Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Iesus de Duyuels wt den mensche drijuende, 11. laet hen toe in de swijnen te gaen, 25. daerna een vrouwe vanden bloetganck ghenesen hebbende, 35. verwect hy de dochter Iairi.

A.1

ENde ^a sy quamen ouer op dander zijde van der Zee, ⁺ in der Gadarenen lant.

a Matth. 8.c.28. Luce 8.c.26.

+ De beseten wort ghenesen.

2

Ende als hy wt het schipken ghegaen was, quam hem terstont te gemoet een mensche wt de grauen, met eenen onreynen Gheeste.

3

De welcke zijn wooninghe in de grauen hadde, ende niemant en konde hem binden, oock met gheene ketenen.

4

Want hy hadde menichmael met boeyen ende met ketenen ghebonden gheweest, ende de ketenen waren van hem in stucken ghebroken, ende de boeyen ghebrijselt, ende niemant konde hem temmen.

5

Ende hy was alle tijdt dach ende nacht op de berghen, ende in de grauen, roepende ende slaende hem seluen met steenen.

6

Als hy Iesum van verre sach, liep hy ende viel voor hem neder.

7

Ende riep met luyder stemmen, ⁺ segghende: Wat hebbe ick met dy te doen, Iesu des Alderhoochsten Gods Sone? Ic besweere dy by God, dat du my niet pijnigest.

+ De Duyuel bekent Christum.

8

(Want Iesus seyde tot hem: Gaet wt du onreyne gheest wt den mensche.)

9

Ende hy vraechde hem: Hoe bistu ghenaemt? Hy antwoordde ende seyde: Mijn naem is ^b Legio, want onser zijn vele.

b Legio was gemeynlic een hoop van vijf duysendt voetknechten ende vijf hondert ruyters, somtijdts meer, somtijdts min, daerom wordt dit woort Legio, somtijts genomen voor een heyrkracht, ofte voor seer vele.

B.10

Ende hy badt hem seer dat hy hem wt dien lande niet drijuen soude.

11

Ende daer by de bergen was een groote kudde swijnen weydende.

12

Ende alle de Duyuels baden hem, seggende: Sendt ons tot de swijnen, dat wy in die varen.

13

Ende Iesus liet hen dat terstona toe: ende de onreyne Gheesten wtgeuaren zijnde, voeren in de swijnen, ende de kudde storte krachtelick van bouen af in de Zee. ⁺ (Daer wasser omtrent twee duysent) ende verdroncken alle in de Zee:

+ Het Legioen der Duyuelen vaert in de swijnen.

14

Ende de swijnherders vluchteden, ende boot-

[fol. 16r]

schappent in de stadt, ende op de velden: ende sy quamen wt om te sien wat daer gheschiet was.

15

Ende sy quamen tot Iesum, ende saghen den besetenen die het Legioen gehadt hadde sittende bekleedt, ende verstandich: ende sy vreesden.

16

Ende die het ghesien hadden, vertelden hen wat den besetenen gheschiedt was, ende van de swijnen.

17

Doe begonsten sy hem te bidden, ^c dat hy van hare palen gaen wilde.

c Act. 16.d.39

18

Ende als hy in het schipken ^d getreden was, badt hem de ghene die beseten gheweest hadde, dat hy mochte met hem zijn.

d Luce 8.d.38

19

Ende Iesus liet het hem niet toe, maer seyde hem: ⁺ Gaet henen in dijn huys, tot de dyne, ende bootschapt hen, hoe groote dingen dy de Heere ghedaen heeft, ende [hoe hy] dyner ontfermt heeft.

+ De barmherticheyt Gods verkondighen.

