Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

1. Christus doet zijn incoemste te Ierusalem, 15. iaecht de kooplieden wt, 22. ende betoont de kracht des gheloofs, 24. de maniere van wel te bidden, 28. ende wt wat macht hy sulcx doet.

[fol. 19r]

A.1

ENde ^a als sy by Ierusalem quamen tot Bethphage ende Bethania, by den olijfberch, sandt hy wt twee syner Discipulen,

a Matth. 21.a.1 Luce 19.c.29

2

Ende seyde tot hen: Gaet henen in dat vleck dat teghen v ouer is: ende terstont als ghy daer koemt, sult ghy vinden een veulen ghebonden, op welck gheen mensche geseten heeft: ontbint dat ende brenghet hier.

3

Ende indien v iemant vraechde, waerom doet ghy dat? so segt: De Heere heuet van noode. Ende hy salt terstont herwaerts senden.

4

Sy ginghen ende vonden het veulen gebonden aen der deuren, buyten op een wechscheydinghe, ende ontbondent.

5

Ende sommige van die daer stonden, seyden: Wat maeckt ghy, dat ghy dat veulen ontbint?

6

Doe seyden sy gelijck hen Iesus beuolen hadde, ende sy lietense gaen.

7

^b Ende sy brachten het veulen tot Iesum, ⁺ ende wierpen haer kleederen daer op, ende hy is daer op gheseten.

b Ioan. 12.b.14 2.Reg. 9.b.13

+ Christus rijt te Ierusalem in op eenen Ezel.

8

Ende vele spreydden haer klederen op den wech, andere sneden meyen van de boomen ende stroydense op den wech.

9

Ende die voor ghingen, ende die na volchden, riepen, segghende:^c Hosanna, ^d Ghepresen zy die daer koemt in den naem des Heeren.

c Psalm. 118.c.26

d Of, gheluckich

B.10

Ghepresen zy dat Koninckrijcke ons vaders Dauids, dat daer koemt in den naem des Heeren. Hosanna in de hoochste [plaetsen.]

11

^e Ende Iesus quam te Ierusalem in, ⁺ ende ginck inden Tempel: Ende als hijt al ouersien hadde ende het nu auont was, ghinck hy wt met den twaeluen na Bethanien.

e Matth. 21.b.12 Luce 19.e.45 Ioannis 2.b.14

+ Christus in den Tempel.

12

^f Ende des anderen daechs als sy van Bethanien quamen, ⁺ hongherde hem.

f Matth. 21.b.18

+ De onuruchtbaer vijgeboom wort verdorret.

13

Ende siende van verre eenen vijgeboom bladeren hebbende, ghinck [om te sien] of hy daer wat op vinden soude: ende als hy tot den seluen gekomen was, vant hy niet dan bladeren, want het was der vijghen tijt niet.

14

Ende Iesus antwoorddende seyde tot hem: Nu ete voortaen niemant vrucht van dy in der eewicheyt: ende syne Discipulen hoorden dat.

15

Ende sy quamen te Ierusalem, ^{+ g} ende Iesus in den Tempel gegaen, begonst de koopers ende verkoopers wt te drijuen wt den Tempel, ende de tafelen der wisselaren ende de stoelen der Duyuen vercoopers heeft hy omme ghekeert.

+ De koopers ende verkoopers wt den Tempel gedreuen.

g Matth. 21.b.12 Luce 19.e.45 Ioannis 2.b.14

16

Ende liet niet toe dat yemant eenich vat door den Tempel droeghe.

17

Ende hy leerde seggende tot hen: Is daer niet geschreuen, ^{+ h} Mijn huys sal een bedehuys heeten allen volcken? ⁱ maer ghy hebt dat [tot] eenen moortcuyl ghemaeckt.

+ Gods huys is een bede huys.

h 1.Reg. 8.c.29 Esai 56.a.7

i Ierem. 7.b.11

18

De Schriftgeleerde ende Ouerpriesters dit hoorende: ^k sochten hoe sy hem dooden mochten. Want sy vreesden hem omdat de gantsche schare verwonderde van zijnder leere.

k Ioannis 7.b.19

19

Ende alst nu auont gheworden was, ghinck hy wt de stadt.

C.20

Ende des morghens voorby gaende, saghen sy den vijgheboom verdorret van de wortel aen. ⁺

+ Ghelooue aen God.

21

Ende Petrus [des] ghedachtich zijnde, seyde tot hem: Rabbi, siet de vijgheboom dien du vervloeckt hebst, is verdorret.

22

Iesus antwoorddende, seyde tot hen: Hebt ghelooue aen God. ⁺

+ Ghebet.

23

^l Want voorwaer segge ick v: So yemandt tot desen berch seydt: Wort opgheheuen ende inder Zee geworpen, ende niet en twijffelt in zijn herte, maer gelooft dat het gene dat hy seyt geschieden sal: so sal hem gheworden wat hy seyt.

l Matth. 17.c.20 ende 21.c.21 Luce 17.a.6

24

Daerom segghe ick v: ^m al wat ghy biddende begheert, ghelooft dat ghyt ontfangen sult, ende het sal v gheworden.

m Ierem. 29.b.12 Matth. 7.a.7. Luce 11.a.9 Ioannis 14.b.13 ende 16.c.24 Iacobi 1.a.6 1.Ioan. 3.c.22 ende 5.b.14.

25

ⁿ Ende wanneer ghy staet om te bidden, so vergheeft indien ghy wat teghen yemant hebt, op dat oock uwe Vader die in de Hemelen is, v uwe misdaden vergheue.

n Matth 6.b.14 Coloss. 3.b.13 Syrach 28.a.2

26

^o Want indien ghy niet en vergheeft, so en sal oock uwe Vader die in de Hemelen is, uwe misdaden niet vergheuen.

o Matth. 18.c.25

27

^p Ende sy quamen wederom te Ierusalem, ende als hy inden Tempel wandelde, quamen tot hem die Ouerpriesters, ende Schrifgheleerde, ende Ouderlinghen,

p Matth. 21.c.21 Luce 20.a.1

28

Ende seyden tot hem: ^q Wt wat macht doestu dit? ende wie heeft dy dese macht ghegheuen dit te doen?

q Exod. 2.b.14 Actu. 4.a.7 ende 7.c.27

29

Iesus antwoordde ende seyde tot hen: Ick sal v oock een ^r dinck vragen: ende antwoort my, ende ick sal v oock segghen wt wat macht ick dit doe.

r Griecx, woordt

D.30

De Doop Ioannis was hy wt den Hemel, ⁺ of wt de menschen? Antwoort my.

+ Ioannis doop.

31

Sy ouerleyden by henseluen, segghende: Indien wy seggen, wt den Hemel, so sal hy seggen: Waerom hebt ghy hem dan niet ghelooft?

32

Ende indien wy seggen, wt de menschen, ^s so vreesen wy het volck. ^t Want sy hielden alle dat Ioannes warachtich een Propheet ware.

s Griecx, sy vreesden het volck

t Matth. 14.a.5 Marc. 6.c.21

33

Ende antwoordden, seggende tot Iesum: Wy wetent niet. Ende Iesus antwoorddende seyde tot hen: So en segghe ick v oock niet wt wat macht ick dit doe.