. 13.b.10 Ezech. 32.a.7 Ioel 2.d.31 ende 3.b.15 Apocal. 6.b.12

25

Ende de sterren des Hemels sullen wt vallen, ende de krachten die in de Hemelen zijn, sullen beweecht worden.

26

^r Ende dan sullen sy den Sone des menschen sien komen in de wolcken met grooter macht ende eerlicheyt.

r Dan. 7.b.10. Matth. 16.c.27 ende 24.d.30 ende 25.d.31 ende 26.g.63 Marci 14.g.61 Luce 21.c.27 Actu. 1.b.11 2.Thess. 1.b.10 Apocal. 1.a.7

27

Ende dan sal hy syne Enghelen senden, ende sal syne wtuerkorene vergaderen van de vier winden, van den wtersten der Aerden, tot den wtersten des Hemels.

28

^s Leert de ghelijckenisse van den vijgheboom. Als syne tacken nu teer worden, ende bladeren voortbrenghen, so weet ghy dat de Somer by is.

s Matth. 24.d.32 Luce 21.c.29

29

Also ghy oock, wanneer ghy sulcx siet gheschieden, so weet dat het na by in der deuren is.

D.30

Voorwaer segghe ick v, dit gheslachte en sal niet vergaen, tot dat dit alles gheschiet zijn sal.

31

^t Hemel ende Aerde sullen vergaen, ⁺ maer mijn woorden sullen niet vergaen.

t Psalm. 102.c.27 Esai. 40.a.8 ende 51.a.6 Hebr. 1.b.11

+ Gods woordt.

32

^u Ende van dien dage ende vre weet niemant, noch oock de Enghelen die in den Hemel zijn, noch de Sone, dan [alleen] de Vader.

u Act. 1.a.7

33

^x Siet toe, ⁺ waeckt ende bidt: Want ghy en weet niet wanneer de tijdt is.

x Matth. 24.e.42 Luce 12.e.40 ende 21.d.33 1.Thess. 5.a.6

+ Men moet waken ende bidden.

34

[Het is] gelijck een mensche die buyten lants reysde, ende verliet zijn huys, ende gaf synen dienstknechten macht, ende eenen yegelicken zijn werc, ende beual den deurwachter te waken.

35

Daerom waeckt (want ghy en weet niet wanneer de Heere des huys komen sal, des auonts, of ter middernacht, oft ontrent het hanen ghekraey, oft inden morghenstont.)

36

Op dat hy niet onuersiens en kome, ende v vinde slapende.

37

Ende dat ick tot v segghe, dat segghe ick tot allen, Waket.