C.20

Ende hy ghinck ende begonste te prediken ^e in de thien steden hoe groote dinghen hem Iesus ghedaen hadde: so dat sy hen alle verwonderden.

e Griecx, in Decapoli

21

^f Als Iesus nu wederom ouer geuaren was in het schipken, op de ander zijde, so is daer een groote schare by hem vergadert, ende hy was by der Zee.

f Matth. 9.b.18 Luce 8.e.41

22

Ende siet daer quam een Ouerste der ^g Synagogen, ⁺ ghenaemt Iairus, ende hem siende viel hy hem ten voeten:

g Dat is, vergaderinghe der Ioden.

+ Iairi dochter wordt van de doot verweckt.

23

Ende badt hem seere, segghende: Mijn dochter leydt in het wterste: Ick bidde dy dat du komest ende de handen op haer legghest, op dat sy ghesont worde, ende leue.

24

Ende hy ghinck henen met hem, ende een groote schare volchde hem, so dat sy hem dronghen.

25

(^h Ende daer was een vrouwe die twaelf iaer lanck den bloetganck ghehadt hadde, ⁺

h Matth. 9.c.20 Luce 8.e.43 Leuit. 15.c.25

+ De Vrouwe wort ghenesen van haren bloetganck.

26

Ende veel gheleden hadde van vele Medecijnmeesters: ende hadde alle haer goedt [daer aen] te coste gheleydt, ende gheen hulpe gheuonden, maer het was met haer meer ergher geworden.

27

Als sy van Iesu ghehoort hadde, is sy ghekomen onder de schare van achter, ende raeckte zijn kleedt.

28

Want sy seyde: Indien ick alleenlick zijn kleederen raecke, ick sal ghesont worden.

29

Ende terstont is de Fonteyne haers bloedts verdroocht: ende sy geuoelde aen haer lijf dat sy vander plaghe ghenesen was.

D.30

Ende Iesus bekende terstont in hemseluen de kracht die van hem wtghegaen was, ende keerde hem omme in de schare, seggende: Wie heeft myne kleederen gheraeckt?

31

Doe seyden syne Discipulen: Du siest dat de schare dy dringhet, ende segstu: Wie heeft my gheraeckt?

32

Ende hy sach rontomme, om haer te sien die dat ghedaen hadde.

33

Ende de vrouwe met vreese ende beuen bekennende dat in haer gheschiet was, is ghekomen ende hem ten voeten gheuallen, ende seyde hem alle de waerheydt.

34

Ende hy seyde tot haer: ⁺ Dochter, dijn gelooue heeft dy geholpen, gaet met vreden, ende weest ghenesen van dyner plaghen.)

+ Ghelooue.

35

ⁱ Als hy noch sprack, quamen sommige vanden Ouersten der Synagogen, ende seyden: Dijn dochter is ghestoruen, wat quelstu den Meester langher?

i Matth. 9.c.23 Luce 8.e.49

36

Ende Iesus terstont ghehoort hebbende dat woort dat geseyt werdt, seyde tot den Ouersten der Synagogen, Vreest niet, gelooft alleenlick.

37

Ende liet niet toe dat hem yemant nauolchde, dan Petrus ende Iacobus, ende Ioannes de broeder Iacobi.

38

Ende hy quam in het huys des Ouersten der Synagogen, ende sach de woelinge die daer seer weenden ende huylden.

39

Ende ingaende seyde hy tot hen: Wat zijt ghy beroert, ende wat weent ghy? Het dochterken is niet doot, ^{+ k} maer het slaept.

+ De doot is een slaep.

k Ioan. 11.b.11.

40

Ende sy belachten hem, ende hy dreefse alle wt, ende nam by hem den vader ende moeder des dochterkens, ende de ghene die by hem waren, ende ghinck in daer het dochterken lach,

41

Ende hy greep dat dochterken by der hant, ende seyde: Talitha Kumi, dat is in Duytsch, du dochterken, ick segghe dy, staet op:

42

Ende terstont stont dat dochterken op, ende wandelde, want het was twaelf Iaer oudt, ende sy verschrickten met groote verschrickinghe.

43

Ende hy gheboodt hen seere, dat niemant dat weten soude, ende seyde datmen haer te eten geuen soude.