Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

1. De opstandinghe Christi wort den vrouwen verkondicht, 9. den welcken hy hemseluen openbaert, 11. Ende de Wachters dese dinghen bootschappende, 12. worden met ghelt verualscht, 18. daer na Iesus zijn Discipulen sendende ouer de werelt om te prediken ende doopen, 20. beloeft hen zijn eeuwighe hulpe.

A.1

IN het ^a laetste des Sabbaths, ⁺ als de eerste [dach] der weke begonste te luchten, quam Maria Magdalena, ende de ander Maria, om het graf te besien.

a Matth. 16.a.1 Luce 24.a.1 Ioannis 20.a.1

+ De Vrouwen gaen het graf besien.

2

Ende siet ^b daer gheschiedde een groote Aertbeuinghe: Want de Enghel des Heeren daelde neder van den Hemel, ende quam toe ende wentelde den steen van der deure, ende sat daer op. ⁺

b Ofte, daer was gheschiet, etcet.

+ Een Enghel bootschapt de opstandinghe Christi.

3

Ende zijn gedaente was ghelijck een blixem, ende zijn kleedinghe wit ghelijck de snee.

4

Ende door vreese van hem zijn de wachters verschrickt gheworden, ende worden als doode.

5

Maer de Enghel antwoordde ende seyde tot de vrouwen: Ghy, vreest niet, want ick weet dat ^c ghy Iesum den ghecruysten soeckt.

c Marci 16.a.6 Luce 24.a.4.

6

Hy is hier niet, want hy is opghestaen, ^d gelijck hy gheseyt heeft: Koemt hier, siet de plaetse daer de Heere gheleghen heeft,

d Matthei 16.c.21 ende 17.c.23 ende 20.b.19 Marci 8.d.31 ende 9.d.31 ende 10.d.34 Luce 9.c.22 ende 18.d.33. ende 24.a.6.

7

Ende gaet hastelick, ende segt synen Discipulen dat hy van den dooden opghestaen is: Ende

[fol. 14r]

siet, hy gaet voor v in Galileam, daer sult ghy hem sien. Siet ick hebt v gheseyt.

8

^e Ende sy gingen hastelick van den graue met vreese ende grooter blijschap, ende liepen, ende bootschaptent synen Discipulen.

e Marci 16.a.8 Ioannis 20.b.18

9

Ende als sy ghingen om synen Discipulen te bootschappen, ⁺ siet Iesus is haer te gemoete gekomen, segghende: Weest ghegroet: ende sy zijn toe gekomen, ende hebben syne voeten ghehouden, ende vielen voor hem neder.

+ Christus verresen wordt van de vrouwen gesien.

B.10

Doe seyde Iesus tot haer: ⁺ Vreest niet, gaet henen ende bootschappet mynen broederen dat sy in Galileam gaen, ^f daer sullen sy my sien.

+ Broeders Christi.

f Act. 1.a.9 1 Corinth. 15.a.5

11

Als sy nu gegaen waren, siet sommighe van de wachters quamen in de stadt, ende bootschapten den Ouerpriesteren al dat daer gheschiedt was.

12

Doe vergaderden sy met de Ouderlinghen: ⁺ ende raedt ghehouden hebbende, gauen sy den krijchsknechten ghelts ghenoech.

+ De waerheydt lijdt gewelt ende listen, ende verualsschinghe door gauen.

13

Segghende: Segt dat syne Discipulen zijn des nachts ghekomen, ende hebben hem ghestolen, dewijle ghy sliept.

14

Ende indien dat verhoort wort by den Stathouder, wy sullent hem wijsmaken, ende v sonder sorghe maken.

15

Ende sy het gelt genomen hebbende, deden ghelijck sy gheleert waren. Ende dit woordt is verbreyt by den Ioden tot den dach van heden. ⁺

+ Christus van de Apostelen aengebeden in Galilea.

16

Ende de elf discipulen ginghen na Galileam op den berch ^g daer Iesus hen beuolen hadde.

g Matth. 26.d.32 Marci 14.c.28

17

Ende als sy hem saghen, vielen sy voor hem neder, ⁺ ende sommighe twijfelden.

+ Hy sendt de Apostelen om te prediken.

18

Ende Iesus by hen komende, sprack met hen, seggende: ^h My is ghegeuen alle macht in Hemel ende op Aerden.

h Psalm. 8.a.7 Matthei 11.c.27 Luce 10.c.22 Ioannis 3.d.35 ende 17.a.2 1.Corinth. 15.c.27 Ephe. 1.c.22 Hebr. 2.a.8

19

ⁱ Daerom gaet ende ^k leert alle ^l volcken: hen doopende in den naem des Vaders, ende des Soons, ende des heylighen Gheests, hen leerende onderhouden al wat ick v beuolen hebbe. Ende siet, ^m ick ben met v alle de daghen tot de voleyndinghe der werelt. Amen.

i Marci 16.b.15 Ioannis 15.b.16

k ofte, maecktese tot Discipulen,

l Griecx, Heydenen,

m Ioan. 14.b.18