Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. De verdorde hant ghenesen zijnde, 6. de Phariseen soecken Christum te dooden, de welcke wijckende na de Zee, gheneest vele siecken: 14. verordent twaelf Apostelen, ende sendtse wt te prediken, 21. daer na gheacht sot te syne, 23. bewijst dat hy teghen den Sathan is, 28. wat sonde onuergheuelick zy, ende wie zijn moeder ende broeders zijn.

A.1

ENde ^a hy ghinck wederom in de vergaderinghe: ⁺ ende daer was een man hebbende een dorre hant.

a Matth. 12.a.9 Luce 6.a.6

+ De verdorde hant wort ghenesen.

2

Ende sy wachteden op hem, of hy dien op den Sabbath ghenesen soude, op dat sy hem beschuldighen mochten.

3

Ende hy seyde tot den mensche die de dorre hant hadde: Staet op int midden:

4

Ende seyde tot hen: Is het gheoorloeft op den Sabbath goet te doen, oft quaet te doen? dat ^b leuen te behouden, oft te verderuen? Ende sy sweghen stille.

b Griecx, ziele

5

Ende als hyse rontom aenghesien hadde met toornicheydt, bedroeft zijnde ouer de verblintheyt haerder herten, seyde hy tot den mensche: Strect dijn hant wt: ende hy strecktese wt, ^c Ende zijn hant werdt wederom ghesondt ghelijck de ander.

c 1.Reg. 13.a.6

6

^d Ende de Phariseen wtghegaen zijnde, hebben terstont met de Herodianen raet ghehouden teghen hem, ⁺ hoe sy hem dooden mochten.

d Matth. 12.b.14. Ioan. 10.d.39 ende 11.f.53

+ Raedtslagen tegen Christum.

7

Ende Iesus weeck van daer met syne Discipulen na der Zee toe, ^e ende hem volchde een groote menichte na van Galilea, ende van Iudea.

e Matth. 4.c.25 Luce 6.b.17

8

Ende van Ierusalem, ende van Idumea, ende van ouer den Iordaen, ende die omtrent Tyrum ende Sidon [woonden] een groote menichte, ghehoort hebbende de groote dinghen die hy dede, quamen tot hem.

9

Ende hy beual synen Discipulen dat sy hem een schipken by houden souden om der scharen wille, dat sy hem niet en souden dringhen.

B.10

Want hy hadde haerder vele gheheelt, ⁺ so dat hem alle die gheplaecht waren oueruielen, op dat sy hem aenroerden.

+ Door het ghenaken Christi worden de krancke ghenesen.

11

Ende de onreyne gheesten als sy hem sagen, ⁺ vielen voor hem neder, ende riepen, segghende: Du bist Gods Sone.

+ De Duyuels willen Christum belijden.

12

Maer hy verboot hen scherpelick met vele woorden dat sy hem niet openbaer maken souden.

13

^f Ende hy klam op den berch, ende riep tot hem die hy wilde: ende sy quamen tot hem.

f Matth. 10.a.1 Marci 6.a.7 Luce 6.b.13 ende 9.a.1

14

Ende hy ordineerder twaelue om met hem te syne, ⁺ ende om dat hyse soude wt senden om te prediken:

+ Christus ordineert Apostelen om te prediken.

15

Ende dat sy macht hebben souden de sieckten te ghenesen, ende de Duyuelen wt te worpen.

16

Ende hy gaf Simoni den naem Petrus,

17

Ende Iacobum den [sone] Zebedei, ⁺ ende Ioannem den broeder Iacobi: ende gaf hen namen, Boanerges, dat is, des Donders sonen.

+ De namen der Apostelen.

18

Ende Andream ende Philippum, ende Bartholomeum, ende Mattheum, ende Thomam, ende Iacobum Alphei [sone,] ende Thaddeum, ende Simonem van Cana.

19

Ende Iudam Iscarioth, die hem oock verriet.

C.20

Ende sy quamen te huys, ende de schare vergaderde wederom, so dat sy gheen ^g ghelegentheydt hadden broot te eten.

g Griecx, niet konden.

21

Als syne vrienden dit hoorden, ⁺ ghinghen sy wt om hem vast te houden: want sy seyden: Hy is wtsinnich.

+ Christus gheacht voor wtsinnich.

22

Ende de Schriftgheleerden die van Ierusalem af gekomen waren, ⁺ seyden: ^h Hy heeft den Beelzebub, ende door den Ouersten der Duyuelen worpt hy de Duyuelen wt.

+ Lasteringe der Schriftgheleerden.

h Matth. 9.d.35 ende 12.c.24 Luce 11.b.15 Ioan. 8.e.48

23

Ende als hyse tot hem geroepen hadde, sprac hy tot hen in ghelijckenisse, Hoe kan de Satan den Satan wtdrijuen?

24

Want indien een Koninckrijck teghen hemseluen gedeylt is, ⁺ so kan dat Koninckrijcke niet staende blijuen.

+ Christus ontschuldicht hem

25

Ende indien een huys teghen hemseluen gedeylt is, so kan dat huys niet staende blijuen.

26

Ende indien de Satan teghen hemseluen opgestaen ende ghedeelt is, so kan hy niet staende blijuen: maer heeft een eynde.

27

Niemant kan in eens stercken huys gaen, ende syne vaten roouen, ⁱ ten zy dat hy eerst den stercken binde, ende dan zijn huys berooue.

i Coloss. 2.b.15

28

Voorwaer segghe ick v, ^k dat alle sonden den kinderen der menschen sullen vergheuen worden: ende die lasteringhen daer sy God mede sullen ghelastert hebben.

k Matth. 12.d.32 Luce 12.b.10 1.Ioan. 5.b.16 1.Sam. 2.c.25

29

^l Maer wie den heylighen Gheest lasteren sal, ⁺ die en sal gheen vergheuinghe hebben inder eeuwicheyt: maer sal der eeuwigher ^m verdoemenisse schuldich zijn.

l Num. 15.d.30

+ Lasteringhe teghen den heylighen Gheest.

m Griecx, oordeels

D.30

Want sy seyden: Hy heeft eenen onreynen Gheest.

31

ⁿ So quamen dan zijn moeder ende syne broeders, ende buyten staende, sonden tot hem, ende lieten hem roepen.

n Matth. 12.e.46 Luce 8.b.19

32

Ende de schare satt om hem: ende men seyde tot hem: Siet dijn moeder, ende dyne broeders ende dyne susters daer buyten, vraghen na dy.

33

Hy antwoordde hen segghende: Wie is mijn moeder, of mijn broeders?

34

Ende rondtomme ouersien hebbende die ommet hem saten, ⁺ seyde hy: Siet mijn moeder ende myne broeders.

+ Christi maechschap.

35

^o Want wie den wille Gods doet, die is mijn broeder, ende mijn suster, ende mijn moeder.

o Ioan. 15.b.14 2.Corint. 5.b.16