Logo DBNL
Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel) (2009)

Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

(2009)–Anoniem Deux-Aes bijbel–rechtenstatus Auteursrechtelijk beschermd

Vorige Volgende

Dat viij. Capittel.

1. Christus spijst vyer duysent mannen met seuen brooden ende weynich vischkens, 11. antwoort den Phariseen die teecken begeeren van den Hemel, 15. verdoemt haer leere ende gheueynstheydt, ende oock de Herodis, 22. ende na dat hy den blinden heeft ghenesen, 27. ende van syne Discipulen bekent is te zyne de Sone Gods, 31. strafte Petrum, die hem wilde van de doot verhinderen, 34. daer by segghende hoe nootsakelick de veruolghinghe zy.

A.1

IN a die daghen als daer een gheheel groote schare was, + ende niet en hadden te eten, riep Iesus syne Discipulen tot hem, ende seyde tot hen:

2

My iammert der scharen, want sy nu dry daghen by my blijuen, ende hebben niet te eten.

3

Ende indien ickse late vastende na haer huys gaen, so sullen sy in den wege versmachten, want sommighe van hen zijn van verre ghekomen.

4

Ende syne Discipulen antwoordden hem: Waer van soude yemant dese hier in de woestijne konnen versadighen met broot?

5

Ende hy vraechde hen: Hoe veel brooden hebt ghy? Sy seyden hem: Seuen.

6

Doe gheboodt hy der scharen neder te sitten op de Aerde, ende nam de seuen brooden, dancte, ende brackse, + ende gafse synen Discipulen, dat syse souden voorlegghen, ende sy leydense den scharen voor.

7

Sy hadden oock weynich kleyn vischkens, ende als hy ghedanckt hadde, beual hy die oock voor te legghen.

8

Ende sy aten ende werden versadicht, ende

hebben opghenomen seuen koruen ouergebleuen brocken.

9

Ende die daer gheeten hadden, waren ontrent vier duysent, ende hy lietse van hem.

B.10

Ende terstont in het schipken ghegaen zijnde met syne Discipulen, is hy ghekomen in de deelen Dalmanutha.

11

Ende de Phariseen quamen wt, ende begonsten met hem te twisten, b soeckende van hem een teecken van den Hemel, + hem beproeuende.

12

Ende hy versuchtende in synen gheest, seyde: Wat soeckt dit geslachte een teecken? Voorwaer segghe ick v, desen gheslachte sal gheen teecken ghegheuen worden.

13

Ende als hyse ghelaten hadde, is hy wederom in het schipken ghetreden, ende voer ouer.

14

Ende sy hadden vergeten brooden te nemen, ende hadden niet meer dan een broot met hen in het Schipken.

15

Ende hy gheboot hen, + segghende: c Siet toe, wacht v van den Deesem der Phariseen, ende van den Deesem Herodis.

16

Ende sy ouerleyden, sprekende tot malcanderen: Wy hebben gheen brooden.

17

Ende Iesus dat bekennende, seyde tot hen: Wat ouerlegt ghy dat ghy geen brooden hebt? Merct ghy noch niet, noch verstaet ghy niet? Hebt ghy noch v verblint herte?

18

Ooghen hebbende siet ghy niet? Ende ooren hebbende hoort ghy niet?

19

Ghedenckt ghy niet, d als ick vijf brooden brack onder vijf duysent [mannen] hoe veel volle koruen brocken ghy op naemt? Sy segghen hem: Twaelue.

C.20

e Ende als de seuen [brooden gebroken werden] onder vyer duysent [mannen] hoe veel volle koruen brocken naemt ghy op? Sy seyden: Seuen.

21

Doe seyde hy tot hen: Hoe verstaet ghy niet?

22

Ende hy quam tot Bethsaida: ende sy brachten hem eenen blinden, ende baden hem dat hy hem raecte.

23

Ende des blinden hant genomen hebbende, leydde hi hem wt het vleck, ende spooch op syne ooghen, ende leyde de handen op hem, ende vraechde hem of hy yet sach.

24

Ende die man opsiende, seyde: Ick sie menschen, + want ick sie [dinghen] als boomen, wandelende.

25

Daer na leyde hy wederom de handen op syne oogen, ende maeckte hem siende. Ende hy wert weder te rechte gebracht, ende sachse alle klaerlick.

26

Ende Iesus sandt hem na zijn huys, segghende: Gaet in het vleck niet, noch segt het ooc niemande in den vlecke.

27

f Ende Iesus ende syne Discipulen ghingen na de vlecken Cesaree Philippi. Ende in den wech vraechde hy syne Discipulen, seggende tot hen: Wie segghen de menschen dat ick ben? +

18[28]

Ende sy antwoordden: g Ioannes de Dooper: ende sommighe, Elias: ende sommighe, een van de Propheten.

29

Ende hy seyde tot hen: Ende ghy, wie segt ghy dat ic ben? + Petrus antwoorddende seyde tot hem: h Du bist Christus.

D.30

Ende hy verboot hen scherpelick, dat sy [dat] niemande van hem segghen en souden. +

31

i Ende hy begonstse te leeren, dat de Sone des menschen vele moeste lijden, ende van de Ouderlinghen ende Ouerpriesteren ende Schriftgheleerde verworpen ende gedoot worden, ende na dry daghen wederom opstaen.

32

Ende hy seyde hen die reden k vrij wt: ende Petrus nam hem ende begonst hem te straffen.

33

Maer hy hem ommekeerende, ende syne Discipulen aensiende, strafte Petrum, segghende: l Gaet achter my Satan, want du versinst niet dat Gods is, maer dat der menschen is.

34

Ende de scharen met syne Discipulen tot hem gheroepen hebbende, seyde hy tot hen: So wie m my wil na volghen, + die versake hemseluen, ende neme zijn cruyce op, ende volghe my na.

35

n Want wie zijn o leuen wil behouden die salt verliesen: Ende so wie zijn leuen sal verliesen om my ende om des Euangeliums wille, die salt behouden.

36

Want wat sal het den mensche baten, of hy de geheele werelt wonne, ende zijn ziele schade dede?

37

Of wat sal de mensche gheuen p daer hy zijn ziele mede weder losse?

38

q Want so wie hem mijns ende myner woorden sal gheschaemt hebben in dit ouerspelich ende sondich gheslachte: diens sal hem de Sone des menschen oock schamen als hy sal komen met syne heylighe Enghelen in de eerlickheyt zijns Vaders.


Vorige Volgende

Over het gehele werk

auteurs